AZƏRBAYCANIN XARİCİ İŞLƏR NAZİRİ YUNESKO-NUN BAŞ KONFRANSININ 33-CÜ SESSİYASINDA ÇIXIŞ ETMİŞDİR
Elə həmin gün nazir sessiyada çıxış edərək təşkilatın 60-cı ildönümünün qeyd olunduğu bir vaxtda belə bir sessiyanın keçirilməsinin əhəmiyyətini vurğulamış, qurumun baş direktoru Koişiro Matsuuranın bu yaxınlarda Azərbaycana səfərini xatırlatmış, onun Azərbaycan Prezidenti İlham Əliyevlə imzaladıqları birgə rəsmi sənədin əhəmiyyətini diqqətə çatdırmış və ölkəmizdə təhsil sisteminin təkmilləşdirilməsinin zəruriliyi ilə bağlı fikirlərini söyləmişdir.
Çıxışında sessiya iştirakçılarının diqqətini əsasən uşaqların və Ermənistan-Azərbaycan, Dağlıq Qarabağ münaqişəsinin qurbanı olmuş qaçqın və məcburi köçkünlərin təhsil ehtiyaclarına yönəldən nazir Məmmədyarov, respublikamızın işğal olunmuş ərazilərində dağıdılmış mədəniyyət obyektləri barədə ətraflı məlumat vermiş və ölkəmizə dəymiş maddi və mənəvi zərərin aradan qaldırılmasının zəruriliyini vurğulamışdır. Nazir Azərbaycan ilə YUNESKO arasında respublikamızda təhsil sisteminin təkmilləşdirilməsi məqsədi ilə inkişaf layihələrinin həyata keçirilməsinə yönəlmiş birgə proqramın hazırlanması haqda, bu beynəlxalq qurumun baş direktoru ilə imzalanmış Əməkdaşlıq haqda Anlaşma Memorandumunu sessiya iştirakçılarının diqqətinə çatdırmışdır.
Nazir çıxışında Azərbaycan Prezidentinin təhsilə göstərdiyi qayğıdan, Azərbaycanın muğam sənətinə YUNESKO-da verilən yüksək qiymətdən danışmış, xoşməramlı səfir Mehriban xanım Əliyevanın ölkəmizdə mədəni irsin qorunması və təbliği sahəsindəki xidmətlərindən bəhs etmişdir.
Sessiyadakı çıxışını Azərbaycanın məşhur kimyaçı alimi Yusif Məmmədəliyevin 100 illik yubileyinin bu il sentyabrın 13-də YUNESKO səviyyəsində keçirilməsinə göstərdiyi dəstəyə görə minnətdarlığını bildirməklə başa çatdıran nazir E.Məmmədyarov həmin gün YUNESKO-nun baş direktoru K.Matsuura ilə görüşmüşdür.
Görüşdə K.Matsuura bu ilin avqustunda Bakıya səfərinin onda böyük təəssürat oyatdığını bildirmiş, səmimi salamlarını Azərbaycan Mədəniyyətinin Dostları Fondunun prezidenti, YUNESKO-nun xoşməramlı səfiri Mehriban xanım Əliyevaya çatdırmağı xahiş etmişdir.
Nazir qeyri-maddi və maddi irsin qorunması sahəsində Azərbaycan ilə YUNESKO arasında mövcud əməkdaşlığı yüksək qiymətləndirərək, bu işin daha da genişlənməsinin vacibliyini vurğulamışdır. Eyni zamanda, Azərbaycan muğamının YUNESKO-nun Bəşəriyyətin şifahi və qeyri-maddi şah əsərləri siyahısına salınmasından məmnun olduğunu bildirən nazir, həmçinin İçərişəhər memarlıq kompleksinin qorunması, Qobustan qoruğunun və Hirkan meşələrinin Dünya İrsi siyahısına tezliklə daxil edilməsi və digər məsələlərdə YUNESKO ilə əməkdaşlığın davam etdirilməsində Azərbaycanın maraqlı olduğunu xüsusi vurğulamışdır. Tərəflər YUNESKO-nun xoşməramlı səfiri Mehriban xanım Əliyevanın bu sahədə gördüyü işləri yüksək qiymətləndirmişlər.
Azərbaycanla təhsil sistemində islahatların aparılması sahəsində əməkdaşlığa xüsusi önəm verildiyini diqqətə çatdıran K.Matsuura respublikamıza bu sahədə yardımın davam etdiriləcəyini bildirmişdir.
Bölmənin digər xəbərləri
