AZƏRBAYCANIN GƏNC GİMNASTI ALMANİYADA OLİMPİYA ÇEMPİONU VALERİ BELENKİNİN YANINDA TƏCRÜBƏ KEÇƏCƏKDİR
AZƏRTAC xəbər verir ki, noyabrın 21-də «Abşeron» mehmanxanasında tanınmış Azərbaycan gimnastı, Olimpiya çempionu Valeri Belenki jurnalistlərə müsahibə vermişdir.
Azərbaycan Gimnastika Federasiyasının dəvəti ilə Bakıda qonaq olan V.Belenki hazırda müqavilə ilə Almaniyanın Ştutqart şəhərində məşqçi qismində çalışdığını bildirmişdir.
Azərbaycanda son zamanlar idmana, xüsusilə də gimnastikaya göstərilən diqqət və qayğıdan məmnunluq ifadə edən həmyerlimiz bunun nəticəsi kimi respublikamızda perspektivli idmançıların yetişdiyini vurğulamışdır. Onun sözlərinə görə, Almaniya Gimnastika Federasiyası gənc gimnastımız Şakir Şıxəliyevlə birillik müqavilə bağlayaraq onu Ştutqarta təcrübə keçməyə dəvət etmişdir.
V.Belenki demişdir ki, Barselonada Olimpiya çempionu olduqdan sonra bir çox ölkələrdən, o cümlədən ABŞ və Yaponiyada işləmək üçün dəvətlər almışdır. Lakin son anda Almaniyanı seçmiş və indi bu ölkənin gimnastlarını Olimpiya oyunlarına hazırlayır.
Bakıda son dəfə 1992-ci ildə olduğunu deyən Olimpiya çempionu paytaxtın tanınmaz dərəcədə dəyişdiyini, gözəl və müasir şəhərə çevrildiyini qeyd etmişdir.
######
Bölmənin digər xəbərləri
