Bakı, 19 sentyabr, AZƏRTAC

Azərbaycan Professional Maliyyə Menecerləri Assosiasiyası və SOCAR Bakı Ali Neft Məktəbinin birgə təşkilatçılığı ilə Bakıda “Yaşıl iqtisadiyyat şəraitində hesabatlılıq və şəffaflıq” mövzusunda Mühasiblərin və Auditorların VIII Avrasiya Forumu keçirilib.

AZƏRTAC xəbər verir ki, forumda Azərbaycan Professional Maliyyə Menecerləri Assosiasiyasının sədri Nuriyyə Novruzova açılış nitqi ilə çıxış edib. Bildirib ki, dünyada ətraf mühitin çirklənməsi, təbii ehtiyatların azalması fonunda dayanıqlıq inkişafa nail olmaq üçün yaşıl iqtisadiyyata töhfə istiqamətində tədbirlər davam edir.

“Bugünkü forum çərçivəsində xarici ölkələrin mühasibat və audit sahəsində fəaliyyət göstərən qurumlarla bağlanacaq əməkdaşlıq memorandumları gələcəkdə əlaqələrin davam etdirilməsi üçün zəmin yaradacaq”, - deyə Nuriyyə Novruzova vurğulayıb.

SOCAR Bakı Ali Neft Məktəbinin rektoru Elmar Qasımov bildirib ki, bugünkü tədbirin Bakı Ali Neft Məktəbində (BANM) keçirilməsi də səbəbsiz deyil.

“Bu gün ölkəmizdə mühəndis ixtisaslarına böyük maraq var. Bu, ölkə iqtisadiyyatı üçün önəmlidir. Tələbələr əsasən bu ixtisasa üstünlük verirlər. Müəssisələrdə yüksəkixtisaslı maliyyəçilərə, peşəkar, şəffaf mühasiblərə böyük ehtiyac var. Hazırda bütün dünyada ətraf mühitin çirklənməsi, təbii ehtiyatların azalması və eyni zamanda, onlara artan tələbat fonunda dayanıqlı inkişafa nail olmaq üçün yaşıl iqtisadiyyatın genişləndirilməsi istiqamətində həyata keçirilən tədbirlər böyük əhəmiyyət daşıyır”, - deyə BANM rektoru bildirib.

Maliyyə nazirinin müavini Azər Bayramov deyib ki, yaşıl iqtisadiyyata keçid həm də təbii ehtiyatlardan daha səmərəli istifadəni və ətraf mühitə dəyən zərərin azaldılmasını tələb edir.

“Bu gün aydındır ki, inkişafın yeni mərhələsinə keçid mühüm səylər tələb edir. Artan ehtiyacları və təbii çağırışlara hazırlığı nəzərə alsaq, dayanıqlı inkişafa nail olmaq üçün həm iqtisadi, həm də sosial tədbirlər vacibdir. Azərbaycan hökuməti ölkənin sosial-iqtisadi inkişafı üzərində fəal işləyir, ekoloji təmiz texnologiyalar və tullantıların təkrar emalı məsələlərinə diqqət yetirir”, - deyə nazir müavini əlavə edib.

Naxçıvan Muxtar Respublikasının maliyyə naziri Həsən İsmayılov diqqətə çatdırıb ki, Naxçıvanda maliyyə uçotu və nəzarəti sahəsində innovativ yanaşmalar fəal şəkildə tətbiq edilir. O qeyd edib ki, iqtisadi fəaliyyətin davamlılığının, şəffaflığının təmin edilməsində dövlətin maliyyə sistemi mühüm rol oynayır və bu sahədə şəffaflıq məsələləri qanunvericilik səviyyəsində tənzimlənir.

