Martın 28-də Milli Təhlükəsizlik Nazirliyində respublikamızda təhlükəsizlik orqanları yaradılmasının 84-cü ildönümü münasibətilə təntənəli yığıncaq keçirilmişdir.

Yığıncaqdan əvvəl nazirliyin şəxsi heyəti Şəhidlər xiyabanını ziyarət etmiş, vətənimizin müstəqilliyi və ərazi bütövlüyü uğrunda canlarından keçmiş igid oğul və qızlarımızın məzarları üzərinə tər çiçəklər qoymuşlar.

Təntənəli yığıncaq Azərbaycanın dövlət himni ilə açılmışdır. Ölkəmizin azadlığı, müstəqilliyi və ərazi bütövlüyü uğrunda həyatını qurban vermiş əməkdaşların xatirəsi bir dəqiqəlik sükutla yad olunmuşdur. Milli təhlükəsizlik naziri, general-polkovnik Namiq Abbasov Azərbaycan Prezidenti, Ali Baş Komandan Heydər Əliyevin nazirliyin şəxsi heyətinə təbriklərini və xoş arzularını çatdırmışdır.

Təntənəli yığıncaqda milli təhlükəsizlik nazirinin müavini, polkovnik Fuad İskəndərov məruzə etdi. O dedi ki, yeddinci ildir ki, möhtərəm Prezidentimiz Heydər Əliyevin Sərəncamına əsasən 28 mart gününü peşə bayramı kimi qeyd edir, təhlükəsizlik orqanlarının keçdiyi uzun, heç də həmişə hamar olmayan yola nəzər salır, fəaliyyətimizə obyektiv qiymət verməyə çalışır, ziddiyyətlərlə dolu tariximizin şanlı ənənələrinə ehtiram və sədaqətimizi bir daha bəyan edirik. Qüdrətli sərkərdə Heydər Əliyev məktəbinin ənənələrini davam etdirən Milli Təhlükəsizlik Nazirliyi öz üzərinə düşən vəzifələri şərəflə yerinə yetirərək ölkəmizin suverenliyinin, xarici və daxili təhlükəsizliyinin qorunmasında, respublikamızın sabit və dinamik inkişafında mühüm rol oynayır.

Natiq bildirdi ki, əvvəlki məlum hadisələr zamanı olduğu kimi, Azərbaycanda hakimiyyəti qeyri-qanuni yolla zəbt etmək məqsədi güdən, xarici ölkələrdə sığınacaq tapmış düşmən qüvvələr tərəfindən 2001-ci ilin oktyabr-noyabr aylarında hazırlanmış və həyata keçirilməsi nəzərdə tutulmuş dövlət çevrilişi cəhdinin qarşısı Milli Təhlükəsiklik Nazirliyinin keçirdiyi tədbirlər nəticəsində hazırlıq mərhələsində alınmış, cinayətin icraçılarından 5 nəfəri müxtəlif müddətlərə azadlıqdan məhrum edilmiş, 5 nəfər barəsində isə məhkəmə prosesi davam edir. Xarici xüsusi xidmət orqanlarının respublikada apardıqları kəşfiyyat-pozuculuq fəaliyyətlərinin qarşısının alınması istiqamətində keçirilən tədbirlər zamanı hələ SSRİ Müdafiə Nazirliyi Baş Kəşfiyyat İdarəsi tərəfindən əməkdaşlığa cəlb olunmuş, Azərbaycanın ictimai-siyasi durumuna və infrastrukturunun mühüm sahələrinə dair məlumatların toplanılması istiqamətində sonradan Rusiyanın müvafiq məxfi strukturu ilə əlaqələri kəsməyən 3 nəfər Azərbaycan vətəndaşı məhkəmənin qərarı ilə müxtəlif müddətlərə azadlıqdan məhrum edilmişdir.

Məruzəçi bildirdi ki, nazirliyin qarşısında duran başlıca vəzifələrdən biri də Ermənistan tərəfindən Azərbaycan əleyhinə yeridilən ilhaqçılıq siyasətinə və onun həyata keçirilməsi üçün seçilən müxtəlif məkrli planların qarşısının alınmasına yönəlmiş mübarizədən ibarətdir. 2000-2002-ci illərdə ölkənin şimal-qərb bölgəsində törədilmiş terror-təxribat aktlarının araşdırılması ilə əlaqədar respublikanın hüquq-mühafizə orqanlarının birgə apardıqları istintaq-əməliyyat tədbirləri zamanı cinayətkarların Ermənistanın xüsusi xidmət orqanları ilə sıx əlaqələr saxlaması, onlar tərəfindən dəstəklənməsi sübuta yetirilmişdir. Keçirilmiş tədbirlər nəticəsində 2002-ci il iyulun 13-də cinayətkar qrupun rəhbərlərindən biri olan H.Maqomedov Balakən rayonu ərazisində silahlı müqavimət göstərərkən qətlə yetirilmiş, digər rəhbəri Buşdiyev də daxil olmaqla 24 nəfər konkret cinayət əməllərinə görə həbs olunmuş, hazırda 16 nəfər barəsində axtarış tədbirləri həyata keçirilir.

