Bakının Nəsimi rayonu ərazisində İzmit parkı açılıb
Bakı, 10 may, AZƏRTAC
Mayın 10-da Bakının Nəsimi rayonu ərazisində İzmit parkının açılış mərasimi keçirilib.
AZƏRTAC xəbər verir ki, mərasimdən əvvəl tədbirdə iştirak etmək üçün ölkəmizdə səfərdə olan Türkiyə nümayəndə heyəti ilə Nəsimi Rayon İcra Hakimiyyətində görüş olub.
Azərbaycan ilə Türkiyə arasındakı dostluq və qardaşlıq münasibətlərindən danışan rayon icra hakimiyyətinin başçısı Asif Əsgərov bu əlaqələrin möhkəmlənməsində ümummilli lider Heydər Əliyevin böyük xidmətlərinin olduğunu bildirib. O qeyd edib ki, bu gün inkişaf edən müstəqil Azərbaycan Respublikası Ulu Öndərin şah əsəridir. Ümummilli Liderin siyasətini layiqincə davam etdirən Prezident İlham Əliyev Azərbaycan-Türkiyə əlaqələrini daha da inkişaf etdirir. Bu əlaqələr siyasi, hərbi, iqtisadi, mədəni və digər sahələri əhatə edir. Eyni zamanda, Türkiyə Azərbaycanla birgə regional, beynəlxalq layihələrin iştirakçısıdır.
İzmit Şəhər Bələdiyyəsinin sədr müavini Guray Oruc və Türkiyə Azərbaycan Dərnəkləri Federasiyasının sədri Bilal Dündar ölkələrimiz arasında əlaqələrin ildən-ilə daha da inkişaf etdiyini bildiriblər. Qonalar ölkələrimizin nəhəng layihələrin həyata keçirilməsində birgə iştirak etdiklərini vurğulayıblar. Əlavə ediblər ki, bu layihələr iqtisadi dividendlər gətirməklə yanaşı, regionda sülh və sabitliyi də təmin edir.
Görüşdən sonra ulu öndər Heydər Əliyevin anadan olmasının 95 illiyi münasibətilə və Türkiyə-Azərbaycan dostluq və qardaşlıq münasibətlərinin rəmzi olaraq 4-cü mikrorayon ərazisində, Cavadxan küçəsinin H.Seyidzadə və M.Kazımovski küçələri ilə kəsişməsində yeni istirahət parkının - İzmit parkının açılışı olub.
Sakinlərin asudə vaxtlarını səmərəli keçirmələri üçün 0,7 hektar sahədə və ətraf ərazidə genişmiqyaslı abadlıq işləri aparıb, müxtəlif növ həmişəyaşıl ağaclar və gül kolları əkilib. Parkda hər cür şərait yaradılıb. Uşaqlar üçün əyləncə qurğuları quraşdırılıb, park boyunca idman yürüşü məqsədilə zolaq salınıb.
İzmit parkının açılışında iştirak edən Türkiyənin Azərbaycandakı səfiri Erkan Özoral bildirib ki, türk dünyası üçün önəmli gün olan Heydər Əliyevin anadan olmasının 95 illiyi münasibətilə təşkil olunan bu tədbir Türkiyə-Azərbaycan qardaşlığının möhkəmlənməsinə xidmət edir. O qeyd edib ki, diplomatik korpusda Ulu Öndərin 95 və Azərbaycan Xalq Cümhuriyyətinin 100 illik yubileyləri ilə bağlı geniş tədbirlər planlaşdırır. Diplomatın sözlərinə görə, Türkiyədə Azərbaycan-Türkiyə dostluğu ilə bağlı 150-dən artıq park, prospekt sakinlərin istifadəsinə verilib. O vurğulayıb ki, bu kimi tədbirlər həm də yeniyetmə və gənclər arasında Türkiyə-Azərbaycan qardaşlığını təbliğ edir.
Parkın açılış mərasimində 2 nömrəli Uşaq Gənclər İnkişaf Mərkəzinin şagirdlərinin əl işlərindən ibarət sərgi və müxtəlif rəqs nömrələri təqdim edilib.
Bölmənin digər xəbərləri
