BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 8 iyun (AZƏRTAC). İyunun 7-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
Bazar günü Bakı Rabitə və Nəqliyyat Kollecinin həyətindəki yarmarkada alıcıların sayı əvvəlki həftə ilə müqayisədə xeyli çox idi. Kənd Təsərrüfatı Nazirliyinin nümayəndəsi Vahid Zərgərovun verdiyi məlumata görə, Salyan, Quba, Dəvəçi, Qusar, Astara və digər rayonların fermerləri yarmarkaya gətirdikləri 54,2 ton müxtəlif çeşidli məhsulun əksər hissəsini satıb qurtarmışlar. Burada məhsulun keyfiyyətinə, sanitar-gigiyenik tələblərə əməl olunmasına ciddi nəzarət edilir.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada şəhər əhalisi satışa çıxarılan kənd təsərrüfatı məhsullarının bolluğundan razılıq edirdilər. İşçi qrupunun qərargahından verilən məlumata görə, şənbə və bazar günləri bu yarmarkada 101,2 ton tərəvəz, 61 ton meyvə və digər kənd təsərrüfatı məhsulları satılmışdır. Yarmarkaya Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş məhsulların qiymətləri bazardakından 20-25 faiz ucuz olmuşdur.
İyunun 6-7-də Suraxanı rayonu ərazisində təşkil olunmuş yarmarkalarda 52 ton 700 kiloqram məhsul satılmışdır. Rayonun “Günəş” ticarət mərkəzindəki yarmarkada sakinlər Samux, Daşkəsən, Quba, Biləsuvar, Balakən və digər rayonlardan gətirilmiş kartof, soğan, yerkökü, kələm, göyərti, balqabaq, ət, süd məhsulları, göyərti, yerli xiyar, badımcan, yay alması, armud, qoz, pomidor, lobya, habelə alça, çiyələk, gilas, ərik və digər məhsulları həvəslə alırdılar. Burada yumurtanın biri 5-6 qəpiyə, yay almasının kiloqramı 1 manata, qoyun əti 5 manat - 5 manat 50 qəpiyə, mal əti 4 manata, quş əti 3 manata satılmışdır. Alıcılar bildirmişlər ki, bazarlarda bu məhsullar 2 dəfə, bəzən daha baha olduğu üçün onları yarmarkadan almaq daha sərfəlidir. “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri sakinlərə bazardakından xeyli ucuz ət, ağartı, kartof, soğan, alma, nar, heyva, toyuq əti, yumurta, kələm, balqabaq, göyərti, alça, çiyələk, gilas, lobya, ərik və s. satmışlar.
Kənd Təsərrüfatı Nazirliyinin nümayəndəsi Fərhad Eminov bildirmişdir ki, Nərimanov rayonunun Ə.Əliyev küçəsindəki yarmarkada Xaçmaz, İmişli, Tərtər, Tovuz, Oğuz, Astara rayonlarının fermerləri şənbə-bazar günləri alıcılara 22,7 ton kənd təsərrüfatı məhsullarını təklif etmişlər. Qiymətlərin bazardakından 30-35 faizə qədər ucuz olması alıcıların yarmarkaya axınını artırmışdır.
######
Bölmənin digər xəbərləri