“Dövlətin maliyyə nəzarəti, nəzarət mexanizmləri mühasibat uçotu, audit proseslərini daha dəqiq və şəffaf edir. Nəticədə maliyyə riskləri azalır ki, bu da dövlət maliyyəsinin dayanıqlığını qorumağa imkan verir. Mühasibat uçotu və audit sisteminin inkişafı dövlətin iqtisadi-maliyyə strategiyasının uğurla həyata keçirilməsində həlledici rol oynayır”, - deyə muxtar respublikanın maliyyə naziri əlavə edib.

Vergi siyasəti baş idarəsi Qanunvericiliyin monitorinqi və sahibkarlıq subyektləri ilə iş idarəsinin rəisi Əhməd Əhmədov bildirib ki, Azərbaycanda karbon vergisinin tətbiq edilməsi nəzərdən keçirilir. O qeyd edib ki, karbon emissiyasının azaldılması məqsədilə beynəlxalq təcrübə nəzərə alınmaqla karbon vergisinin və ya analoji verginin tətbiqi imkanlarının qiymətləndirilməsi, ətraf mühitin qorunması üçün dünya ölkələri tərəfindən yaşıl iqtisadiyyatla bağlı tətbiq olunan digər alətlərin istifadəsi diqqət mərkəzindədir.

Dövlət Maliyyə Mərkəzinin maliyyə müdiri Rahib Allahverdiyev vurğulayıb ki, bu ilin əvvəlindən Dövlət İmtahan Mərkəzinin elektron xidmətlərindən istifadənin sayı 11 milyonu ötüb. O qeyd edib ki, bu yaxınlarda DİM elektron imtahanlar korpusunu istifadəyə verib: “Burada bulud əsaslı texnologiyadan istifadə edilir. Burda 45 növ elektron imtahan növü var. Gün ərzində ikinövbəli şəkildə 1,7 min elektron imtahan keçiriləcək”.

Forum iştirakçıları Azərbaycanda şəffaflığın artırılması və maliyyə nəzarətinin gücləndirilməsi sahəsində beynəlxalq audit və beynəlxalq mühasibat uçotu standartlarına keçidin əhəmiyyəti xüsusi olaraq vurğulayıblar. Bildirilib ki, həyata keçirilmiş kompleks tədbirlər yeni dövrün iqtisadi çağırışlarını nəzərə almaqla, ölkədə maliyyə-uçot sisteminin beynəlxalq tələblər əsasında təkmilləşdirilməsinə, iqtisadiyyatımızın dünya təsərrüfat sisteminə inteqrasiya imkanlarının gücləndirilməsinə şərait yaradıb. Bugünkü konfrans dayanıqlı inkişaf, hesabatlılıq, şəffaflıq məsələləri ilə bağlı qlobal gündəlikdə dayanan çağırışların və imkanların müzakirəsi, bu sahədə qabaqcıl təcrübə mübadiləsi üçün əlverişli fürsətdir və şəffaflıq mühitinin daha da yaxşılaşdırılması imkanlarının müəyyənləşdirilməsi baxımından faydalı olacaq.

Forum çərçivəsində xarici ölkələrin mühasibat və audit sahəsində fəaliyyət göstərən peşəkar qurumları ilə təşkilatçılar arasında əməkdaşlıq memorandumları imzalanıb. Belə ki, SOCAR Bakı Ali Neft Məktəbi ilə Böyük Britaniyanın Dövlət Maliyyəsi və Mühasibatlıq İnstitutu arasında anlaşma memorandumu, Rumıniya Maliyyə Auditorları Palatası ilə Azərbaycan Peşəkar Maliyyə Menecerləri Assosiasiyası arasında əməkdaşlıq memorandumu, Monteneqro Mühasiblər və Auditorlar İnstitutu ilə Azərbaycan Peşəkar Maliyyə Menecerləri Assosiasiyası arasında əməkdaşlıq memorandumu və Özbəkistan Auditorlar Palatası ilə Azərbaycan Peşəkar Maliyyə Menecerləri Assosiasiyası arasında dördüncü əməkdaşlıq memorandumu imzalanıb.