AZƏRBAYCANIN ŞƏHƏR, QƏSƏBƏ VƏ KƏND BƏLƏDİYYƏLƏRİNİN MİLLİ ASSOSİASİYALARININ YARADILMASI ÜZRƏ TƏŞKİLATİ İŞLƏRƏ BAŞLANMIŞDIR
İclasın gündəliyinə Azərbaycanda ayrı-ayrılıqda şəhər, qəsəbə və kənd bələdiyyələrinin milli assosiasiyalarının yaradılması məqsədi ilə işçi qruplarının təşkil olunması məsələsi salınmışdı.
Avropa Şurası Yerli və Regional Hakimiyyətlər Konqresinin dəstəyi ilə formalaşdırılmış 25 nəfərdən ibarət işçi qrupunun rəhbəri, Gəncə şəhəri Kəpəz bələdiyyəsinin sədri Tair Quliyev iclası giriş sözü ilə açaraq bildirdi ki, son 2 həftə ərzində respublikamızın bütün şəhər və rayonlarında bələdiyyə sədrlərinin şura iclasları keçirilmiş və təqdim olunmuş protokollarda şəhər, qəsəbə və kənd bələdiyyələrinin milli assosiasiyalarının yaradılması təklifi müdafiə olunmuşdur.
İclasda çıxış edənlər ümummilli liderimiz Heydər Əliyevin rəhbərliyi ilə işlənib hazırlanmış, ümumxalq səsverməsi-referendum yolu ilə qəbul edilmiş Azərbaycan Konstitusiyasında yerli özünüidarəetmə orqanı olan bələdiyyələrin təşkili, statusu, müstəqilliyinin təminatı ilə bağlı xüsusi müddəaların təsbit edildiyini, sonrakı mərhələlərdə müvafiq qanunvericilik bazasının yaradıldığını vurğuladılar. Bildirdilər ki, əsası müstəqil dövlətimizin qurucusu Heydər Əliyev tərəfindən qoyulmuş siyasi xəttin Azərbaycan Prezidenti İlham Əliyev tərəfindən uğurla davam və inkişaf etdirilməsinin nəticəsi olaraq, hazırda ölkəmiz sivil dünya birliyində öz layiqli yerini tutmuşdur, adambaşına düşən ümumi daxili məhsul istehsalının, xarici sərmayə qoyuluşunun həcminə görə, respublikamız ön yerdə gedir, əhalinin həyat səviyyəsi ilbəil yüksəlir, Azərbaycan dinamik inkişaf edir. Ölkədə ictimai-siyasi sabitliyə, demokratiyanın inkişafına, iqtisadiyyatın bütün sahələrində tərəqqisinə nail olunmuş, sosial problemlərin həllində mühüm irəliləyişlər əldə edilmişdir. Bütün bu uğurlarda 1999-cu ildən formalaşmağa başlamış bələdiyyə institutu da özünəməxsus yer tutmaqdadır. Bələdiyyələr nüfuzlu beynəlxalq və regional təşkilatların qabaqcıl təcrübəsini öyrənir, ondan səmərəli istifadə edərək inamla irəliyə addımlayır. Bələdiyyələr Avropa Şurasının tövsiyə etdiyi konsepsiyaya əsasən həqiqi demokratik idarəetmə sisteminin yaradılması imkanını əldə edərək, hazırda yeni inkişaf mərhələsinə qədəm qoymuşlar.
Açıq fikir mübadiləsi şəraitində keçən müzakirələrdə bələdiyyələrin qarşılıqlı əlaqəsini təmin edən, dövlət orqanları ilə münasibətlərini möhkəmləndirən qurumların yaradılmasına ciddi ehtiyac olduğu bildirildi, şəhər, qəsəbə və kənd bələdiyyələrinin milli assosiasiyalarının təşkili məqsədəuyğun hesab edildi, bu istiqamətdə müvafiq tədbirlərin həyata keçirilməsi məqsədilə 3 işçi qrupunun formalaşdırılması qərara alındı.
Toplantı iştirakçılarının təklifi ilə şəhər bələdiyyələrinin milli assosiasiyasının yaradılması məqsədilə 25 nəfərdən ibarət işçi qrupu müəyyən edildi. Kəpəz bələdiyyəsinin sədri Tair Quliyev işçi qrupunun rəhbəri, Sumqayıt bələdiyyəsinin sədri Əbülfəz Babayev, Şəki bələdiyyəsinin sədri Gülnaz Salamova, Naftalan bələdiyyəsinin sədri Zöhrab Adıgözəlov onun müavinləri seçildilər.
