“AZƏRİLMƏ”DƏ TOXUNAN XALÇALARIN GÖZƏLLİYİ DAĞISTANLI QONAQLARDA XOŞ TƏƏSSÜRAT OYATMIŞDIR
AZƏRTAC xəbər verir ki, Rusiya Federasiyası Dağıstan Respublikasının Prezidenti Muxu Əliyevin başçılıq etdiyi nümayəndə heyəti iyunun 27-də “Azərilmə” Məhdud Məsuliyyətli Cəmiyyətində olmuşlar. Qonaqlara məlumat verilmişdir ki, xalçaçılıq Azərbaycan xalqının ən qədim el sənətlərindən biridir, xalı və xalçalarımız dünyanın bir çox muzeylərinin nadir eksponatlarından sayılır.
1996-cı ildən fəaliyyətə başlayan bu müəssisənin məhsulları ABŞ, Almaniya, Avstriya, İngiltərə, İtaliya, Yaponiya və Rusiyada keçirilən satış-sərgilərdə xüsusi mükafatlara layiq görülmüşdür. Naxışların incəliyi və ilmələrinin yüksək sıxlığı, tərtibatın orijinallığı ilə seçilən xalçaların istehsal prosesi beynəlxalq standartlara tam cavab verir. İplər ancaq təbii rənglərlə boyanır, eskizlər milli naxış və çeşnilərdən götürülür.
Qonaqlar toxuma prosesini maraqla izləmiş, qalereyanın açıq səma altında nümayiş etdirilən zəngin eksponatlarına baxmışlar.
“Azərbaycan xalçası qalereyası”nda nümayiş etdirilən “Azərbaycanın tarixi xalçaçılıq məktəbləri” ipək xalı-xəritəsi də yüksək bədii tərtibatı ilə qonaqları məftun etmişdir.
Azərbaycan xalçalarının gözəlliyinə valeh olduğunu bir daha vurğulayan Dağıstan Prezidenti Muxu Əliyev, ölkəmizdə bu qədim el sənətinin belə məhəbbətlə yaşadılmasını yüksək qiymətləndirmişdir.
Dağıstan Prezidenti “Azərilmə”nin xatirə kitabına yazdığı ürək sözlərində də Azərbaycan xalçalarının gözəlliyinə heyran olduğunu, xalça qalereyasından zəngin təəssürat aldığını bildirmişdir.
######
Bölmənin digər xəbərləri
