BAKIDA TÜRKİYƏ SƏFİRLİYİNİN YENİ BİNASININ AÇILIŞI MƏRASİMİNDƏ AZƏRBAYCAN PREZİDENTİ İLHAM ƏLİYEVİN NİTQİ
- Əziz dostlar!Bacılar və qardaşlar!
Bu gün çox gözəl bir gündür. Bu gün səhər biz birlikdə Türkiyə və Azərbaycan diaspor təşkilatlarının I forumunu keçirdik. Forum bizim birliyimizin, qardaşlığımızın təntənəsi olmuşdur. Forumda səslənən fikirlər, deyilən sözlər hamısı ürəkdən deyilən səmimi sözlərdir. Əminəm ki, belə tədbirin Bakıda keçirilməsi və onun nəticələri bizim aramızda olan dostluq, qardaşlıq münasibətlərinin inkişafına çox böyük xidmət edəcəkdir.
Türkiyə və Azərbaycan iki dost, qardaş ölkədir. Azərbaycan dövlət müstəqilliyini bərpa etdikdən sonra Türkiyə bizi tanıyan ilk dövlət olmuşdur və bu addımla digər ölkələrə də yol göstərdi. Məhz Türkiyə dövlətinin birinci addımından sonra Azərbaycanın beynəlxalq səviyyədə tanınması sürətlə getdi. Azərbaycan xalqı bunu həmişə qiymətləndirir və həmişə yadda saxlayır.
Mən bu gün forumda çıxış edərkən bir məsələyə də toxundum və yada saldım. Bizim xaricdəki ilk nümayəndələrimiz məhz xaricdə 
fəaliyyət göstərən türk səfirliklərində işə başlamışdı. Başqa hansı ölkə öz səfirliyini digər ölkənin səfirliyinin üzünə açdı?! Heç bir ölkə bunu etməzdi. Yalnız qardaş ölkə, yalnız dost ölkə edərdi. Bu gün artıq Azərbaycanın onlarca müxtəlif ölkədə səfirlikləri fəaliyyət göstərir. Xaricdəki Türkiyə və Azərbaycan səfirlikləri də birgə fəaliyyət göstərirlər. Biz xarici ölkələrdə olarkən həmişə bütün tədbirlərdə qardaş ölkənin diplomatları ilə görüşürük. Onlar həmişə bizim tədbirlərimizə gəlirlər və bizə dəstək verirlər.
fəaliyyət göstərən türk səfirliklərində işə başlamışdı. Başqa hansı ölkə öz səfirliyini digər ölkənin səfirliyinin üzünə açdı?! Heç bir ölkə bunu etməzdi. Yalnız qardaş ölkə, yalnız dost ölkə edərdi. Bu gün artıq Azərbaycanın onlarca müxtəlif ölkədə səfirlikləri fəaliyyət göstərir. Xaricdəki Türkiyə və Azərbaycan səfirlikləri də birgə fəaliyyət göstərirlər. Biz xarici ölkələrdə olarkən həmişə bütün tədbirlərdə qardaş ölkənin diplomatları ilə görüşürük. Onlar həmişə bizim tədbirlərimizə gəlirlər və bizə dəstək verirlər.Yaranan yeni durum, əlbəttə ki, bizim ölkələrimizin iqtisadi və siyasi potensialının təzahürüdür, onu göstərir. Biz çox şeyə qadirik və qısa müddət ərzində, cəmi 15 il ərzində iki ölkə bir-birinə çox yaxın oldu. Bizim xalqlarımız əsrlər boyu birgə yaşamışlar, əsrlər boyu bir-birinə qardaş demişlər. Müstəqil ölkə kimi biz, sadəcə, 15 ildir fəaliyyət göstəririk və tarix baxımından çox qısa müddət ərzində böyük uğurlar əldə etmişik. Bizim təşəbbüsümüzlə bölgədə gedən nəhəng layihələr artıq reallığa çevrilibdir. Bizim siyasi iradəmiz əsasında Avropa üçün, bölgə üçün çox böyük əhəmiyyət kəsb edən məsələlər öz həllini tapır. Bizim hərtərəfli əməkdaşlığımız xalqlarımız, ölkələrimiz üçün və bütün türk dünyasının inkişafı və birləşməsi üçün önəmlidir.
