BAKIDA “AQROBİZNES İNVESTİSİYA” BEYNƏLXALQ KONFRANSI KEÇİRİLMİŞDİR
Konfransdan əvvəl iştirakçılar Fəxri xiyabana gələrək, müstəqil Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla anaraq, məzarı önünə əklil qoymuşlar.
Sonra onlar Şəhidlər xiyabanına gəlmiş, Azərbaycanın müstəqilliyi və ərazi bütövlüyü uğrunda canlarından keçmiş qəhrəmanlarımızın xatirəsini yad edərək, məzarları üzərinə gül düzmüş, “Əbədi məşəl” abidəsinin önünə əklil qoymuşlar.
Konfransı kənd təsərrüfatı naziri İsmət Abasov açaraq məlumat vermişdir ki, tədbirdə Milli Məclis sədrinin müavini Valeh Ələsgərov, Milli Məclisin daimi komissiyalarının sədrləri, bir sıra dövlət qurumlarının, müxtəlif bankların və şirkətlərin rəhbərləri, FAO-nun Avropa üzrə regional ofisinin siyasi məsələlər üzrə eksperti Yehle Raymond, Mərkəzi və Şərqi Avropa üzrə subregional ofisinin siyasi məsələlər üzrə eksperti Tomas Lonq, beynəlxalq ekspertlər, Avropa Yenidənqurma və İnkişaf Bankının, Asiya İnkişaf Bankının, Dünya Bankının, GTZ-nin, TİKA-nın, USAİD-in nümayəndələri iştirak edirlər.
Nazir ölkəmizdə aqrar sahədə qazanılan uğurlarda bir sıra donor ölkələrin, beynəlxalq maliyyə qurumları və təşkilatlarının, o cümlədən FAO-nun həyata keçirdikləri layihələrin rolunu xüsusi vurğulamışdır. Bildirilmişdir ki, respublikamızın FAO-ya üzv olduğu 11 il ərzində bu təşkilatın texniki yardımı və maliyyə dəstəyi ilə kənd təsərrüfatı sahəsində qabaqcıl təcrübənin öyrənilməsinə, bazar iqtisadiyyatının əsaslarının və sahibkarlıq vərdişlərinin təkmilləşdirilməsinə, aqrar sahənin digər vacib problemlərinə həsr olunmuş 7 layihə həyata keçirilir. FAO-nun baş direktoru Jak Diufun ölkəmizə ötənilki səfərindən sonra bu təşkilatla əlaqələr daha da canlanmışdır. Azərbaycanda FAO-nun texniki yardımı və maliyyə dəstəyi ilə 2006-2007-ci illərdə ipəkçiliyin, camışçılığın, arıçılığın inkişaf etdirilməsinə, aqromarketinqin təşkilinə Ağdam rayonunda yeni salınmış qəsəbələrdə məcburi köçkünlər üçün imkanlar yaradılmasına, zəruri malların istehsalı və satışına dair 6 layihə hazırlanmışdır. FAO-nun təşəbbüsü ilə bu layihələrin həyata keçirilməsi istiqamətində də işlər görülür.
Nazir əmin olduğunu bildirmişdir ki, konfrans Azərbaycanda kənd təsərrüfatına və emal sənayesinə investisiya qoyuluşu imkanlarının təkmilləşdirilməsi və genişləndirilməsinə, aqrobiznes bölməsinin inkişafına təkan verəcəkdir.
Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev Azərbaycan Prezidenti İlham Əliyevin konfrans iştirakçılarına təbrikini oxumuşdur.
İqtisadi inkişaf nazirinin müavini Niyazi Səfərov, Xarici İşlər Nazirliyi İqtisadi əməkdaşlıq və inkişaf idarəsinin rəisi Əşrəf Şıxəliyev, ekspert Yehle Raymond çıxış etmişlər.
