AZƏRBAYCANIN QADIN GÜLƏŞÇİSİ QİTƏ ÇEMPİONATININ FİNALINA YÜKSƏLMİŞDİR
AZƏRTAC xəbər verir ki, aprelin 4-də Finlandiyada keçirilən güləş üzrə Avropa çempionatı qadın güləşçilərin mübarizəsi ilə davam etdirilmişdir. Bu gün Azərbaycanı təmsil edən 3 idmançı yarışlara qatılmışdır.
Bakıda keçirilmiş dünya çempionatında Pekin Olimpiadasına lisenziyanı təmin etmiş Mariya Stadnik (48 kq) qitə birinciliyində uğurlu çıxış edərək finala vəziqə qazanmışdır. Birinci yer uğrunda son qarşılaşmada həmyerlimizin rəqibi fransalı Vanessa Bubriem olacaqdır.
Digər idmançımız Olesya Zamulanın (63 kq) mübarizəsi ürəkaçan olmasa da onun rəqibi finaladək irəlilədiyindən, idmançımız bürünc medal uğrunda görüşə qatılacaqdır.
Sonuncu idmançımız Zümrüd Qurbanhacıyeva (72 kq) isə Avropa çempionatında həm medal, həm də lisenziya qazanmaq şansını itirmişdir.
Xatırladaq ki, bu gün qadın güləşçilərin yarışı başa çatacaqdır.
Bölmənin digər xəbərləri
