Məleykə Tağızadə: Gənclər şəhərlərin gələcəyinin həmmüəllifidir
Bakı, 16 may, AZƏRTAC
Şəhərlərin gələcəyi artıq yalnız infrastruktur layihələri ilə müəyyən edilmir, bu gələcək şəhərlərdə yaşayan insanların, xüsusilə də gənclərin iştirakı ilə formalaşır.
AZƏRTAC xəbər verir ki, bu fikirləri BMT-nin İnsan Məskənləri Proqramında (UN-Habitat) vəkillik və layihələr üzrə baş müşaviri Məleykə Tağızadə Türk Dövlətləri Təşkilatına üzv ölkələrin qeyri-hökumət təşkilatlarının II Əməkdaşlıq Forumunda çıxışı zamanı səsləndirib.
Onun sözlərinə görə, Bakı sabahdan etibarən BMT-nin Ümumdünya Şəhərsalma Forumunun 13-cü Sessiyasına (WUF13) ev sahibliyi edəcək və bu tədbir şəhərlərin gələcəyinə dair ən böyük qlobal platformalardan biridir.
“Bu proses bizim üçün yalnız beynəlxalq tədbir deyil, uzunmüddətli urban transformasiya fürsətidir. Məhz buna görə də UN-Habitat və tərəfdaşlarımızla birlikdə Azərbaycan Şəhərsalma Kampaniyasına başlamışıq. Kampaniyanın əsas məqsədlərindən biri gəncləri urban gündəliyinin mərkəzinə gətirməkdir. Son aylarda Azərbaycanın müxtəlif regionlarında gənclərlə şəhər mühiti, inklüzivlik, ictimai məkanlar, iqlim dayanıqlılığı və şəhərlərdə iştirakçılıq mövzularında geniş müzakirələri aparılıb. Gənclər yalnız iştirakçı deyil, təşəbbüs irəli sürən, tədbirlər təşkil edən və həll yolları təklif edən tərəfdaş kimi bu prosesə qoşulurlar. Azərbaycan Şəhərsalma Kampaniyası çərçivəsində gənclərlə şəhər dialoqları təşkil olunub, universitetlər və gənclər təşkilatları ilə əməkdaşlıqlar qurulub, urban məsələləri ilk dəfə bir çox gənc platformalarında aktiv şəkildə müzakirə edilməyə başlanıb. Əlçatanlıq, inklüzivlik və dayanıqlı şəhərlər mövzusunda gənclərin təşəbbüsləri dəstəklənib. Ən vacibi isə odur ki, biz gəncləri şəhərlərin gələcəyi haqqında sadəcə dinləmirik, onları bu gələcəyin həmmüəllifi kimi görürük”, – deyə o vurğulayıb.
UN-Habitat rəsmisi bildirib ki, Türk dünyasının gəncləri arasında əməkdaşlıq şəhərsalma çağırışlarının həlli baxımından xüsusi əhəmiyyət daşıyır: “İqlim çağırışları, urban bərabərsizlik, mənzil əlçatanlığı, gənclərin məşğulluğu, ictimai məkanların keyfiyyəti və inklüzivlik kimi problemlər bizim şəhərlərimiz üçün ortaq məsələlərdir. Bu problemlərin həlli üçün regional əməkdaşlıq, təcrübə paylaşımı və ortaq gənclər təşəbbüsləri böyük potensiala malikdir. Gələcəyin yaşanıla bilən şəhərləri yalnız dövlətlər tərəfindən deyil, fəal gənclər, vətəndaş cəmiyyəti və icmaların birgə fəaliyyəti ilə qurulacaq”.
Bölmənin digər xəbərləri