Natiq beynəlxalq terrorizmə, separatizmə, dini ekstremizmə və mütəşəkkil cinayətkarlığın digər təzahürlərinə qarşı mübarizədə 23 xarici dövlətin 32 xüsusi xidmət orqanı ilə əməkdaşlıq məsələlərindən danışdı. Vurğuladı ki, qloballaşma dövründə Azərbaycanın beynəlxalq antiterror koalisiyasındakı fəallığı güclənməkdədir. Terrorçuların ölkəmizə daxil olmalarına, həmçinin respublikamızın ərazisindən digər dövlətlərə qarşı mümkün terror məqsədləri üçün istifadə niyyətlərinə yol verilməməsi istiqamətində keçirilmiş tədbirlər nəticəsində «cihad»a qoşulmaq adı altında Gürcüstanın Pankisi dərəsindəki düşərgələrdə dini, hərbi, eləcə də xüsusi təlim keçmiş, hərbi əməliyyatlarda iştirak etmiş 60-dan çox Azərbaycan vətəndaşı müəyyən edilmiş, 30 nəfərdən artıq şəxs məsuliyyətə cəlb olunmuşdur. «Ceyşullah» və «Hizbut-Təhrir» terrorçu təşkilatlarının respublikada teokratik üsul-idarə yaratmaq məqsədi ilə mövcud ictimai-siyasi sabitliyin pozulması üçün Qərb ölkələrinin səfirliklərinə və digər nümayəndəliklərinə qarşı planlaşdırılan terror-təxribat niyyətləri aşkarlanmış, bu qurumların üzvlərinin törətdikləri digər cinayətlərin üstü açılmış, onlara məxsus külli miqdarda silah-sursat və terror vasitələri götürülmüşdür. Terrorçu təşkilatların 19 üzvü müxtəlif müddətlərə azadlıqdan məhrum edilmişdir.

Natiq çıxışında telekommunikasiya və elektron informasiya texnologiyalarının əməliyyat-axtarış fəaliyyətinin təminatı üçün tətbiqinin optimal variantlarının müəyyənləşdirilməsinə, müvafiq rabitə şəbəkələrinin təkmilləşdirilməsinə xüsusi diqqət yetirməklə yanaşı, informasiya təhlükəsizliyi məsələlərini də qarşıdakı dövrün təxirəsalınmaz vəzifələri sırasına daxil etdi.

Məruzəçi dedi ki, Milli Təhlükəsizlik Nazirliyinin əməkdaşları Azərbaycanın ərazi bütövlüyünün, sərhədlərinin toxunulmazlığının daha da etibarlı qorunması, təhlükəsizliyinin təmin olunması, ölkəmizdə sabitliyin, əmin-amanlığın qorunub saxlanması üçün bundan sonra da bütün qüvvəsini sərf edəcək, xarici və daxili qüvvələrin respublikamızda pozuculuq fəaliyyətinə sipər olacaqlar.

Təntənəli yığıncaqda Azərbaycan Respublikası Prezidentinin Fərmanı ilə təltif olunmuş Milli Təhlükəsizlik Naziriliyinin bir qrup hərbi qulluqçusuna dövlət mükafatları təqdim edildi.

Xidmətdə fərqlənən bir qrup əməkdaşa milli təhlükəsizlik nazirinin əmri ilə yeni hərbi rütbələr, nazirliyin fəxri fərmanı təqdim edildi, təşəkkür elan olundu.

Sonra milli təhlükəsizlik orqanlarının 85 illiyi ilə əlaqədar tanınmış tele-jurnalist, mərhum Samir Əsgərxanov adına mükafatın təsis olunmasına dair milli təhlükəsizlik nazirinin əmri oxundu. Müsabiqənin qaydaları və ölkənin ictimai xadimlərindən, elm, jurnalistika sahəsində tanınmış nümayəndələrdən ibarət münsiflər heyətinin üzvləri elan olundu.

Samir Əsgərxanovun atası Eldar Əsgərxanov çıxış edərək, oğlunun yaradıcılığına verilən qiymətə və xatirəsinə göstərilən yüksək ehtirama görə nazirliyin rəhbərliyinə, təntənəli yığıncağın bütün iştirakçılarına dərin minnətdarlığını bildirdi.

Azərbaycan milli təhlükəsizlik orqanlarının 84-cü ildönümünə həsr olunmuş təntənəli yığıncağa nazir, general-polkovnik Namiq Abbasov yekun vurdu.

Təntənəli yığıncaqda Azərbaycan Respublikasının Prezidenti, Ali Baş Komandan Heydər Əliyevə müraciət qəbul olundu.