BAKIDA “CƏNUBİ QAFQAZDA NARKOTİKLƏRƏ NƏZARƏT” PROQRAMI İLƏ ƏLAQƏDAR BEYNƏLXALQ SEMİNAR KEÇİRİLİR
AZƏRTAC-ın müxbiri xəbər verir ki, seminarı Cənubi Qafqazda Narkotiklərə Nəzarət (SKAD) Proqramının milli əlaqələndiricisi Məzahir Əfəndiyev açaraq, proqramın respublikada 2001-ci ildən fəaliyyət göstərdiyini söylədi. Natiq proqramın əsas istiqamətlərindən birinin Azərbaycan hökumətinə hüquqi yardım göstərmək, narkotiklərlə bağlı qanunvericiliyin təkmilləşdirilməsi istiqamətində aparılan islahatlara yaxından kömək etmək olduğunu vurğuladı.
Azərbaycan hökuməti adından çıxış edən Prezident Administrasiyasının hüquq mühafizə orqanları ilə iş şöbəsinin müdiri Fuad Ələsgərov bəşəriyyətin XXI əsrin əvvəllərində rastlaşdığı terrorizm, qul alveri kimi sərhəd tanımayan cinayətlərin arasında insanların varlığına təhlükə yaradan ciddi problemlərdən birinin narkomaniya olduğunu qeyd etdi, bu bəlaya qarşı mübarizənin dövlətlərin əsas vəzifələrindən biri olduğunu söylədi.
BMT-nin İnkişaf Proqramı və Avropa Şurasının nümayəndələri narkomaniyaya qarşı mübarizədə Azərbaycan hüquq mühafizə orqanlarına uğurlar arzuladı və seminar iştirakçılarını fikir mübadiləsində fəal olmağa çağırdılar.
BMT-nin narkotiklər və cinayətkarlıq üzrə Mərkəzi Asiyadakı Regional Ofisinin baş məsləhətçisi Olqa Zudova narkomaniyaya qarşı mübarizədə dünya dövlətlərinin bir araya gəlməsinin başlıca amil olduğunu bildirdi. Tacikistanda keçən il təkcə 6 ton heroin tutulduğunu və sərhəddən keçən bütün narkotiklərin ancaq 10 faizinin müsadirə olunduğunu söyləyən natiq narkomaniyaya qarşı qəti mübarizə aparılmasının vacibliyini vurğuladı.
Seminar öz işini davam etdirir.
