Azərbaycanın gənc istedadları
Rauf Məmmədzadə
Bakı, 17 fevral, Anara Axundova, AZƏRTAC
AZƏRTAC Azərbaycanın özlərini beynəlxalq səviyyədə tanıdan gənc istedadları barədə məqalələr silsiləsini davam etdirir.
Həmsöhbətimiz vokalçı, Üzeyir Hacıbəyli adına Bakı Musiqi Akademiyasının (BMA) tələbəsi, beynəlxalq müsabiqələrin iştirakçısı və laureatı Rauf Məmmədzadədir. O, şəhərin ən müxtəlif məkanlarında keçirilən musiqili tədbirlərdə müntəzəm iştirak edir.
Rauf musiqi ilə erkən yaşlarından məşğul olmağa başlayıb, Leopold və Mstislav Rostropoviçlər adına 21 saylı Uşaq musiqi məktəbinin skripka və fortepiano sinfini bitirib. Sonra Azərbaycan Dövlət İqtisad Universitetinə (UNEC) daxil olub. O, ali məktəbdə təhsil aldığı vaxt artıq müxtəlif tədbirlərdə, dövlət festivallarında çıxış edir, beynəlxalq müsabiqələrə gedirdi. Lakin skripkaçı kimi deyil, vokalçı qismində. Rauf oxumağa 2018-ci ildə - Fidan Hacıyevanın Vokal Musiqi Məktəbində peşəkar məşğul olanda başlayıb.
“Mən Müslüm Maqomayevi dinləyərək oxumağa başladım. O, mənim kumirimdir. Əvvəlcə ona bənzəməyə çalışırdım, sonra anladım ki, özümü tapmalıyam. Xalq artistimiz Fidan xanım Hacıyevanın məktəbində məşğul olmağa başlayandan sonra buna nail oldum. Mənim müxtəlif pedaqoqlarım olub, ancaq birinci müəllimim Fidan xanımdır”, - deyə Rauf söhbətə başlayır.
Rauf universiteti bitirdikdən sonra indi təhsil aldığı Üzeyir Hacıbəyli adına Bakı Musiqi Akademiyasına daxil olub. Onun müəllimi Azərbaycanın Əməkdar artisti Fərid Əliyevdir. Vokalçının sözlərinə görə, pedaqoq ona hər şeydə kömək edir və dəstəkləyir.
“Qərara gəldim ki, musiqi ilə məşğul olmaq istəyirəm. Mən müxtəlif təşkilatlarda – banklarda, sığorta şirkətlərində işləmişəm. Lakin başa düşdüm ki, bu, mənim işim deyil. Fidan xanımın sayəsində Azərbaycan Daxili Qoşunlarının Orkestrinə solist qismində işə düzəldim. Orada üç il işlədim. Bu illər ərzində, pandemiya başlayana qədər müxtəlif müsabiqələrdə iştirak edirdim”, - deyə Rauf qeyd edir.
Əvvəlcə Rauf Azərbaycanda keçirilən beynəlxalq müsabiqələrdə iştirak edirdi. Lakin sonradan onu xaricə göndərməyə başladılar.
“Mən tez-tez Moskvada olurdum, akademik vokal üzrə müsabiqələrə qatılırdım, ariya ifa edir, yerlər tuturdum. Çıxış etdiyim sonuncu müsabiqə 2019-cu ildə Kalininqrad vilayətində, Svetloqorskda keçirilib. Bu, hərbi mahnılar üzrə beynəlxalq müsabiqə idi, orada Qran-Pri qazanmışdım. Sonra pandemiya başladı. Yalnız indi yenidən müsabiqələrə dəvətlər gəlməyə başlayıb”, - deyə Rauf bölüşür.
Vokalçı Svetloqorskda “Durnalar” və “Buhenvald harayı”nı ifa edib. Məhz bu qələbədən və Fidan Hacıyevanın xeyir-duasından sonra Rauf Azərbaycan Daxili Qoşunlarının Orkestrinə işə qəbul olundu.
Rauf deyir: “Mən hərbi mövzuya xüsusi yanaşıram. Hərbi mahnıları çox sevirəm. Onlarda böyük məna var. Mən onları oxuduqca bu mənanı hiss edirəm”.
Rauf estrada ifasını da bəyənməsindən söhbət açaraq deyir: “Mən estradaya meyilliyəm. Çünki orada insan daha sərbəstdir. Akademik vokal bünövrədir, əgər onu oxumağı bacarsan, o halda estrada da, caz da və s. ifa edə bilərsən”.
Rauf deyir: “Yaxın vaxtlarda mən Fidan xanımın təşkil edəcəyi opera festivalında çıxış edəcəyəm. Bu, Azərbaycanda ilk opera festivalıdır, bizim üçün mühüm hadisədir. Mən “Karmen” operasından toreadorun ariyasını ifa edəcəyəm. Hazırlaşıram”.
İstedadlı gəncin sözlərinə görə, operada ciddi, dramatik rollara üstünlük verir: “Toreador rolundan başqa, mən “Traviata”dan Jermonun obrazını, “Trubadur”dan isə qraf di Lunanın rolunu sevirəm”.
Vokalçı ifa etmək istədiyi opera ariyaları arasında “Sevilya bərbəri”ndən Fiqaronun kavatinasını xüsusi vurğulayır, bu ariya üzərində artıq işə başladığını deyir.
Rauf böyüyən musiqiçilər nəslinə məsləhət vermək müraciətinə karıxaraq cavab verib ki, məsləhət vermək hələ onun üçün tezdir.
“Məsləhəti Fidan xanım, Fərid müəllim... verə bilər. Mən sadəcə onu deyə bilərəm ki, əgər insan oxumaq istəyirsə, o halda öz üzərində çox işləməli və öz işini sevməlidir, pul, qonorar haqqında düşünməməlidir. Sadəcə işləyərək öz hədəfinə doğru getməlidir. Ancaq bu, çox ağır yoldur”, - deyə gənc musiqiçi vurğulayır.
Söhbətimizdə iştirak edən Fidan Hacıyeva Raufun böyük imkanlarına və parlaq gələcəyinə əmindir. Xalq artisti deyir: “O, çox istedadlı gəncdir. İstedadları istiqamətləndirmək, dəstəkləmək, böyük səhnələrə çıxarmaq lazımdır, axı onlar bizim gələcəyimizdir. Onlar çıxış etməli, özlərini göstərməlidirlər. Mən özüm bütün bu mərhələlərdən keçmişəm və məni eşidiblər. İndi isə tələbələrimə kömək edirəm. Cavanlara yol vermək lazımdır”.
Fidan xanım azərbaycanlı ifaçıların artıq özləri barədə dünyaya bəyan etmələrindən söhbət açır. “Bizim çox yaxşı ifaçılarımız var ki, onlar Azərbaycanın hüdudlarından kənarda da tanınıblar: Azər Zadə, Yusif Eyvazov, Dinara Əliyeva, Əziz Əliyev, Əvəz Abdullayev və digərləri”, - deyə Xalq artisti sadalayaraq əlavə edir: “Rauf da onlardan biri olacaq! Lakin o, çox işləməlidir. Allah onun səsini eşidəcək. Əgər Allah istedad veribsə, bu, elə-belə deyil”.
Bölmənin digər xəbərləri