Qəsəbə bələdiyyələrinin milli assosiasiyasının yaradılması məqsədilə 23 nəfərdən ibarət işçi qrupu müəyyən olundu. Binəqədi rayonu Biləcəri bələdiyyəsinin sədri İlham Xəlilov işçi qrupunun rəhbəri, Abşeron rayonu Xırdalan bələdiyyəsinin sədri Eldar Əhmədov, Səbail rayonu Badamdar bələdiyyəsinin sədri Bəybala Hüseynov müavin seçildilər.
Həmçinin, kənd bələdiyyələrinin milli assosiasiyasının yaradılması məqsədilə 27 nəfərdən ibarət işçi qrupu müəyyən edildi, Ağdaş rayonu Orta Ləki bələdiyyəsinin sədri Faiq Mahmudov işçi qrupunun rəhbəri, İmişli rayonu Mürsəlli bələdiyyəsinin sədri Elçin Quliyev, Dəvəçi rayonu Əmirxanlı bələdiyyəsinin sədri Rəsul Məmmədov, Samux rayonu Sərkər bələdiyyəsinin sədri Şəmistan Yusifov müavin seçildilər.
İşçi qruplarının rəhbərləri çıxış edərək toplantı iştirakçılarını əmin etdilər ki, onlar bələdiyyələrin milli assosiasiyalarınin yaradılması üçün bütün qüvvə və bacarıqlarını sərf edəcək, Avropanın qabaqcıl ölkələrinin təcrübəsini öyrənməklə, müasir tələblərə cavab verən işlək qurumların formalaşdırılmasına nail olacaqlar.
Qərara alındı ki, işçi qrupları bu il sentyabrın 15-dək Azərbaycanda şəhər, qəsəbə və kənd bələdiyyələrinin milli assosiasiyalarının nizamnamə layihələrini hazırlasın və təsis toplantılarına nümayəndəlik kvotası müəyyən etsinlər.
İclasın iştirakçıları Azərbaycan Respublikasının Prezidenti İlham Əliyevə müraciət qəbul etdilər. Müraciətdə ölkəmizdə getdikcə daha geniş vüsət almaqda olan quruculuq-abadlıq, sosial-iqtisadi yüksəliş işlərində bələdiyyələrin rolunun artdığı, sıralarında 22 minə yaxın üzvü birləşdirən yerli özünüidarəetmə orqanlarının dövlətimizin başçısının apardığı daxili və xarici siyasəti daim dəstəklədikləri və müdafiə etdikləri vurğulanır. İclasın iştirakçıları ümid edirlər ki, bütün mütərəqqi fikirlərin müdafiəçisi kimi, dövlətimizin başçısı ölkəmizdə bələdiyyələrin yeni inkişaf strategiyasına istiqamət verərək, milli assosiasiyaların yaradılmasına dəstək olacaqdır. Azərbaycanın inkişafı naminə apardığı uğurlu siyasi xəttin həyata keçirilməsində, ölkəmizin daha da möhkəmlənməsi və qüdrətlənməsi naminə özünüidarəetmə orqanları qarşısında duran vəzifələrin yerinə yetirilməsində bələdiyyələr səylərini əsirgəməyəcək və göstərilən etimadı var qüvvə ilə doğruldacaqlar.
İclasın iştirakçıları, eyni zamanda, Avropa Şurası Yerli və Regional Hakimiyyətlər Konqresinə də müraciət ünvanladılar. Müraciətdə Konqresin tövsiyələrini nəzərə alaraq, Azərbaycanda ayrı-ayrılıqda şəhər, qəsəbə və kənd bələdiyyələrinin milli assosiasiyalarının yaradılmasının məqsədəuyğun hesab edildiyi, həmin assosiasiyaların təsis toplantılarının hazırlanması məqsədi ilə müvafiq işlərin görüldüyü bildirilmişdir.
İclasda Azərbaycan Respublikası Prezidentinin İcra Aparatının regional idarəetmə və yerli özünüidarəetmə orqanları ilə iş şöbəsinin bələdiyyələrlə iş sektorunun müdiri Ramiq Həşimov iştirak etmişdir.
Bölmənin digər xəbərləri
