Bakı Enerji Həftəsi dünya dövlətlərinin qarşılıqlı əməkdaşlığına verilmiş önəmli töhfədir
Bakı, 7 iyun, AZƏRTAC
Ölkəmiz iyunun 1-dən 4-dək Bakı Enerji Həftəsi brendi altında üç böyük tədbirə - 27-ci Beynəlxalq Xəzər Neft və Qaz, 10-cu Yubiley Xəzər Beynəlxalq Energetika və Bərpaolunan Enerji Sərgiləri və Bakı Enerji Forumuna uğurla ev sahibliyi etdi. Bu il xüsusi maraqla qarşılanan və yüksək fəallıqla keçirilən sərgilərə və foruma 30 ölkədən ümumilikdə 249 şirkət qatıldı.
Bir çox beynəlxalq və regional tədbirlərə ev sahibliyi edən Azərbaycan növbəti dəfə peşəkar təşkilatçılığını və qonaqpərvərliyini bir daha nümayiş etdirdi. Bu cür əhəmiyyətli tədbirlərin ölkəmizdə keçirilməsi təsadüfi deyil. Çünki Azərbaycan dünyada müxtəlif sahələrdə beynəlxalq tədbirlərin və yarışların ən peşəkar təşkilatçılarından biri kimi tanınır. Bu baxımdan ölkəmizə etimad yüksəkdir. Xüsusilə siyasi, iqtisadi, enerji, humanitar, mədəni və idman sahələrində təşkil edilən beynəlxalq miqyaslı tədbirlər bu sahələrdə ölkəmizin əldə etdiyi uğurlarla sıx bağlıdır, eyni zamanda, bu sahələrin gələcək inkişafına mühüm töhfədir.
Bunu AZƏRTAC-a açıqlamasında Yeni Azərbaycan Partiyası Binəqədi rayon təşkilatının sədri Vüsar İsmayılov söyləyib.
O bildirib ki, iyunun 1-dən 4-dək paytaxtımızda Bakı Enerji Həftəsinin keçirilməsi də bu baxımdan olduqca əhəmiyyətli hadisədir və bu sahənin gələcəkdə də uğurla inkişaf etdirilməsi istiqamətində dünya dövlətlərinin qarşılıqlı birgə əməkdaşlığına verilmiş önəmli stimuldur.
Ümummilli Lider, görkəmli dövlət xadimi Heydər Əliyevin ölkəmizə yenidən rəhbərliyə başlamasından sonra bütün sahələrdə olduğu kimi, enerji təhlükəsizliyinin təmin olunması və inkişafı istiqamətində də mühüm islahatlar həyata keçirilməyə başlanılıb. Bu sahənin inkişafı dövlətin prioritet istiqamətlərindən biri kimi xüsusi yer tutur. Bu gün respublikamız bir sıra dövlətlərlə sıx təmaslar və qarşılıqlı əməkdaşlıq əsasında mühüm nailiyyətlərə imza atır. Ölkəmizdə həyata keçirilən enerji siyasəti dövlətimizin başçısı İlham Əliyev tərəfindən uğurla davam etdirilir. Dövlətimizin və xalqımızın milli maraqlarına xidmət edən enerji siyasəti artıq dünyanın diqqət mərkəzindədir. Bir sözlə, ölkəmiz müstəqillik illərində öz enerji təhlükəsizliyinə sərmayə yatırıb, daxili bazarda tələbatları tam təmin edib və ölkələrin enerji təhlükəsizliyində getdikcə daha mühüm rol oynamağa başlayıb.
