Bakı, 16 may (AZƏRTAC). Mayın 16-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdır.

“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan 11 tondan çox məhsul gətirilmişdi.

Yarmarkada hər həftə iştirak edən gədəbəyli fermer Cəmil İsayev bu dəfə 3 tondan çox kartof, soğan, kələm, yerkökü və çuğundur gətirmişdir. Məhsulları ucuz qiymətə satdığını və yaradılan şəraitdən razılığını bildirmişdir.

Burada məhsulların bolluğu və ucuzluğu diqqəti cəlb edirdi. Qoyun ətinin kiloqramı 4 manat 50 qəpiyə, mal əti 4 manata, quş əti 2 manat 60 qəpik-3 manata, kök, kələm, çuğundur, soğan və kartof 30-40-50 qəpiyə, yumurtanın biri 5 qəpiyə satılırdı.

Metronun “Əhmədli” stansiyasının yaxınlığında, “Azər” ticarət mərkəzində alıcılar məhsulların bolluğundan və qiymətindən razılıq edirdilər. Kənd Təsərrüfatı Nazirliyinin nümayəndəsi Namiq Qüdrətov bildirdi ki, burada satışa Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş 201 ton meyvə-tərəvəz, kartof, ət və digər məhsullar çıxarılmışdır. Satışda pomidor, xiyar, təzə kartof, çiyələk, alça çoxluq təşkil edirdi.

Suraxanıda “Günəş” ticarət mərkəzindəki yarmarkada şəhər sakinlərinə Samux, Daşkəsən, Quba, Biləsuvar və digər rayonlardan gətirilmiş 45 ton məhsul təklif olunurdu. Fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmağa imkan yaradılmışdı. Satışa çıxarılmış məhsullar arasında kartof, soğan, yerkökü, kələm, balqabaq, ət, süd məhsulları, göyərti, xiyar, alma, armud, qoz, fındıq, habelə istixana şəraitində yetişdirilmiş pomidor, eləcə də alça, çiyələk və digər məhsullar çoxluq təşkil edirdi.

Burada yumurtanın biri 5-6 qəpiyə, almanın kiloqramı 30-50 qəpiyə, qoz ləpəsi 2 manat -2 manat 50 qəpiyə, qoyun əti 4 manat 50 qəpiyə, mal əti 4 manata, quş əti 3 manat-3 manat 50 qəpiyə satılırdı. Yarmarkada alça və çiyələyin kiloqramı 1 manat-2 manat 50 qəpiyə təklif olunurdu. Alıcılar bildirmişlər ki, bu meyvələr bazarda 5, bəzən də 6 manata satılır. Ona görə də həmin məhsulları yarmarkadan almaq daha sərfəlidir.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya Cəlilabad rayonunun fermerləri 7 ton 300 kiloqram məhsul gətirmişdilər. Alıcılara təklif olunan ət, ağartı, kartof, soğan, alma, nar, heyva, toyuq əti, yumurta, alça, kələm, balqabaq, çiyələk və göyərtinin qiyməti bazardakından xeyli ucuz idi. Yarmarkalardan əlidolu çıxan sakinlər həm qiymətlərin ucuz olmasından, həm də mal və məhsulun çeşidinin çoxluğundan razılıq edirdilər.

Kənd Təsərrüfatı Nazirliyinin nümayəndəsi Mustafa Rüstəmov, bütün məhsulların keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır. Mövsümlə əlaqədar bəzi məhsulların çeşidinin artdığı bildirilmişdir.

Şənbə günü Yeni Yasamal yaşayış massivində “Dairə” adlanan ərazidəki ticarət mərkəzində təşkil edilmiş yarmarkada paytaxt sakinləri Salyan, Quba, Qusar, Dəvəçi, Astara, İmişli və digər rayonların fermer təsərrüfatlarından gətirilmiş ağartı, alma, yerkökü, çuğundur, xiyar, pomidor, kələm, sitrus meyvələri, göyərti və digər məhsulları həvəslə alırdılar. Nübar meyvə və tərəvəzlər - təzə kartof-soğanın, kələm, lobya, çiyələk, alça, gilas və digər məhsulların bolluğu alıcılarda xoş ovqat yaratmışdı. Yarmarkada kartof-soğan 50-60 qəpiyə, kələm 30-40 qəpiyə, çiyələk 1 manat- 1 manat 50 qəpiyə, alça növündən asılı olaraq 1-3 manata təklif olunurdu.

