BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 22 iyun (AZƏRTAC). İyunun 21-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada şəhər sakinləri Sabirabad, Zərdab, Gədəbəy, Hacıqabul və digər rayonlardan gətirilmiş meyvə-tərəvəz, bostan və digər kənd təsərrüfatı məhsullarını həvəslə alırdılar. Burada alma, gilas, ərik, çiyələk, armud, kartof, soğan, kələm və heyvandarlıq məhsulları çoxluq təşkil edirdi. Kənd Təsərrüfatı Nazirliyinin nümayəndəsi Fərhad Qəmbərov məlumat verdi ki, şənbə və bazar günləri yarmarkaya 21 tondan çox məhsul çıxarılmışdır. Alıcılardan Hədiyyə Qasımova, Sevinc Zeynalova və başqaları bildirirdilər ki, yarmarkada belə bolluğun yaradılması, qiymətlərin bazardakından qat-qat ucuz olması ürəkaçandır.
Bazar günü Bakı Rabitə və Nəqliyyat Kollecinin həyətində təşkil olunan yarmarkada Kənd Təsərrüfatı Nazirliyinin nümayəndəsi Vahid Zərgərov alıcıların sayının çoxluğunu buraya gətirilən mövsümi meyvə və tərəvəz məhsullarının çoxluğu və qiymətlərin ucuzluğu ilə əlaqələndirdi. Bildirdi ki, məhz bu səbəbdən artıq Salyan, Quba, Dəvəçi, Qusar, Astara və digər rayonların fermerləri və şəxsi təsərrüfat sahibləri bir gün əvvəl gətirdikləri 60,4 ton məhsulun əksər hissəsini satıb qurtarmışlar. Yarmarkada alıcılara təklif olunan kənd təsərrüfatı məhsulları arasında kartof, soğan, lobya, badımcan, xiyar, pomidor, kələm, yerkökü, sarımsaq, alça, ərik, gilas, yay alması, ağartı məhsulları, göyərti və s. çoxluq təşkil edirdi.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada şənbə və bazar günləri 119,8 ton tərəvəz, 52,5 ton meyvə, 5,6 ton ət, 35 ton kartof və digər kənd təsərrüfatı məhsulları satılmışdır. Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş bu məhsullar alıcılara bazardakından xeyli ucuz qiymətə təklif olunmuşdur.
Biləcəri qəsəbəsində 284 nömrəli orta məktəbin qarşısındakı yarmarkada əhaliyə bazardakından 30-35 faiz ucuz qiymətlərə badımcan, kələm, soğan, pomidor, kartof, lobya, kök və digər məhsullar təklif olunurdu. Paytaxt sakinləri Qazax və Ağsudan gətirilmiş meyvə-tərəvəzi, digər məhsulları həvəslə alırdılar. Şənbə və bazar günləri yarmarkada ümumilikdə 19 tonadək müxtəlif çeşiddə məhsul satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə Bərdə, Goranboy və Ağstafa fermerləri alıcılara ucuz qiymətlərə kənd təsərrüfatı məhsulları təklif edirdilər.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada iki gün ərzində Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 29,5 ton məhsul, Giləzi və Goradil broyler fabriklərindən 20 min yumurta satılmışdır.
Burada kartof və xiyarın kiloqramı 30, soğan, kələm 40, pomidor 70 qəpiyə, gilas, ərik 1 manat 50 qəpiyə, mal əti 4 manata, qoyun əti 4 manat 50 qəpiyə təklif olunurdu.
Bölmənin digər xəbərləri
