BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, iyunun 28-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq, əsasən meyvə-tərəvəz və bostan məhsulları çıxarılmışdı.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, şənbə günü “Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan 24,85 ton məhsul, o cümlədən 2,5 ton ət, 0,3 ton ağartı, 8 ton tərəvəz, 5 ton kartof, 8 ton meyvə, 12 min ədəd yumurta, 50 kiloqram bal gətirilmişdi. Burada qiymətlər bazardakından 20-25 faiz aşağı olmuşdur. Qoyun ətinin kiloqramı 4 manat 50, mal əti 4 manat 20 qəpiyə, quş əti 3 manat 80-4 manat 20 qəpiyə, bal 9-10 manata, gilas, gilənar 1 manat 50 qəpiyə, armud 80 qəpik- manata, gavalı 50 qəpik-1 manata, alma 40 qəpik-1 manata, çuğundur 80, badımcan 50, xiyar 60-80, kələm 60, pomidor, lobya 40-50, kartof, soğan 30-40, qarpız 30, yemiş 50-60, yumurtanın bir ədədi 10, göyərtinin dəstəsi 10 qəpiyə satılmışdır.
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkada Salyan, Qusar, Dəvəçi və digər rayonların fermerləri satışa 49 tondan çox müxtəlif çeşidli kənd təsərrüfatı məhsulları çıxarmışdılar.
Gədəbəydən kartof gətirmiş Fazil Bayramov dedi ki, son bir neçə ayda yarmarkada 10 tona yaxın məhsul satmışdır. O, yaradılmış şəraitdən və alıcıların fəallığından razılıq edərək bildirdi ki, bundan sonra da buraya məhsul gətirəcəkdir.
Paytaxt sakinləri mal və qoyun ətini, meyvə-tərəvəzi, konserv və taxıl məhsullarını, şirələri, un məmulatını, ağartını, yumurtanı həvəslə alırdılar.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada alıcılara Salyan, Ağdaş və digər rayonlardan 10 tondan çox məhsul və Giləzi Quşçuluq Fabrikindən gətirilmiş 4 min ədəd yumurta təklif edilirdi.
Kənd Təsərrüfatı Nazirliyinin nümayəndəsi Məmməd Həziyev yarmarkada keyfiyyət və qiymətlərə ciddi nəzarət etdiklərini bildirdi.
Ağdaşdan pomidor gətirmiş Camulla Babayev dedi ki, indiyədək yarmarkalarda 30 tona yaxın məhsul satmışdır. 80 qəpiyə təklif etdiyi məhsul sakinlər tərəfindən yaxşı alınır. C.Babayevin sözlərinə görə, gün ərzində 200 kiloqramdan çox məhsul satır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax Rayon İcra Hakimiyyətinin nümayəndəsi İman Məmmədov bildirmişdir ki, bu gün rayonun fermerləri satışa 6,4 ton kartof, 3,3 ton tərəvəz, 4,8 ton meyvə və digər məhsullar gətirmişlər.
Burada alıcılara lobyanın kiloqramı 30, qarpızın kiloqramı 20, kələmin kiloqramı 40-50, soğanın kiloqramı 20-30 qəpiyə təklif edilirdi. Digər məhsullar da bazardakından xeyli ucuz qiymətlərə satılırdı.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, Ağsu və Qazax fermerləri yarmarkaya 25 tondan artıq məhsul çıxarmışlar.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da ucuz qiymətlərə müxtəlif çeşiddə kənd təsərrüfatı məhsulları satılırdı. Burada Bərdə, Goranboy və Ağstafadan gətirilmiş meyvə-tərəvəz həvəslə alınırdı.
Şəhər sakinləri yarmarkalardakı nümunəvi xidmətdən razılıq edirdilər.
######
 |
 |
Bölmənin digər xəbərləri
