Azərbaycanın Malayziyadakı səfirliyi əhatə etdiyi ölkələrdəki həmyerlilərimizə yardım edir
Kuala Lumpur, 20 aprel, AZƏRTAC
Azərbaycanın Malayziyadakı səfirliyi COVID-19 infeksiyasının yayılması ilə bağlı əhatə etdiyi Tailand, Myanma və Bruneydə yaşayan və ya müvəqqəti səfərdə olan vətəndaşlarımıza imkanı daxilində olan bütün yardımları göstərir.
Bu barədə AZƏRTAC-ın xüsusi müxbirinə məlumat verən səfir Qaley Allahverdiyev bildirib ki, koronavirusun yayılması geniş hal aldıqdan dərhal sonra səfirlik tərəfindən əhatə olunan ölkələrdəki həmyerlilərimizlə əlaqə saxlanılıb, onlara mövcud təhlükə ilə əlaqədar operativ qaydada məlumatlar çatdırılıb, mümkün təxliyə ehtimalı nəzərə alınaraq səfirlikdə vətəndaşların məlumat bazası yenilənib. Həmçinin ilk gündən etibarən səfirlikdə Azərbaycan vətəndaşlarının müraciətləri üçün 24 saat fəaliyyət göstərən “qaynar xətt” yaradılıb. Səfirliyin internet informasiya ehtiyatları və sosial şəbəkələrdəki hesablarında mütəmadi olaraq vətəndaşlarımız üçün müvafiq bildirişlər, məlumatlar və xəbərdarlıqlar yerləşdirilib.
Səfir əlavə edib ki, xüsusilə mövcud böhranla əlaqədar bəzi aviaşirkətlər fəaliyyətini dayandırdıqdan sonra Tailand Krallığı və Malayziyadan ölkəmizə qayıtmaqda çətinliklərlə üzləşən vətəndaşlar tərəfindən səfirliyə çoxlu sayda müraciət daxil olub. Həmin şəxslərin bir qismi səfirliyin müvafiq dəstəyi ilə vətənə qayıda bilib, digər bir qisminin isə müvəqqəti olduğu ölkədə qalması tövsiyə olunaraq həmin ölkənin müvafiq dövlət qurumları tərəfindən onların viza müddətinin artırılmasına köməklik göstərilib.
Bundan əlavə, COVID-19 infeksiyası ilə mübarizə tədbirləri çərçivəsində səfirliyin akkreditə olduğu ölkələr tərəfindən atılan addımlar və mövcud karantin rejiminin tələbləri haqqında məlumatlar mütəmadi olaraq səfirliyin internet resurslarında yerləşdirilib.
Səfir, həmçinin bildirib ki, Tailand Krallığında müəyyən maddi problemlərlə üzləşən vətəndaşlarımızdan bəzilərinin həmin ölkədə fəaliyyət göstərən azərbaycanlı iş adamının dəstəyi ilə otelə yerləşdirilməsi təmin edilib.
Hazırda səfirlik XİN-in nəzdindəki işçi qrupla əlaqəli şəkildə qeyd olunan ölkələrdə müvəqqəti olan vətəndaşlarımız haqqında operativ və dolğun məlumatların əldə edilməsi, onların müraciətlərinin cavablandırılması, düzgün istiqamətdə yönləndirilməsi işini davam etdirir.
Vüqar Ağayev
AZƏRTAC-ın xüsusi müxbiri
Kuala Lumpur
Bölmənin digər xəbərləri
