MƏDƏNİYYƏT
Bakıdakı Rus evində ədəbi görüş keçirilib
Bakı, 4 noyabr, AZƏRTAC
Noyabrın 3-də Bakıda Rus evinin Ədəbiyyat Klubu çərçivəsində “Gənclik və Poeziya” görüşü keçirilib. Tədbir “Aspirans” təlim mərkəzi ilə birgə təşkil olunub.
Rusiya İnformasiya və Mədəniyyət Mərkəzindən AZƏRTAC-a bildirilib ki, mərkəzin tələbələri və klub fəalları poeziyanın mənası və onun müasir gəncliyə təsirini müzakirə ediblər.
Görüşün mərkəzi hadisələrindən biri poeziya haqqında bilikləri genişləndirmək məqsədi daşıyan “Sətirlərarası oxuyuruq” poeziya viktorinası oldu. Viktorinada A.Fet, A.Axmatova, M.Lermontovun və başqa klassiklərin əsərləri xatırlanıb.
Gənc şairlər S.Yesenin, Y.Yevtuşenko və M.Lermontov kimi sevimli müəlliflərin şeirlərini, həmçinin öz bəstələrini oxuyublar.
Klubun rəhbəri, Azərbaycan Yazıçılar Birliyinin üzvü Lalə Həsənova mühazirə oxuyub.
Tədbirin sonunda viktorina qaliblərinə Bakıdakı Rus evinin xatirə hədiyyələri təqdim olunub.
