BAKIDA ATÇILIQ İDMANI ÜZRƏ BEYNƏLXALQ TURNİRLƏRİN QALİBLƏRİ MƏLUM OLMUŞDUR
AZƏRTAC xəbər verir ki, “Günay” Atçılıq İdman Klubunda konkur üzrə “Heydər Əliyev kuboku” uğrunda beynəlxalq turnir keçirilmişdir.
Yarışda Azərbaycan idmançıları ilə yanaşı, Almaniya və Gürcüstan jokeyləri də iştirak etmişlər.
Ümummilli liderimizin xatirəsinə həsr olunmuş yarışın nəticələrinə əsasən, “Günay” Atçılıq İdman Klubunun təmsilçisi Ramiz Rzayev “Qırat” ləqəbli atla birinci yeri tutaraq “Heydər Əliyev kuboku”na layiq görülmüşdür. Həmin klubun daha bir nümayəndəsi Seyid Musayev “Polyaçka” ləqəbli atla ikinci yerə çıxmışdır. “Razborçivıy” ləqəbli atla çıxış edən Ramiz Rzayev, həm də, turnirin üçüncü mükafatına sahib olmuşdur. Qeyd edək ki, sayca dördüncü dəfə keçirilən bu yarış Beynəlxalq Atçılıq Federasiyasının (FEİ) illik təqvim planına daxildir.
Turnir başa çatdıqdan sonra hər üç ölkənin təmsilçilərinin qatıldığı “Xəzər kuboku” uğrunda beynəlxalq yarış keçirilmişdir.
İlk dəfə təşkil olunan bu turnirdə Seyid Musayev fəxri kürsünün ən yüksək pilləsinə qalxmışdır. Ramiz Rzayev ikinci, gürcüstanlı jokey Tsopne Labaşiya isə üçüncü yeri tutmuşlar. Hər iki turnirin ən gənc və yeganə xanım iştirakçısı, almaniyalı Filiz Bıçaqçı “Xəzər kuboku” turnirində mükafata layiq dördüncü nəticəni göstərmişdir.
Qaliblərə kubok, medallar, diplom və qiymətli hədiyyələr verilmişdir.
Bölmənin digər xəbərləri
