Azərbaycanın milli bayramı – Respublika Günü İslamabadda qeyd olunub
İslamabad, 27 may, AZƏRTAC
Azərbaycanın Pakistandakı səfirliyində ölkəmizin milli bayramı - Respublika Günü münasibətilə rəsmi qəbul keçirilib.
AZƏRTAC xəbər verir ki, tədbirdə Pakistan Senatının sədri Məhəmməd Sadiq Sancrani, senatorlar, ölkənin nüfuzlu ictimai-siyasi xadimləri, eləcə də xarici ölkələrin Pakistandakı səfirləri iştirak ediblər.
Azərbaycan və Pakistanın dövlət himnləri səslənəndən sonra ölkəmizin Pakistandakı səfiri Əli Əlizadə qonaqları salamlayıb, müsəlman şərqində ilk demokratik respublika olan Azərbaycan Xalq Cümhuriyyətinin tarixi haqqında məlumat verib. O, Azərbaycanın beynəlxalq səviyyədə tanınmış ərazilərinin 30 ilə yaxın erməni işğalı altında olduğunu, 44 günlük Vətən müharibəsindən sonra torpaqlarımızın azad edildiyini vurğulayıb. Azərbaycan Xalq Cümhuriyyətinin varisi olan Azərbaycanın 1991-ci ildə öz müstəqilliyini yenidən bərpa etdiyini bildirən səfir, xalqımızın bu illər boyu Azərbaycan torpaqlarını erməni işğalından qurtarmaq və regionda sülhü və ədaləti bərpa etmək arzusu ilə yaşadığını qeyd edib.
Ə.Əlizadə əlavə edib ki, Cümhuriyyətin 1918-ci il mayın 28-də yaradılması Azərbaycan xalqı üçün tarixi bir hadisə idisə, 2020-ci ildə müasir və müstəqil Azərbaycanın ərazi bütövlüyünün bərpası Azərbaycan xalqı üçün şərəfli Qələbə və tarixi nailiyyətdir. O, 30 il davam edən münaqişədə ölkəmizin erməni təcavüzündən əziyyət çəkdiyini, eləcə də Azərbaycanın münaqişə ilə bağlı bütün beynəlxalq tədbir və forumlarda əsl həqiqətləri dünya ictimaiyyətinə çatdırdığını vurğulayıb. Səfir, bütün aparıcı beynəlxalq təşkilatların Azərbaycanın ərazi bütövlüyünü tanımasına, dəstəkləməsinə, eləcə də erməni qoşunlarının Azərbaycan ərazilərindən çıxarılmasını tələb etməsinə baxmayaraq, Ermənistanın daima münaqişənin həllinə qeyri-konstruktiv yanaşdığını qeyd edən diplomat sonda Ermənistanın təxribatçı addımlarının, bəyanatlarının və təcavüzkar əməllərinin bütün danışıqlara son qoyduğunu və müharibəni qaçılmaz etdiyini söyləyib. Ə.Əlizadə Müzəffər Ali Baş Komandanının qətiyyətli rəhbərliyi, Azərbaycan Ordusunun peşəkarlığı və qəhrəmanlığı, eləcə də yüksək milli ruhu və gücü sayəsində ölkəmizin öz tarixi missiyasını yerinə yetirərək Ermənistanı məğlub etdiyini bildirib.
Səfir Azərbaycanın hazırda dünyanın sürətlə inkişaf edən ölkələrindən biri olduğunu, Prezident İlham Əliyevin rəhbərliyi ilə ölkəmizin dinamik iqtisadi yüksəlişini və azad edilmiş ərazilərin də tezliklə Azərbaycanın inkişaf etmiş bölgələrindən birinə çevriləcəyini bildirib. Vətən müharibəsi zamanı daima ölkəmizlə çiyin-çiyinə dayanan və Azərbaycanın özünümüdafiə hüququnu dəstəkləyən qardaş Pakistana təşəkkürünü çatdıran diplomat iqtisadi, siyasi, hərbi, müdafiə, təhlükəsizlik, eləcə də enerji sahələrində Azərbaycan - Pakistan əlaqələrinin koronavirus pandemiyasına baxmayaraq yüksələn xətlə davam etdiyini diqqətə çatdırıb. Heydər Əliyev Fondunun humanitar-sosial tədbirlərinin pandemiya dövründə də Pakistanda həyata keçirildiyini bildirən səfir, yaxın zamanda ölkələrimiz arasında birbaşa uçuşların da başlayacağını bildirib.
Daha sonra səfir Ə.Əlizadə Azərbaycan - Pakistan əlaqələrinin inkişafında və gücləndirilməsində göstərdiyi xidmətlərinə görə Pakistan Senatının sədri Məhəmməd Sadiq Sancraninin Azərbaycan Xarici İşlər Nazirliyi tərəfindən "Azərbaycan Respublikası diplomatik xidmət orqanlarının 100 illiyi" yubiley medalı ilə təltif olunduğunu bildirib və həmin medalı Senatın sədrinə təqdim edib.
Tədbirdə çıxış edən Məhəmməd Sadiq Sancrani bu il Azərbaycanda Respublika Gününün 103-cü ildönümünün qeyd edildiyini bildirərək bu əlamətdar bayram münasibətilə Azərbaycan rəhbərliyini, hökumətini, parlamenti və xalqını təbrik edib. Azərbaycan və Pakistan arasındakı səmimi qardaşlıq münasibətlərdən söhbət açan sədr, ölkələrimiz arasındakı strateji əlaqələrin bütün sahələrdə inkişaf etməsindən məmnunluğunu dilə gətirib və iqtisadi-ticari əlaqələrin daha da genişləndirilməsinin vacibliyindən danışıb, Pakistanın hər zaman Azərbaycanın yanında olacağını bildirib. Məhəmməd Sadiq Sancrani Azərbaycanın Kəşmir məsələsində Pakistana göstərdiyi dəstəyi yüksək qiymətləndirib və bu yaxınlarda Azərbaycan Milli Məclisinin sədrinin başçılıq etdiyi nümayəndə heyətinin Pakistana səfər edəcəyini xatırladaraq bu səfərin ölkələrimiz arasındakı münasibətlərin daha da möhkəmlənməsinə töhfə verəcəyini diqqətə çatdırıb. Məhəmməd Sadiq Sancrani "Azərbaycan Respublikası diplomatik xidmət orqanlarının 100 illiyi" medalı ilə təltif olunmasından məmnunluğunu ifadə edib, dəyərli təltifə görə Azərbaycan hökumətinə minnətdarlığını bildirib.
Tədbirin rəsmi hissəsindən sonra Azərbaycanın üçrəngli bayrağının əks olunduğu rəmzi tort kəsilib.
Tədbir boyu Azərbaycanın tarixi, mədəniyyəti, iqtisadiyyatı, turizm potensialı, eləcə də Vətən müharibəsindəki Qələbəsini əks etdirən müxtəlif videoçarxlar nümayiş etdirilib, Azərbaycan milli musiqisi və xalq mahnıları səsləndirilib.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