“Prezident İlham Əliyev Bakı Enerji Həftəsi çərçivəsində iyunun 1-də 27-ci Beynəlxalq Xəzər Neft və Qaz Sərgisinin rəsmi açılış mərasimində çıxışı zamanı ölkəmizdə enerji təhlükəsizliyinin və inkişafının əhəmiyyətini önə çəkərək çox mühüm məsələlərə toxundu. Dövlətimizin başçısı Azərbaycanda həyata keçirilən enerji siyasətinin tarixi, qazanılan uğurlar, bir sıra dövlətlərlə əməkdaşlıq əlaqələrindən məmnunluqla danışaraq, bu sahənin inkişafının bu gün də prioritet olduğunu qeyd etdi. Ölkəmizdə bu sahədə əldə edilən nailiyyətlərdən ətraflı bəhs edərək Azərbaycanın birbaşa təşəbbüskarı və icraçısı olduğu layihələrin reallaşdırılması nəticəsində dünyanın enerji siyasətinə verilən töhfələri ətraflı vurğuladı. Bir sıra dövlətlərlə uğurlu əlaqələrin bundan sonra da davam etdiriləcəyini və dövlətlərin inkişafında, xalqların rifah halının yüksəldilməsində önəmli rol oynayacağını diqqətə çatdırdı.
Avropa qitəsində təbii sərvətlərimizlə bağlı fəaliyyətimizin genişləndirilməsi həm bizim üçün, həm də tərəfdaşlarımız üçün zəruridir. Bu gün Azərbaycanla Avropa ölkələri arasında qarşılıqlı inam və etimada əsaslanan əməkdaşlıq münasibətləri var. Hətta demək olar ki, Azərbaycan Avropanın enerji təhlükəsizliyində çox əhəmiyyətli rol oynayır”, - deyə V.İsmayılov qeyd edib.
Onun sözlərinə görə, Xəzərin Azərbaycan sahillərindən başlayaraq qonşu Gürcüstan və Türkiyədən keçməklə Avropanın mərkəzi hissəsinədək uzanacaq Cənub Qaz Dəhlizinin icrası zamanı Azərbaycan təkcə kəməri ərazisindən keçən ölkələrlə deyil, eləcə də beynəlxalq maliyyə təsisatları, enerji şirkətləri, aparıcı ölkələrin hökumətləri və Avropa Komissiyası ilə çox sıx əməkdaşlıq əlaqələri qurub. Cənub Qaz Dəhlizi layihəsinin reallaşmasına töhfələr verməklə Azərbaycan özünün bəyan etdiyi ədalətli enerji siyasətinə sadiqliyini bir daha ortaya qoyur. Azərbaycanın prinsipial mövqeyi belədir ki, enerji amili heç bir halda digər ölkələrə qarşı təzyiq vasitəsinə çevrilməməlidir.
Azərbaycanın reallaşdırdığı digər mühüm bir layihə isə Bakı-Tbilisi-Ceyhan əsas ixrac neft boru kəməridir. Bu kəmərin çəkilməsi ulu öndər Heydər Əliyevin gələcəyə hesablanan neft strategiyasının uğurlu nəticəsidir. Bu gün Azərbaycan dünya birliyində siyasi, iqtisadi inkişafı, qlobal hadisələrə təsir imkanları artan qüdrətli dövlət kimi tanınır. Bu gün Bakı-Tbilisi-Ceyhan infrastrukturu fasilə olmadan fəaliyyətdədir və iqtisadiyyatımızın inkişafına əvəzsiz töhfə verir.
“Xüsusilə qeyd etmək lazımdır ki, iyunun 4-də Bakı Enerji Forumu çərçivəsində Şuşa şəhərində yüzdən çox yerli və xarici nümayəndənin iştirak etdiyi xüsusi sessiya keçirilib. Şuşa xüsusi sessiyası çərçivəsində əməkdaşlığa dair bir sıra sənədlərin imzalanması mərasimi keçirilib.
Beləliklə, forum enerji sənayesinin aparıcı təmsilçiləri ilə görüşmək, yeni səmərəli və qarşılıqlı faydalı əlaqələr qurmaq və mövcud əlaqələri genişləndirmək, habelə perspektiv müqavilələr imzalamaq üçün unikal imkan oldu. İnanırıq ki, Azərbaycan dövlətimizin başçısı İlham Əliyevin rəhbərliyi ilə enerji siyasətini bundan sonra da uğurla davam etdirəcək”, - deyən Vüsar İsmayılov fikirlərini yekunlaşdırıb.
Bölmənin digər xəbərləri
