Bakıda “Mənim şəhərim, mənim evim” ekoloji layihəsinin icrasına başlanılmışdır
Bakı, 12 sentyabr (AZƏRTAC). Azərbaycan Gənclər Fondunun dəstəyi ilə “Dünya Gəncləri Alyansı” İctimai Birliyi “Mənim şəhərim, mənim evim” ekoloji layihəsinin icrasına başlamışdır.
Fondun mətbuat xidmətindən AZƏRTAC-a bildirmişlər ki, layihə Bakı şəhərini əhatə edəcəkdir.
Layihənin məqsədi küçələrə və parklara məişət tullantılarının atılmasının qarşısının alınması üçün bir ay müddətində paytaxt sakinləri arasında maarifləndirmə işinin aparılmasıdır.
Layihə fərqli təbliğat formasında həyata keçiriləcəkdir. Belə ki, üzərində “Mənim şəhərim, mənim evim” və ya “Şəhərimizi təmiz saxlayaq” şüarları yazılmış ətirli asılqanlar, əl güzgüləri və breloklar şəhər sakinlərinə paylanılacaqdır.
Bundan başqa, Dənizkənarı Milli Parkda və digər mərkəzi yerlərdə satılan istehlak məhsullarının üzərinə eyni şüarların yazıldığı stikerlərin yapışdırılması nəzərdə tutulmuşdur.
Bölmənin digər xəbərləri
