“Azəriqaz” təbii qazdan qeyri-qanuni istifadə hallarına qarşı tədbirlər görür
Bakı, 9 mart, AZƏRTAC
“Azəriqaz” İstehsalat Birliyi təbii qazdan qeyri-qanuni istifadə hallarının və qaz sızmalarının aşkarlanması ilə əlaqədar mütəmadi tədbirlərini davam etdirir. Bu işdə “Təmiz Qaz” QSC-nin də xidmətlərindən istifadə olunur.
Birlikdən AZƏRTAC-a bildirilib ki, elə bu gün adıçəkilən təşkilatla birlikdə aparılan yoxlamalar zamanı Sabunçu rayonu, “Maştağa-2” qaz paylayıcı stansiyadan qidalanan 2 qaz xəttində üç yerdə təbii qazdan qeyri-qanuni istifadə faktları aşkarlanıb. Acınacaqlısı odur ki, qaz xətlərinə qeyri-qanuni müdaxilə etməklə Müharibə və əmək əlilləri üçün pansionatın normal rejimdə qaz almasına maneə yaradıblar. Birliyin Bakı Regional Qazın Satışı Departamenti aşkarlanan hallarla bağlı müvafiq prosedurların icrasını nəzarətə götürüb. Qeyri-qanuni xətlərin ləğv edilməsi zamanı Müharibə və əmək əlilləri üçün pansionatın qaz təchizatında müvəqqəti olaraq fasilə yaranıb.
Qeyd edək ki, təmir müddətində həmin xətdən qaz alan bir qrup abonentin də qaz təchizatında fasilə olacaq. Bərpa işlərinin tez bir zamanda yekunlaşdırılması nəzərdə tutulub.
Bölmənin digər xəbərləri
