BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 1 iyun (AZƏRTAC). Mayın 31-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada satışa Sabirabad, Zərdab, Gədəbəy, Hacıqabul və digər rayonlardan gətirilmiş 9 tona yaxın müxtəlif çeşidli kənd təsərrüfatı məhsulları çıxarılmışdı. Yarmarkada kartof, soğan və s. satan gədəbəyli Suliddin Həsənov bildirdi ki, iki ildir hər həftə ardıcıl olaraq bura məhsul gətirir. İndiyədək 15 tondan çox məhsul satmışdır. Sabirabadlı Ceyhun Əhmədov isə ilk dəfədir yarmarkaya gəlir. O, bakılılara mal əti təklif edirdi. Kənd Təsərrüfatı Nazirliyinin nümayəndəsi Fərhad Qəmbərov dedi ki, ümumilikdə şənbə və bazar günü yarmarkada 22 tondan çox məhsul satılmışdır.
Bakı Rabitə və Nəqliyyat Kollecinin həyətindəki yarmarkada Kənd Təsərrüfatı Nazirliyinin nümayəndəsi Saleh Zərbəliyev bildirdi ki, bazar günü alıcıların sayı xeyli artmışdır. Bunun nəticəsidir ki, Salyan, Quba, Dəvəçi, Qusar, Astara, İmişli və digər rayonların fermerləri gətirdikləri məhsulun əksər hissəsini satıb qurtarmışlar. Məhsulun keyfiyyətinə, sanitar-gigiyenik tələblərə əməl olunmasına ciddi nəzarət olunur.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarının fermerləri alıcılara gilas, alça, çiyələk, ərik, pomidor, xiyar, göyərti, kartof, soğan, pendir, mal və qoyun əti təklif edirdilər. Şəhər sakinləri istədikləri məhsulu münasib qiymətə ala bilirdilər. İşçi qrupunun qərargahından verilən məlumata görə, şənbə və bazar günləri burada 94 ton tərəvəz, 60 ton meyvə, 32,7 ton kartof və digər məhsullar satılmışdır.
Suraxanıdakı yarmarkalarda şənbə və bazar günləri 52 ton 250 kiloqram məhsul satılmışdır. Kənd Təsərrüfatı Nazirliyinin nümayəndəsi Mustafa Rüstəmov demişdir ki, bunun 42 ton 250 kiloqramı “Günəş” ticarət mərkəzindəki yarmarkanın payına düşür. Burada satışa Samux, Daşkəsən, Quba, Biləsuvar, Balakən və digər rayonlardan gətirilmiş meyvə-tərəvəz və digər məhsullar çıxarılmışdır. Məhsullar arasında kartof, soğan, yerkökü, kələm, göyərti, balqabaq, ət, süd məhsulları, göyərti, yerli xiyar, badımcan, alma, armud, qoz, istixana şəraitində yetişdirilmiş pomidor, lobya, habelə alça, çiyələk, gilas, ərik çoxluq təşkil etmişdir. “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri sakinlərə bazar qiymətindən xeyli ucuz ət, ağartı, kartof, soğan, alma, nar, heyva, toyuq əti, yumurta, kələm, balqabaq, göyərti, alça, çiyələk, gilas, lobya, ərik və s. təklif etmişlər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkadan şəhər sakinləri həvəslə təzə meyvə-tərəvəz, süd məhsulları alırdılar. Ağsu və Qazax rayonlarının fermerləri gətirdikləri məhsulları bazardakından 20-30 faiz ucuz qiymətə təklif edirdilər. Ağsu rayon icra hakimiyyəti başçısının müavini Elxan Abdullayevin verdiyi məlumata görə, şənbə və bazar günlərində burada 18 tondan çox məhsul satılmışdır.
Goranboy, Ağstafa və Bərdə fermerləri isə Binəqədi rayonunda, 6 nömrəli Bakı Texniki Peşə Liseyinin qarşısındakı yarmarkada satışa ucuz qiymətlərə kələm, kartof, kök, soğan, digər məhsullar çıxarmışdılar.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada şənbə-bazar günləri Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 17,2 ton meyvə-tərəvəz, ağartı, Giləzi və Goradil broyler fabriklərindən 6 min yumurta satılmışdır.
######
 |
 |
Bölmənin digər xəbərləri
