BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 25 may (AZƏRTAC). Mayın 24-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdır.
Bazar günü “Təzə bazar” MMC-nin həyətindəki yarmarkada Sabirabad, Zərdab, Gədəbəy, Hacıqabul və digər rayonlardan gətirilmiş 9 tondan çox məhsul, o cümlədən 0,8 ton ət, 0,2 ton ağartı, 4 ton tərəvəz, 0,5 ton meyvə, 4 ton kartof, 2 min yumurta, 20 kiloqram bal təklif olunurdu.
Ümumilikdə şənbə və bazar günləri yarmarkada 22 tondan çox məhsul satılmışdır.
Bazar günü Yeni Yasamal yaşayış massivində, “Dairə” adlanan ərazidəki ticarət mərkəzində təşkil olunan yarmarkada Qusar, Salyan, İmişli, Dəvəçi, Astara, Quba və digər rayonların fermerləri bir gün əvvəl gətirdikləri 55,8 ton kənd təsərrüfatı məhsullarının çox hissəsini artıq satmışdılar.
Burada məhsulun keyfiyyətinə, sanitar-gigiyenik tələblərə əməl olunmasına ciddi nəzarət vardı. Baytar həkimi Çingiz Hüseynov bildirdi ki, gətirilən bütün məhsullar, xüsusilə də ət və ağartı məhsulları diqqətlə yoxlanılır, tələblərə uyğun gəlməyən malların satışına icazə verilmir.
Alıcılardan Əsgər Abbasov, Esmira Şirinova, Fərhad Ağayev, Əli Şükürov və başqaları hər həftənin istirahət günləri buradan istədikləri keyfiyyətli kənd təsərrüfatı məhsullarını ucuz qiymətlərə almaq imkanına malik olduqlarını dönə-dönə vurğulayır, bu xeyirxah tədbirin təşkilinə görə ölkə rəhbərliyinə təşəkkürlərini bildirirdilər.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarının fermerləri alıcılara tərəvəz, meyvə, konserv məhsulları, pendir, mal və qoyun əti, bal təklif edirdilər. Bazar qiymətlərindən çox ucuz olan bu məhsullar alıcılar tərəfindən həvəslə alınırdı. İşçi qrupunun qərargahından verilən məlumata görə, şənbə və bazar günləri burada 66,7 ton meyvə, 6,1 ton ət və digər kənd təsərrüfatı məhsulları satılmışdır.
Suraxanı rayonu ərazisindəki kənd təsərrüfatı məhsullarının satışı yarmarkalarında mayın 23-24-də 50 tondan çox məhsul satılmışdır. Bütün məhsulların keyfiyyəti ciddi surətdə yoxlanılmış, xüsusilə ət məhsulları baytar müayinəsindən keçirilmişdir.
Kənd Təsərrüfatı Nazirliyinin məsul işçisi Mustafa Rüstəmov demişdir ki, Suraxanıda “Günəş” ticarət mərkəzindəki yarmarkada 43 ton 350 kiloqram məhsul satılmışdır. Burada Samux, Daşkəsən, Quba, Biləsuvar, Balakən və digər rayonlardan gəlmiş fermerlərə və şəxsi təsərrüfat sahiblərinə satışa müxtəlif çeşidli məhsul çıxarmalarına bütün imkanlar yaradılmışdır. Yarmarkadakı məhsullar arasında kartof, soğan, yerkökü, kələm, göyərti, balqabaq, ət, süd məhsulları, göyərti, xiyar, badımcan, alma, armud, qoz, istixana şəraitində yetişdirilmiş pomidor, habelə alça, lobya, ərik, çiyələk və digər məhsullar çoxluq təşkil etmişdir.
Yarmarkada yumurtanın biri 5-6 qəpiyə, almanın kiloqramı 30-50 qəpiyə, qoz ləpəsi 2 manat-2 manat 50 qəpiyə, qoyun əti 4 manat 50 qəpiyə, mal əti 4 manata, quş əti 3 manat-3 manat 50 qəpiyə satılmışdır. Yarmarkada mövsümün əvvəlində yetişən alça və çiyələyin kiloqramı 1-2 manata, ərik isə 2-3 manata təklif olunurdu. Alıcılar bildirmişlər ki, burada satılan məhsulların qiymətləri bazardakından xeyli ucuz olduğu üçün onları yarmarkadan almaq daha sərfəlidir.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri 7 ton 450 kiloqram məhsul satmışlar. Burada sakinlərə bazar qiymətlərindən xeyli ucuz ət, kartof, soğan, alma, toyuq əti, yumurta, çiyələk, kələm, balqabaq, alça, göyərti və s. təklif olunmuşdur.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada satışa müxtəlif meyvə-tərəvəz, o cümlədən kələm, kök, soğan, alma, xiyar, kartof, pomidor çıxarılmışdı. Sakinlər Ağsu və Qazax rayonlarından gətirilmiş və bazar qiymətlərindən 30-35 faiz ucuz təklif olunan məhsulları həvəslə alırdılar.
İşçi qrupundan verilən məlumata görə, şənbə-bazar günləri yarmarkada 19,4 ton məhsul satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada alıcılar Goranboy, Ağstafa və Bərdə rayonlarından gətirilmiş keyfiyyətli kənd təsərrüfatı məhsullarını ucuz qiymətə həvəslə alırdılar.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, şənbə-bazar günləri Nərimanov rayonunun Ə.Əliyev küçəsindəki yarmarkada satışa Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 20,3 ton məhsul çıxarılmışdır. Bundan əlavə, alıcılara Giləzi və Goradil broyler fabriklərindən 10 min yumurta təklif olunurdu.
Alıcılardan Tünzalə İbadova, Səkinə Şirinova və Samirə Qarayeva bazarlıqlarını həmişə yarmarkadan etdiklərini, məhsulların keyfiyyətindən və qiymətindən razılıqlarını bildirmişlər.
Nərimanov Rayon İcra Hakimiyyətinin və Kənd Təsərrüfatı Nazirliyinin əməkdaşları yarmarkada məhsulun keyfiyyətinə və qiymətinə nəzarət edirdilər. Burada məhsulların qiyməti bazardakından xeyli ucuz idi.
######
Bölmənin digər xəbərləri
