BAKI-RUSİYA DÖVLƏT SƏRHƏDİ YOLUNUN ÇƏKİLİŞİ NOYABRDA YEKUNLAŞACAQDIR
“Azəryolservis” ASC-dən AZƏRTAC-a bildirmişlər ki, Bakı-Quba-Rusiya Federasiyası ilə dövlət sərhədi avtomobil yolunun 120 kilometrlik hissəsində torpaqbərkitmə işləri başa çatdırılmışdır.
Bir il əvvəl yenidən qurulmasına başlanılmış yolun 110 kilometirlik hissəsində isə artıq betonlama işi qurtarmışdır. Həmin istiqamətdə yük maşınları çoxluq təşkil etdiyindən beton örtüyünün qalınlığı 28 santimetrdir.
İşlərin sürətlə aparılması üçün ərazi hissələrə bölünmüşdür. Yolun Dəvəçi rayonu ərazisinə düşən 40 kilometrlik hissəsinə artıq beton döşənmişdir. Hazırda yolun istifadəyə verilmiş 100 kilometrlik hissəsində işıq dirəkləri quraşdırılır və istinad divarları çəkilir. Ümumilikdə Bakı-Quba -Rusiya Federasiyası ilə dövlət sərhədi avtomobil yolu üzərində 22 körpü, 2 tunel, 1 dəmir yol körpüsü inşa ediləcəkdir. İşlərin sürətlə aparılması üçün yol boyu 12 beton zavodu tikilmişdir.
Beton yolun noyabrda tam istifadəyə verilməsi planlaşdırılır.
Bölmənin digər xəbərləri
