Doğma Azərbaycanımızın hər yerində xalqımız qədim el bayramı olan Novruzu böyük sevinc və yüksək əhval-ruhiyyə ilə qarşılayır. Azərbaycan Prezidentinin Novruz bayramı münasibətilə xalqımıza təbrikində deyildiyi kimi, bu əziz bayramı müstəqil Azərbaycanın vətəndaşları ilə birlikdə müxtəlif xarici ölkələrdə yaşayan soydaşlarımız da böyük sevinc və fərəhlə qeyd edirlər. Dünya azərbaycanlılarının həqiqi həmrəylik rəmzi kimi bu bayram olduqca böyük rol oynayır, onların ana Vətənə qırılmaz tellərlə bağlılıqlarını daha da gücləndirir.

Həmişə olduğu kimi, bu dəfə də baharın gəlişi münasibətilə ən izdihamlı bayram şənlikləri ölkəmizin paytaxtı Bakıda keçirilmişdir. Martın 20-də qədim İçərişəhərin darvazaları qarşısında - Gənclər meydanında bayram münasibətilə böyük mərasim təşkil olunmuşdu. Ətrafdakı binaları, əsrlərin şahidi olan qədim qala divarlarını al-əlvan plakatlar bəzəyirdi.

Azərbaycan Prezidenti İlham Əliyev, xanımı Mehriban Əliyeva Novruz şənliklərində iştirak etmək üçün Gənclər meydanına gəldilər. Meydana toplaşmış minlərlə şəhər sakini dövlətimizin başçısını, onun xanımını hərarətlə, sürəkli alqışlarla qarşıladı, onlara bahar ətirli gül-çiçək dəstələri, Bahar qız isə el adətincə səməni və xonça təqdim etdi. Dövlətimizin başçısı Novruz tonqalını alovlandırdı.

Qədim tariximizi əks etdirən səhnələr - İçərişəhərin qala divarları üstündə dayanmış qılınc və qalxanlı döyüşçülər, Dədə Qorqudun xalqa xitabı, öyüd-nəsihəti, igidləri düşmən üzərində qələbəyə səsləməsi, bahar bayramının millətimizə ruzi-bərəkət gətirməsi üçün xeyir-dua verməsi qəhrəmanlıqla dolu keçmişimizin mənzərəsini canlandırırdı.

Şən, oynaq musiqi sədaları ətrafı bürümüşdü. Milli geyimli uşaqlar meydanda rəqs edirdilər. İncəsənət ustalarının baharı, Azərbaycanı tərənnüm edən mahnıları dalğa-dalğa hər tərəfə yayılır, bayram mərasiminin iştirakçılarında daha xoş ovqat doğururdu.

Prezident İlham Əliyev şənliyə toplaşmış paytaxt sakinləri ilə səmimiyyətlə salamlaşdı, onları Novruz bayramı münasibətilə təbrik etdi.

Dövlətimizin başçısı bayram şənliyində nitq söylədi.