Idarə heyətinin hesabatında göstərilmişdir ki, Bakı Fond Birjasının /BFB\ əməliyyatlarının ən böyük həcmi dövlət qısamüddətli istiqrazlar sektoruna düşür. 2001-ci ildə Birja vasitəsilə dövlət qısamüddətli istiqrazların yerləşdirilməsi üzrə 23 hərrac baş tutmuşdur. İl ərzində nominal üzrə yerləşdirilmiş istiqrazların həcmi təxminən 470 milyard manat, real qiymətlər üzrə yerləşdirilmiş həcmi isə 450 milyard manat təşkil etmişdir, bu isə 2002-ci ildə yerləşdirilmiş həcmdən 35 faiz çoxdur. 

Dövlət qısamüddətli istiqrazlar bazarında REPO əməliyyatlarının başlanması fond bazarında önəmli hadisə olmuşdur. Azərbaycan Respublikası Milli Bankı və BFB arasında BFB-nın vasitəsilə dövlət qısamüddətli istiqrazlar üzrə REPO əməliyyatlarının başlanması haqında razılaşma əldə olunduqdan sonra BFB-nın ticarət sistemində zəruri əlavə və dəyişikliklər edilmişdir. Milli Bank və Qiymətli Kağızlar üzrə Dövlət Komitəsi tərəfindən təsdiq olunan Əsasnaməyə uyğun olaraq, dövlət qısamüddətli istiqrazlar bazarının likvidliyinin artırılması məqsədi ilə BFB ilə Milli Bank arasında onlayn rabitə kanalının quraşdırılmasından sonra REPO əməliyyatları başlanmışdır. Hərrac əməliyyatlarının həcmi təxminən 12 milyon manat təşkil etmişdir. İndiyədək Milli Bankı və kommersiya bankları arasında bağlanan “REPO baş sazişinə” 8 bank qoşulmuşdur və hazırda ilkin və təkrar bazarlarda əməliyyatlar müvəffəqiyyətlə həyata keçirilir.

Bakı Fond Birjasının korporativ qiymətli kağızlar sektorunda əməliyyatlar 2001-ci ilin fevralında başlanmışdır. İl ərzində həmin sektorda alqı-satqı əqdlərinin həcmi 4 milyard manatdan artıq olmuşdur. Birjada tədavüldə olan emitentlər tikinti, yeyinti, nəqliyyat və bank sektorlarında fəaliyyət göstərirlər. Birja üzvlərindən MBank və “Mars İnvestment” MMM korporativ qiymətli kağızlar bazarında fəal iştirak etmişlər.

Bazar sektorlarının inkişaf etdirilməsi sahəsində 2002-ci ildə fəaliyyətin əsas istiqaməti Birjanın korporativ qiymətli kağızlar bazarında likvidliyin artırılması üçün fond bazarında münbit şəraitin yaradılmasıdır. Potensial investorların və emitentlərin məlumatlandırılması və fond bazarına cəlb edilməsi, Birja üzvlərinin fond bazarında fəaliyyətinin gücləndirilməsi, qiymətli kağızlar bazarını tənzimləyən normativ bazanın təkmilləşdirilməsi sahəsində konkret tədbirlər planı işlənib hazırlanmışdır.

2001-ci ildə BFB-nin bir qrup treyderləri və 3 əməkdaşı İstanbul Fond birjasının nəzdində keçirilmiş seminarlarda iştirak etmişdir. İki əməkdaşı isə Avropa Birliyinin “TACİS” proqramı çərçivəsində Avropanın aparıcı maliyyə təşkilatlarında təcrübə keçir.

Səhmdarların ümumi yığıncağı Salim Krimanı BFB idarə heyətinin sədri seçmişdir. Yeni seçilmiş Müşahidə şurasına Mbank, MostBank, TCFS Servisiz, Koçbank, Rabitəbank, Beynəlxalq Bank, BUSBank, Təftiş komissiyasına Dəmiryolbank, Yunayted Kredit Bank, SiBank daxildir. Çingiz Əsədullayev Arbitraj komissiyasının sədri seçilmişdir.

Yığıncaq Birjanın büdcəsini 900 milyon manat həcmində təsdiq etmişdir. İlkBank BFB-nin səhmdarları sırasına qəbul olunmuşdur.