Azərbaycanın Gürcüstandakı səfirliyi vətəndaşların təxliyəsini davam etdirir
Tbilisi, 22 iyul, AZƏRTAC
Azərbaycanın Gürcüstandakı səfirliyi bu ölkədə müvəqqəti yaşayan, işləyən vətəndaşlarımızın təxliyəsini davam etdirir.
Bu sözləri AZƏRTAC-a müsahibəsində Azərbaycanın Gürcüstandakı səfirliyinin konsulu Ramel Lətifov söyləyib.
Konsul deyib ki, Azərbaycanın Gürcüstandakı səfirliyi dövlətimizin başçısının təlimatına əsasən, vətəndaşlarımızın koronavirusa yoluxmaqdan qorunması məqsədilə mütəmadi olaraq onların təxliyəsini həyata keçirir.
İyulun 21-də Gürcüstanda olan 200 nəfərədək Azərbaycan vətəndaşı Tbilisidəki laboratoriyaların birində koronavirusla əlaqədar test veriblər.
Konsulun sözlərinə görə, analizinin nəticələri qənaətbəxş olan vətəndaşlarımız iyulun 22-də səfirliyin qarşısından xüsusi ayrılmış nəqliyyat vasitələri ilə Gürcüstan-Azərbaycan sərhədindəki “Sınıq körpü” sərhəd-keçid məntəqəsinə gətiriləcəklər.
Məlumat üçün bildirək ki, vəziyyətlə əlaqədar səfirlikdə +995 577-06-50-50 nömrəli “Qaynar xətt” yaradılıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
