BAKI SLAVYAN UNİVERSİTETİNDƏ PEDAQOJİ TƏCRÜBƏ VƏ İSTEHSALAT TƏCRÜBƏSİ KEÇMİŞ TƏLƏBƏLƏRLƏ GÖRÜŞ KEÇİRİLMİŞDİR
AZƏRTAC xəbər verir ki, Bakı Slavyan Universitetində respublikanın müxtəlif bölgələrində, o cümlədən qaçqın düşərgələrində pedaqoji təcrübə və istehsalat təcrübəsi keçmiş tələbələrlə görüş keçirilmişdir.
Tədbirdə universitetin rektoru, professor Kamal Abdullayev çıxış edərək, tələbələrin pedaqoji və istehsalat təcrübələri haqqında ətraflı məlumat vermişdir.
Qeyd edilmişdir ki, fevralın 9-dan 23-dək, ümumilikdə, 491 tələbə Naxçıvan MR-də, Gəncədə, Sumqayıtda, Şəmkirdə, Şamaxıda, Qazaxda, Göyçayda, Astarada, həmçinin, Bərdə, Sabirabad və Biləsuvardakı qaçqın düşərgələrində müvafiq dövlət qurumlarında və beynəlxalq təşkilatlarda, ümumtəhsil məktəblərində təcrübə keçmiş, müxtəlif tədbirlərdə iştirak etmişdir. Eyni zamanda, qaçqın məktəblərində təhsil alan şagirdlərə dərs ləvazimatları hədiyyə olunmuşdur.
Beynəlxalq Münasibətlər və Regionşünaslıq fakültəsinin dekanı Adil Rəcəbli, kafedra müdiri Eldar Zeynalov və digər natiqlər tələbələrin pedaqoji və istehsalat təcrübələrinin əhəmiyyətindən danışaraq bildirmişlər ki, təcrübə müddətində tələbələr olduqları regionların tarixi abidələri, iqtisadiyyatı ilə də maraqlanmışlar.
Bölmənin digər xəbərləri
