“AZƏRSU” SƏHMDAR CƏMİYYƏTİNİN PREZİDENTİ NİZAMƏDDİN RZAYEVİN ÇIXIŞI
-Möhtərəm cənab Prezident!
Xanımlar və cənablar!
Möhtərəm cənab Prezident, ölkənin ümummilli liderimiz Heydər Əliyev tərəfindən təməli qoyulmuş sosial-iqtisadi inkişafı siyasəti, bu gün Sizin tərəfinizdən ardıcıl şəkildə və uğurla davam etdirilir. Ölkə iqtisadiyyatı artıq neçə ildir ki, dinamik sürətlə inkişaf edir. Sizin böyük qayğı və diqqətiniz sayəsində bu inkişaf infrastrukturun bütün sahələrində, o cümlədən su təchizatı sektorunda da öz əksini tapır.
Məlum olduğu kimi, Bakı şəhərinin su təchizatının yaxşılaşdırılması məqsədi ilə 2002-ci ilin dekabr ayında ulu öndərimiz Heydər Əliyev tərəfindən Oğuz və Qəbələ rayonları ərazisindən su kəməri çəkilməsi barədə müvafiq tapşırıq verilmişdir.
Möhtərəm Prezident!
2005-ci ilin sentyabrında keçirilmiş müşavirədə respublikamızda su təchizatının yaxşılaşdırılması üçün görüləcək işlər və perspektiv layihələrlə bağlı verdiyiniz tapşırıqlardan sonra Bakı şəhərinin fasiləsiz və keyfiyyətli su ilə təmin olunması məqsədi ilə çəkiləcək bu kəmərin reallaşdırılması istiqamətində işlər davam etdirilmişdir.
Almaniyanın məsləhətçi şirkəti tərəfindən layihənin texniki-iqtisadi əsaslandırılması və ilkin layihələndirilməsi işləri aparılmış, beynəlxalq müsabiqə keçirilmişdir. Onun nəticələrinə müvafiq olaraq, layihənin idarə edilməsi və texniki nəzarət Almaniyanın “GES Consulting Engineers” şirkəti tərəfindən, su kəmərinin layihələndirilməsi və tikintisi isə Türkiyə və Azərbaycan şirkətləri tərəfindən həyata keçiriləcəkdir.
Möhtərəm cənab Prezident!
Təməlinin qoyulmasında iştirak etdiyimiz bu kəmər haqqında qısa məlumat vermək istəyirəm. İlk növbədə, onu demək istəyirəm ki, bu, əhalinin sosial problemlərinin həlli üçün nəzərdə tutulmuş böyük əhəmiyyətli iri infrastruktur layihəsidir. Yerinə yetiriləcək işlərin həcminə, veriləcək suyun miqdarına və keyfiyyətinə görə nəinki Azərbaycanda, eləcə də dünyada su təchizatı üzrə ən böyük layihələrdəndir.
Möhtərəm cənab Prezident!
Belə əhəmiyyətli layihənin Azərbaycanda həyata keçirilməsi Sizin dəstəyiniz sayəsində, əhalinin sosial problemlərinin həllinə yönəldilmiş yüksək diqqət və qayğınız nəticəsində mümkün olmuşdur. Bu layihəni şərti olaraq iki hissəyə bölmək olar. Sugötürücü qovşaq və Oğuz-Qəbələ-Bakı magistral su kəməri. Sugötürücü qovşaq, əsasən, Oğuz rayonunda yerləşir. Burada 120 ədəd quyunun qazılması nəzərdə tutulur. Quyular təxminən 150 metr dərinlikdə 350 millimetr diametrdə qazılacaqdır. Quyuların hər birindən saniyədə 50 litr su götürülməsi nəzərdə tutulur.
Sugötürücü quyuların iş rejiminə avtomatik nəzarət etmək üçün SCADA tipli nəzarət sistemi yaradılacaqdır.
Sugötürücü qovşaq üçün sanitar zona nəzərdə tutulmuşdur. Bu zona təxminən 30 kilometr uzunluğunda 1,5 kilometr enində ərazini əhatə edəcəkdir. Bu sahədən başlayaraq, su ümumi uzunluğu 267 kilometr olan, diametri 2 metrlik şüşə-polietilen borulardan quraşdırılacaq kəmərlə Bakı şəhərinə hövzə axını ilə nəql olunacaqdır. Su kəmərinin çəkilişində şüşə-polietilen boruların seçilməsindən əsas məqsəd polad borulara nisbətən iqtisadi cəhətdən sərfəli olması, korroziyaya qarşı yüksək davamlılığı, qaynaqdan istifadə edilmədən asan quraşdırılması, çəkisinin azlığı və dəyərinin xeyli aşağı olmasıdır. Kəmər boyunca hər tərəfə 25 metr olmaqla, 50 metrlik sanitar-mühafizəsi zonası nəzərdə tutulmuşdur. Su kəməri yolboyu 12 çay məcrasının altından keçəcəkdir. Eyni zamanda, kəmər 8 yerdə avtomobil, 2 yerdə dəmir yolu xətti ilə kəsişir. Bu kəmər respublikanın 8 rayonunun ərazisindən keçəcəkdir.
Oğuz-Qəbələ-Bakı su kəməri ilə veriləcək suyun keyfiyyətinə gəlincə, bu saf, təmiz bulaq suyu olub, içməli tərkibli əsas minerallarla zəngindir və bu minerallar norma daxilindədir. Bu suda norma həcmində insan orqanizmi üçün vacib əhəmiyyəti olan xlor elementi də var. Suyun codluq və minerallıq dərəcəsi ümumilikdə Dünya Səhiyyə Təşkilatının standartından bir neçə dəfə yaxşıdır.
Kəmər 2008-ci ildə istifadəyə veriləcəkdir. Layihənin həyata keçirilməsində 2000-nə qədər yeni iş yeri açılacaqdır. Kəmər vasitəsilə Bakı şəhərinə saniyədə 5 kubmetr həcmində bulaq suyu veriləcəkdir. Kəmərin çəkilməsi ilə yanaşı, Bakı şəhərinin su təchizatı sistemində yenidənqurma işlərinin aparılması nəticəsində şəhər fasiləsiz olaraq su ilə təmin olunacaqdır.
Möhtərəm cənab Prezident!
Bu imkandan istifadə edərək, icazə verin, iqtisadiyyatımızın inkişaf etdirilməsi, əhalinin sosial şəraitinin, o cümlədən su təchizatının yaxşılaşdırılmasına göstərdiyiniz böyük qayğı və diqqətə görə Sizə öz dərin minnətdarlığımı bildirim. Sizi əmin edirəm ki, paytaxtımızın su təchizatı üçün çox önəmli olan bu kəmərin tikintisi ilə bağlı Sizin tapşırıqlarınızın həyata keçirilməsində üzərimizə düşən şərəfli vəzifələrin yerinə yetirilməsinə nail olacağıq. Diqqətinizə görə təşəkkür edirəm.
X X X
Prezident İlham Əliyev mərasimdə nitq söylədi.
Bölmənin digər xəbərləri
