BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 18 aprel (AZƏRTAC). Aprelin 18-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdır.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və Göyçay rayonlarından müxtəlif çeşidli kənd təsərrüfatı məhsulları gətirilmişdi. Burada əhaliyə 13 tondan çox məhsul, o cümlədən 2,5 ton ət, 0,3 ton ağartı, 4 ton tərəvəz, 3,5 ton kartof, 3 ton meyvə, 5 min ədəd yumurta, 40 kiloqram bal təklif edilirdi. Gədəbəyli Kamran Əliyev yarmarkaya 3 tondan çox kartof, soğan, kələm və yerkökü gətirmişdi. O, kartofun və soğanın kiloqramını 30-40, kələmi və yerkökünü isə 40-50 qəpiyə satırdı. Yarmarkada məhsulların qiymətləri bazardakından xeyli ucuz, keyfiyyəti yüksək olduğuna görə şəhər sakinləri onları həvəslə alırdılar.
Metronun “Əhmədli” stansiyasının yaxınlığında, “Azər” ticarət mərkəzində alıcılar məhsulların bolluğundan və qiymətindən razılıq edirdilər. İşçi qrupunun qərargahından verilən məlumata görə, burada satışa Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş 215,7 ton meyvə-tərəvəz, kartof, ət və digər məhsullar çıxarılmışdı.
Suraxanıda “Günəş” ticarət mərkəzindəki yarmarkada şəhər sakinlərinə Samux, Daşkəsən, Quba, Biləsuvar və digər rayonlardan gətirilmiş 42 ton 500 kiloqram məhsul təklif olunurdu. Fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmağa imkan yaradılmışdı. Satışa çıxarılmış məhsullar arasında kartof, soğan, yerkökü, kələm, balqabaq, ət, süd məhsulları, göyərti, xiyar, alma, armud, qoz, fındıq, habelə istixana şəraitində yetişdirilmiş pomidor və digər məhsullar çoxluq təşkil edirdi. Burada yumurtanın biri 6 qəpiyə, almanın kiloqramı 20-50 qəpiyə, qoz 1 manat -2 manat 50 qəpiyə, qoz ləpəsi 2 manat 50 qəpik - 3 manata, şabalıd 1 manat 50 qəpik - 2 manat 50 qəpiyə, qoyun əti 4 manat 50 qəpiyə, mal əti 4 manata, quş əti 3 manat - 3 manat 50 qəpiyə satılırdı.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya Cəlilabad rayonunun fermerləri 6 ton 500 kiloqram məhsul gətirmişdilər. Alıcılara təklif olunan ət, ağartı, kartof, soğan, alma, nar, heyva, toyuq əti, yumurta, kələm, balqabaq və göyərtinin qiyməti bazardakından xeyli ucuz idi. Yarmarkalardan əlidolu çıxan şəhər sakinləri həm qiymətlərin ucuz olmasından, həm də mal və məhsulun çeşidinin çoxluğundan razılıq edirdilər. Satışa 49 ton məhsul çıxarıldığını bildirən Kənd Təsərrüfatı Nazirliyinin nümayəndəsi Mustafa Rüstəmov, bütün məhsulların keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır.
Həmişə olduğu kimi, bu dəfə də Yeni Yasamal yaşayış massivində “Dairə” adlanan ərazidəki ticarət mərkəzində təşkil edilmiş yarmarkada paytaxt sakinləri Salyan, Quba, Qusar, Dəvəçi , Astara, İmişli və digər rayonların fermer təsərrüfatlarından gətirilmiş kartof, soğan, alma, yerkökü, çuğundur, xiyar, pomidor, kələm, ağartı, sitrus meyvələri, göyərti və digər məhsulları həvəslə alırdılar. Hər dəfə olduğu kimi, bu gün də Salyan rayonunun Qızılağac kəndindən - Zöhrab Böyükağa oğlunun “Qırxçıraq” fermer təsərüfatından gətirilmiş təzə mal və qoyun əti üçün böyük növbə yaranmışdı. Kənd Təsərrüfatı Nazirliyinin nümayəndəsi Vahid Zərgərovun verdiyi məlumata görə, bugünkü yarmarkaya fermerlər və şəxsi təsərrüfat sahibləri 54,9 ton məhsul gətirmişlər. Satışa çıxarılan bütün məhsullarin keyfiyyəti ciddi surətdə yoxlanılır, alıcıların arzu və istəkləri nəzərə alınır.
Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Ağdaş, Salyan, Sabirabad, Masallı, Quba və digər rayonların fermerləri satışa 9 tondan çox kənd təsərrüfatı məhsulları çıxarmışdılar. Bundan əlavə, alıcılara Giləzi və Hacıqabul quşçuluq fabriklərindən 26 min yumurta gətirilmişdi. Kənd Təsərrüfatı Nazirliyinin nümayəndəsi Məmməd Həziyev bildirdi ki, məhsulların keyfiyyətinə və qiymətinə ciddi nəzarət edilir. Onların qiyməti bazardakından 20-30 faiz aşağıdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax Rayon İcra Hakimiyyətinin nümayəndəsi İman Məmmədov bildirdi ki, rayon fermerləri satışa 3,6 ton meyvə, 2,6 ton tərəvəz, 5,1 ton kartof və digər məhsullar çıxarmışlar. Kökün kiloqramı 40-45, kələmin və soğanın kiloqramı 30-40, almanın kiloqramı 20 qəpiyə təklif olunurdu. Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, yarmarkaya Qazax və Ağsudan 19 ton məhsul gətirilmişdir.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da məhsul bol idi. Ağstafa, Bərdə və Goranboy fermerləri satışa ucuz qiymətlərə kələm, alma, soğan, çuğundur, kartof və digər kənd təsərrüfatı məhsulları çıxarmışdılar.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada şənbə günü bakılılara 24,3 ton məhsul, o cümlədən 8 min yumurta təklif edilmişdir. Burada kartofun kiloqramı 30-50 qəpiyə, pomidor 1 manat 50 qəpiyə, xiyar 1 manata, soğan 40, çuğundur 60, kök 50, alma 30 qəpiyə, mal əti 4 manat 50 qəpiyə, qoyun əti 5 manata, yumurtanın biri 5-6 qəpiyə, göyərtinin dəstəsi 10 qəpiyə satılmışdır.
######
 |
 |
Bölmənin digər xəbərləri