Kənd Təsərrüfatı Nazirliyinin nümayəndəsi Vahid Zərgərov bildirmişdir ki, bugünkü yarmarkaya fermerlər və şəxsi təsərrüfat sahibləri 50 ton məhsul gətirmişlər. O, satışa çıxarılan məhsullar arasında Salyan rayonundakı “Hacı Camalxan” kəndli fermer təsərrüfatından gətirilmiş süd məhsullarının, həmin rayondan Əlhəm Həsənovun, Astaradan Tariyel Məmmədovun müxtəlif çeşidli məhsullarının öz keyfiyyəti və ucuzluğu ilə seçildiyini vurğulamışdır. Alıcılar Salyandan - Miriş Mirişovun fermer təsərrüfatından gətirilmiş təzə mal və qoyun ətini də həvəslə alırdılar.

Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Ağdaş, Salyan, Sabirabad, Masallı, Quba və digər rayonların fermerləri satışa 6 tona yaxın kənd təsərrüfatı məhsulları çıxarmışdılar. Bundan əlavə, alıcılara Giləzi və Hacıqabul quşçuluq fabriklərindən 15 min 800 yumurta gətirilmişdi.

Cəlilabaddan gətirdiyi təzə kartofun kiloqramını 30-50 qəpiyə təklif edən fermer Şahin Vəliyev bildirdi ki, bu il əkin sahəsində məhsul olduqca boldur. Günün yeni başlamasına baxmayaraq 100 kiloqramdan çox kartof satmışam. Yer pulu ödəmədiyimə görə, burada məhsul satmaq çox əlverişlidir.

Kənd Təsərrüfatı Nazirliyinin nümayəndəsi Məmməd Həziyev dedi ki, burada məhsulun qiymətinə və keyfiyyətinə xüsusi nəzarət edilir. Təklif edilən məhsullar bazardakından 25-30 faiz ucuzdur.

Qəsəbə sakinləri Camal Nəbiyev, Baba Dadaşov, Vəli Vahidov və başqaları yarmarkaların davamlı təşkilindən razılıqla danışırdılar.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada kənd təsərrüfatı məhsullarının bolluğu diqqəti cəlb edirdi. Qazax Rayon İcra Hakimiyyətinin nümayəndəsi İman Məmmədov bildirmişdir ki, rayonun fermerləri bu gün satışa münasib qiymətə 5,4 ton kartof, 3,5 ton alma və digər məhsullar çıxarmışlar.

Sakinlər məhsulların həm təzə , həm də keyfiyyətli olduğunu söyləyirdilər.

Kənd Təsərrüfatı Nazirliyinin nümayəndəsi Qalib Hacızadə bu gün alıcılara Ağsu və Qazax rayonlarından gətirilmiş 19,6 ton məhsul təklif olunduğunu söyləmişdir.

Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da Ağstafa, Bərdə və Goranboy fermerləri satışa bazar qiymətlərindən 20-30 faiz ucuz olan kənd təsərrüfatı məhsulları çıxarmışdılar.

Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada şənbə günü satışa Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 21,8 ton məhsul çıxarılmışdır. Bundan əlavə, alıcılara Giləzi və Goradil broyler fabriklərindən 10 min yumurta təklif olunurdu.

Xaçmaz rayonunun Əhmədoba kəndinin sakini Əlisəfa Əsədovun yarmarkaya gətirdiyi 2 tondan artıq meyvə-tərəvəzi bakılılar həvəslə alırdılar.

Nərimanov Rayon İcra Hakimiyyətinin və Kənd Təsərrüfatı Nazirliyinin əməkdaşları yarmarkada məhsulun keyfiyyətinə və qiymətinə nəzarət edirdilər. Burada məhsulların qiyməti bazardakından xeyli ucuz idi.

######