Sonra “Azərbaycanda aqrobiznes sektorunun icmalı”, “Kredit mənbələri və aidiyyətı xidmətlər”, “Müvəffəqiyyətli investisiya layihələri” bölmələrində müxtəlif məruzələr dinlənilmişdir.
Kənd Təsərrüfatı Nazirliyinin şöbə müdiri Rafiq Məcidov “Azərbaycanda aqrobiznes sektorunun keçmiş və hazırkı fəaliyyətinin icmalı” mövzusunda məruzəsində 1990-cı ilin əvvəllərində SSRİ-nin dağılması, dövlətlərarası iqtisadi əlaqələrin pozulması, Ermənistanın Azərbaycana təcavüzü nəticəsində milli iqtisadiyyatın, o cümlədən aqrar-sənaye kompleksinin dərin böhran vəziyyətinə düşdüyünü xatırlatmışdır. Eyni zamanda bildirmişdir ki, 1995-ci ildən başlayaraq ümummilli liderimiz Heydər Əliyev tərəfindən həyata keçirilən aqrar islahatlar sayəsində aqrar bölmədə yeni mülkiyyətçilər yaranmış, istehsalın yeni strukturu formalaşmışdır və hazırda kənd təsərrüfatı məhsulları istehsalının 99,7 faizi artıq özəl bölmənin payına düşür. Respublikada kənd təsərrüfatının ümumi məhsulunun artım sürəti 1999-2005-ci illərdə sabit olaraq hər il 7-12 faiz təşkil etmişdir. 1995-ci ilə nisbətən 2005-ci ildə ölkədə taxıl istehsalı 2,3, kartof istehsalı 7, tərəvəz istehsalı 2,7, meyvə istehsalı 2 dəfə, ət istehsalı 82 faiz, süd istehsalı 52, mal-qaranın sayı 65 faiz artmışdır. Ölkənin ixrac potensialı yüksəlmiş, son illərdə meyvə-tərəvəzin, emal məhsullarının, pambıq mahlıcının, kartofun və s. ölkədən ixracı artmış, ənənəvi olaraq ölkəyə idxal edilən ət və süd məhsullarının miqdarı isə azalmışdır.
Sahibkarlığa Kömək Milli Fondundan kənd istehsalçılarına texnika və mineral gübrələrin alınması üçün 2005-ci ildə 20 milyon AZN, 2006-cı ildə 30 milyon AZN vəsait ayrılmışdır. 2001-2005-ci illərdə kəndin inkişafı üçün bir sıra dövlət proqramları imzalanmış və həyata keçirilməkdədir.
Nazirliyin Aqrar islahatlar, kənd ərazilərinin və sahibkarlığın inkişafı şöbəsinin müdiri İslam İbrahimovun “Azərbaycanda aqrobiznesin mövcud vəziyyəti, potensialı” mövzusunda məruzəsində aqrobiznes sahəsində qanunvericilik, görülən işlər, beynəlxalq təcrübə, aqrobiznesin mövcud problemləri, aqrobiznesin inkişaf potensialı haqqında danışılmışdır.
FAO-nun beynəlxalq məsləhətçisi Ernest Besenin, Mərkəzi və Şərqi Avropa üzrə subregional ofisinin təmsilçisi Tomas Lonqun, Avropa Yenidənqurma və İnkişaf Bankının nümayəndəsi Emin Məmmədovun məruzələri, Milk Pro Ltd, İtal Fromage şirkətlərinin, Azersun Holdinqin, Tovuz-Baltiya MMC-nin rəhbərlərinin çıxışları, Azərbaycanda aqrobiznes sektorunda Beynəlxalq Maliyyə Korporasiyasının və Dünya Bankının fəaliyyəti haqqında məlumatlar da maraqla qarşılanmışdır.
Aqrobiznes sahəsinə cəlb olunmuş yerli bankların rəhbərlərinin iştirakı ilə dəyirmi masa keçirilmişdir.
Bölmənin digər xəbərləri
