AZƏRBAYCANIN GÜRCÜSTANLA SƏRHƏDİNDƏ YENİ ON SƏRHƏD ZASTAVA KOMPLEKSİ İSTİFADƏYƏ VERİLMİŞDİR
Açılış mərasimlərində Azərbaycan Respublikası Prezidentinin köməkçisi general-leytenant Vahid Əliyev, Dövlət Sərhəd Xidmətinin rəisi, Sərhəd Qoşunlarının Komandanı general-leytenant Elçin Quliyev, yerli icra hakimiyyəti və hüquq mühafizə orqanlarının rəhbərləri, ictimaiyyətin nümayəndələri iştirak etmişlər.
Mərasimlərə may ayının 26-da Ağstafa rayonu ərazisindəki “Keşikçi dağ” sərhəd zastavasının açılışı ilə başlanılmışdır. Mərasimdə Dövlət Sərhəd Xidmətinin rəisi, general-leytenant Elçin Quliyev, Ağstafa Rayon İcra Hakimiyyətinin başçısı Cümşüd Musayev, ictimaiyyətin nümayəndələri çıxış etmişlər. Tədbirdə bir qrup hərbi qulluqçuya yubiley medalları və digər mükafatlar təqdim olunmuşdur.
Sonra sərhəd zastavasının xidməti otaqlarına və zabitlər üçün inşa edilmiş yaşayış binasına baxış keçirilmişdir. Tədbir iştirakçıları zastavanın xidməti ərazisindəki “Ali Baş Komandan İlham Əliyev adına zirvə”də lövhənin açılışı mərasiminə dəvət edilmişlər. Burada qonaqlara məlumat verilmişdir ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev 2005-ci il oktyabrın 12-də bu bölgədə sərhədlərimizin mühafizəsi ilə şəxsən tanış olarkən Ağstafa rayonunda ən yüksək dağlıq əraziyə qalxmış, mürəkkəb relyefə malik sərhədlərimizlə tanış olmuşdur. Sərhədçilər həmin dağın zirvəsini “Ali Baş Komandan İlham Əliyev adına zirvə” adlandırmışlar.
Tədbir səhra şəraitində fəaliyyət göstərən idarəetmə məntəqəsinin təqdimatı ilə davam etdirilmiş, mərasim iştirakçıları taktiki təlimlərə, düşmənin silahlı təxribatlarının qarşısının alınması prosesinin əyani nümayişinə baxmış, maraqlı konsert proqramını dinləmişlər.
Sonra yeni “Keşikçi qala”, “Heyvalı”, “Minbərək” sərhəd zastavalarının və “Türklər” sərhəd komendantlığının açılışları olmuşdur.
Mayın 27-də isə Zaqatala Sərhəd Dəstəsində “Poşbinə”, “Darvazbinə”, “Danaçı”, “Muğanlı” və “Kəpənəkçi” sərhəd zastavalarının rəsmi açılış mərasimləri keçirilmişdir.
Mərasimlərdə çıxış edənlər görülmüş işləri yüksək qiymətləndirmişlər. Yeni sərhəd zastavalarındakı və sərhəd komendantlığındakı zabit ailələri üçün bütün zəruri məişət avadanlığı ilə təchiz edilmiş hər biri 4 mənzilli 10 yaşayış binası, uşaq şəhərcikləri, əsgər yataqxanaları, yeməkxanalar, hamamlar, mərkəzləşdirilmiş istilik sistemləri, idman şəhərcikləri, xidmət, istirahət və məişət otaqları, xidməti heyvanların saxlanılması üçün binalar göz oxşayır.
Açılış mərasimlərində çıxış edənlər əsası ümummilli lider Heydər Əliyev tərəfindən qoyulan Dövlət Sərhəd Xidmətinin sərhədçilərin xidmət və məişət şəraitinin yaxşılaşdırılması sahəsində gördüyü ardıcıl və məqsədyönlü işləri yüksək qiymətləndirməklə, son illər dövlət sərhədlərinin daha etibarlı mühafizə edilməsinin şahidi olduqlarını bildirmişlər.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin dövlət sərhədlərimizin mühafizəsinə göstərdiyi yüksək diqqət və qayğının nəticəsində Dövlət Sərhəd Xidməti mövcud imkanlardan maksimum səmərə ilə istifadə edir. Hazırda sərhəd məntəqələrinin əksəriyyətində sərhədlərin qorunması işi tikinti-quruculuq tədbirləri ilə yanaşı aparılır. Tikinti-quruculuq işləri ölkəmizin şimal və şimal-qərb sərhədlərində daha geniş vüsət almışdır. Çünki keçmiş Sovetlər İttifaqı dövründə respublikamızın bu istiqamətlərdə heç bir sərhəd infrastrukturu olmamış və müstəqillik əldə etdikdən sonra yeni sərhəd dəstələrinin, komendantlıq və zastavaların yaradılması, lazımi xidməti binaların inşası qarşıda duran əsas vəzifələrdən biri idi. Son iki ildə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin ölkəmizin şimal və şimal-qərb sərhədlərində yerləşən Xudat, Şəmkir və Zaqatala sərhəd dəstələrində olması, şəxsi heyət ilə görüşməsi, dövlət sərhədlərimizin daha yaxşı qorunması üçün tapşırıq və məsləhətlərini verməsi bu istiqamətdə yüksək nailiyyətlərin əldə olunmasına şərait yaratmışdır.
Açılış mərasimlərində qeyd olunmuşdur ki, ölkəmizin iqtisadi qüdrəti artdıqca, dövlətimiz tərəfindən sərhədlərimizdə tikinti-quruculuq işlərinə diqqət və qayğı da artır. Sərhədçilərə lazımi xidmət və məişət şəraiti yaratmaq məqsədi ilə bir-birinin ardınca yeni qarnizonlar, komendantlıqlar və sərhəd zastavaları tikilərək istifadəyə verilir. Ötən ilin sonunda Şəki və Horadiz sərhəd dəstələrinin müasir tələblərə cavab verən qarnizon kompleksləri istifadəyə verilmişdir. Bu gün Dövlət Sərhəd Xidmətində sərhədçilər üçün onlarla yeni xidməti, yaşayış və digər təyinatlı tikintilərin inşası davam etdirilir.
