AZƏRBAYCANIN QARSDAKI BAŞ KONSULUNA FƏXRİ DİPLOM TƏQDİM OLUNMUŞDUR
AZƏRTAC-ın xüsusi müxbiri xəbər verir ki, Yeni Azərbaycan Yardımlaşma və Mədəniyyət Dərnəyinin Qars şöbəsinin sədri professor Hacali Nəcəfoğlu Türkiyə-Azərbaycan əlaqələrinə və Qars vilayətinin inkişafına verdiyi töhfələrə görə ölkəmizin buradakı baş konsulu Həsən Zeynalova fəxri diplom təqdim etmişdir.
Professor Hacali Nəcəfoğlu bildirmişdir ki, ulu öndər Heydər Əliyev 2002-ci ildə Qarsa səfəri zamanı burada Azərbaycanın diplomatik nümayəndəliyinin açılmasının zəruriliyini bildirmişdi. Dahi şəxsiyyətin tövsiyəsini yerinə yetriən Prezident İlham Əliyevin 2004-cü ildə imzaladığı Sərəncama əsasən açılan baş konsulluq fəaliyyətə başladığı ilk gündən Azərbaycanın Türkiyənin şərq vilayətləri ilə iqtisadi və mədəni əlaqələrinin qurulması və möhkəmləndirilməsi sahəsində mühüm işlər görmüşdür. Baş konsulluğun ölkəmiz haqqında həqiqətlərin bu bölgədəki insanlara çatdırılmasında səylərini xüsusi olaraq vurğulayan dərnək sədri onu da əlavə etmişdir ki, son illər aparılan məqsədyönlü işlərin nəticəsində Bakı-Qars təyyarə reyslərinin açılması, Bakı-Tbilisi-Qars dəmir yolu layihəsi, Qarsdakı Qafqaz Universitetinin Azərbaycandakı ali təhsil ocaqları ilə sıx əməkdaşlığı, bu universitetdə Azərbaycan dili və ədəbiyyatının tədris olunması kimi mühüm layihələr həyata keçirilmişdir.
Türkiyənin şərq vilayətlərini Azərbaycana açılan qapı kimi dəyərləndirən Həsən Zeynalov fəxri diploma görə dərnək rəhbərliyinə təşəkkür etmiş, baş konsulluq bundan sonra da qardaş ölkələrimiz arasında əlaqələrin möhkəmləndirilməsinə xidmət edəcəyini demişdir.
