BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 13 iyun (AZƏRTAC). İyunun 13-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan 13 tondan çox məhsul gətirilmişdi. Burada məhsulların bolluğu və ucuzluğu diqqəti cəlb edirdi. Qoyun ətinin kiloqramı 4 manat 50 qəpiyə, mal əti 4 manata, quş əti 2 manat 80-3 manat 20 qəpiyə, kök, kələm, çuğundur, soğan və kartof 30-50 qəpiyə, yumurtanın biri 5 qəpiyə satılırdı. Yarmarkada hər həftə iştirak edən gədəbəyli fermer Cəmil İsayev bu dəfə 2 tondan çox kartof, soğan, kələm, yerkökü və çuğundur gətirmişdi. Məhsulları ucuz qiymətə satdığını və yaradılan şəraitdən razılığını bildirdi.
Bakı Rabitə və Nəqliyyat Kollecinin həyətində təşkil olunmuş yarmarkada məhsulun bolluğu və çeşidlərin müxtəlifliyi, xüsusilə mövsümi meyvə və tərəvəzin çox olması qiymətlərə xeyli təsir göstərmiş, alıcıların seçim imkanını artırmışdı. Burada qiymətlər bazarlarla müqayisədə 30-40 faiz ucuz idi. Salyan, Qusar, Dəvəçi, Astara, Quba, İmişli və digər rayonların fermer və şəxsi təsərrüfatlarından gətirilmiş nübar məhsullar, o cümlədən təzə kələm, kartof, soğan, badımcan, yerkökü, çuğundur, xiyar, pomidor, bibər, ağartı məhsulları, alça, gilas, ərik, gilənar, sitrus meyvələri, göyərti və digər məhsullar çoxluq təşkil edirdi. Kənd Təsərrüfatı Nazirliyinin nümayəndəsi Vahid Zərgərov bildirdi ki, bu gün fermerlər və şəxsi təsərrüfat sahibləri paytaxt sakinlərinə 54,9 ton məhsul təklif edirlər. Salyan rayonundan Miriş Mirişovun fermer təsərrüfatından gətirilmiş təzə mal və qoyun ətinin alıcıları daha çoxdur. Çünki həmin məhsullar bazarlardakından xeyli ucuzdur.
Badamdar qəsəbəsində 239 nömrəli məktəbin yaxınlığındakı yarmarkada satışa Ağdaş, Salyan, Sabirabad, Quba və digər rayonlardan gətirilmiş 9 tondan çox kənd təsərrüfatı məhsulları və Giləzi, Hacıqabul quşçuluq fabriklərindən 26 min 600 ədəd yumurta gətirilmişdi. Qəsəbə sakinləri təzə məhsulları həvəslə alırdılar. Təzə kartofun, çiyələyin, gilasın alıcısı daha çox idi. Ağdaşdan gətirdiyi gilasın kiloqramını 80 qəpiyə və 1 manat 30 qəpiyə təklif edən Fazil Məmmədov dedi ki, bu il məhsul boldur. Bu gün satışa 150 kiloqrama yaxın mal çıxarmışam. Artıq onun 40 faizdən çoxunu satmışam. Kənd Təsərrüfatı Nazirliyinin nümayəndəsi Məmməd Həziyevin sözlərinə görə, yarmarkada təklif edilən məhsullar bazardakından 25-30 faiz ucuzdur.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada paytaxt sakinləri bazardakından xeyli ucuz olan məhsulları həvəslə alırdılar. Kənd Təsərrüfatı Nazirliyinin nümayəndəsi Namiq Qüdrətov bildirdi ki, Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından yarmarkaya 211, 2 ton çox keyfiyyətli məhsullar gətirilmişdir. Badımcan, pomidor, xiyar, alça, gilas, çiyələk və əriyin alıcıları çoxluq təşkil edir. Şəhər sakinləri burada həvəslə bazarlıq edirlər.
Kənd Təsərrüfatı Nazirliyinin nümayəndəsi Qalib Hacızadə bildirdi ki, Biləcəri qəsəbəsində, 284 nömrəli orta məktəbin qarşısındakı yarmarkaya Qazax və Ağsu fermerləri ümumilikdə 19,7 ton məhsul gətirmişlər. Şəhər sakinləri ucuz kartof, kələm, soğan, alma, digər meyvə-tərəvəzi həvəslə alırdılar.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə Goranboy, Ağstafa və Bərdəli fermerləri alıcılara bazardakından ucuz qiymətlərə məhsul təklif edirdilər.
Kənd Təsərrüfatı Nazirliyinin nümayəndəsi Savalan Seyfəddinovun verdiyi məlumata görə, Nərimanov rayonunun Ə.Əliyev küçəsindəki yarmarkada şənbə günü satışa Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 24,3 ton məhsul çıxarılmışdır. Bundan əlavə, alıcılara Giləzi və Goradil broyler fabriklərindən 20 min yumurta təklif olunur. Xaçmaz rayonunun Hülövlü kənd sakini Tərlan Əhmədov şəxsi təsərrüfatından 3 tondan çox meyvə-tərəvəz gətirmişdir.
Alıcılar Dürdanə İbişova, Sədaqət Səlimova və Gülnaz Qədimova mösümi məhsulları, yumurtanı, toyuğu və göyərtini həmişə yarmarkadan aldıqlarını, malların keyfiyyətindən və qiyymətindən razı qaldıqlarını bildirmişlər.
Nərimanov Rayon İcra Hakimiyyətinin və Kənd Təsərrüfatı Nazirliyinin əməkdaşları yarmarkada məhsulun keyfiyyətinə və qiymətinə nəzarət edirdilər.
######
Bölmənin digər xəbərləri