Bugünkü forumda müxtəlif ölkələrin nümayəndələri, o cümlədən türk dünyasının nümayəndələri iştirak edirdilər. Bu forum bizi daha da birləşdirir. Belə tədbirlərin keçirilməsi çox önəmlidir. Türkdilli ölkələrin dövlət başçılarının zirvə görüşləri, türk cəmiyyətlərinin qurultayı, dünya azərbaycanlılarının qurultayları, Türkiyə, Azərbaycan diaspor təşkilatlarının forumu - bütün bu hadisələr, bütün bu tədbirlər çox böyük əhəmiyyət kəsb edir. Bizi birləşdirir, aramızda olan qardaşlığı daha da möhkəmləndirir. Bizim də arzumuz budur, istəyirik ki, Türkiyə ilə Azərbaycan bir-birinə daha da yaxın olsunlar. Xalqlarımız daha da sıx əlaqədə olsunlar və bunu görəndə ürəyimiz sevinir.
Bu gün gözəl mərasimdə, səfirliyin gözəl binasının açılışında ürək sözlərimi sizinlə paylaşmaq istəyirəm. Mən çox xoşbəxtəm ki, bu səfirliyin açılışında əziz qardaşım, Türkiyənin Baş naziri Rəcəb Tayyib Ərdoğan xanımı ilə, ailəsi ilə iştirak edir. Biz bir ailəyik. Xalqlarımız da bir ailədir. İnsanlar da bir-birinə qardaşdır, dostdur. Bu da ölkələrimizin inkişafında, bütün türk dünyasının birləşməsində çox önəmli rol oynayır. Əgər son illərin hadisələrini bir daha təhlil etsək görərik ki, məhz Türkiyə və Azərbaycan dövlətlərinin təşəbbüsü ilə bütün türk dünyasının birləşməsi prosesi sürətlə gedir. Təşəbbüskarlar məhz bizik. Bu təşəbbüsləri biz irəli sürürük və beləliklə, başqa ölkələrdə yaşayan qardaşlarımızı da bütün bu tədbirlərə dəvət edirik.
Bu gün mənim əziz dostum, qardaşım Tayyib bəy bu səfirliyin yaranmasının tarixinə toxundu. Bunun çox gözəl tarixi var. Mənim atam, ulu öndər Heydər Əliyevin tapşırığı ilə bu gözəl yer Türkiyə səfirliyinin binasının tikilməsi üçün verilmişdir. Biz bunun təməlini qoyanda, - hörmətli Baş nazirin qeyd etdiyi kimi, - burada da kiçik bir ərazi sanki səfirliyin ərazisinin içinə girib bu gözəl binanın tikilməsinə imkan vermirdi. O zaman biz xəritə üzərində bir az çalışdıq. Tayyib bəy bir şeyi unutdu, mən nəinki o xətti çəkdim, ərazini böyütdüm, hətta Bakı Şəhəri İcra Hakimiyyətinin başçısını, yəni Bakının valisini də dəvət etdim və dedim ki, bu xətt üzərində qol çək. O da qol çəkdi və ondan sonra bu məsələ təsdiqləndi. Bu, belə də olmalıdır.
Bu səfirlik doğma, qardaş ölkənin səfirliyidir. Amma eyni zamanda, bizim doğma evimizdir. Mən arzu edirəm ki, burada insanlar rahat çalışsınlar. Hər cür şərait yardılıbdır. Bu gözəl bina Bakı şəhərinə əlavə yaraşıq, gözəllik verir.
Bütün qonaqları bir daha ürəkdən salamlayıram və səfirliyin fəaliyyətinə uğurlar diləyirəm. Arzu edirəm ki, Türkiyə-Azərbaycan qardaşlıq münasibətləri bundan sonra da inkişaf etsin, irəliyə getsin və bizi yeni qələbələrə gətirsin.
Sağ olun.
Bölmənin digər xəbərləri
