“Azərkosmos”da çalışanların 33 faizi qadındır
Bakı, 27 aprel, AZƏRTAC
“Azərkosmos”da işləyən xanımların əksəriyyəti kimya, fizika, tətbiqi riyaziyyat, mühəndislik ixtisasları üzrə təhsil alıb.
AZƏRTAC xəbər verir ki, bu sözləri Rəqəmsal İnkişaf və Nəqliyyat Nazirliyi yanında Kosmik Agentliyin (“Azərkosmos”) İdarə Heyətinin sədr müavini Dunay Bədirxanov Bakıda ilk dəfə keçirilən Kosmik Nəsil Məşvərət Şurasının “Qadınlar kosmosda: çətinliklər və imkanlar” mövzusunda tədbirdə deyib.
Sədr müavini vurğulayıb ki, Kosmik Agentlikdə çalışanların 33 faizi qadınlardan ibarətdir: “Xanımların peyklərin idarə olunması və peyk xidmətlərinin verilməsində göstərdikləri peşəkarlıq təqdirəlayiqdir. Xanımlarımız əsasən kosmos sahəsi üzrə biznes və strategiyanın planlaşdırılması, iqtisadi hüquq, maliyyə, kommunikasiya, marketinq kimi qeyri-texniki sahələrdə də çalışırlar”.
O həmçinin bildirib ki, 74-cü Beynəlxalq Astronavtika Konqresinin Azərbaycanda keçiriləcəyi təsadüfi deyil: “Bu gün Azərbaycan dünya kosmik sahəsinin fəal üzvüdür. Bu isə bizə beynəlxalq kosmik arenada mühüm oyunçu olduğumuzu göstərir”.
Bölmənin digər xəbərləri
