BALAKƏN İCTİMAİYYƏTİ PREZİDENTİN SƏRƏNCAMINI YÜKSƏK QİYMƏTLƏNDİRİR
Rayon fəallarının, idarə və müəssisə rəhbərlərinin, sahibkarların, ictimaiyyətin nümayəndələrinin iştirak etdikləri tədbirdə Balakən Rayon İcra Hakimiyyətinin başçısı Asif Əsgərov çıxış edərək bildirmişdir ki, Prezident İlham Əliyevin aprelin 12-də Balakən rayonunda keçirdiyi görüşlər, verdiyi tapşırıq və tövsiyələr rayonun sosial-iqtisadi və mədəni inkişafının rəhninə çevrilmişdir.
Müşavirədə çıxış edən natiqlər ölkəmizin başçısının bölgəyə səfərinin yekunları ilə bağlı imzaladığı Sərəncamın rayonun sosial-iqtisadi inkişafının daha da sürətlənməsində və mövcud problemlərin qısa müddət ərzində aradan qaldırılmasında mühüm rol oynayacağına əminliyini bildirmişlər.
Müşavirədə Balakən ictimaiyyəti adından Azərbaycan Prezidenti İlham Əliyevə müraciət qəbul olunmuşdur.
Müraciətdə deyilir:
“Möhtərəm Prezident!
Balakən rayonu ictimaiyyəti iftixar hissi ilə qeyd edir ki, hazırda müstəqil Azərbaycan Respublikasında ulu öndərimiz Heydər Əliyev tərəfindən əsası qoyulmuş dövlət quruculuğu prosesi Sizin rəhbərliyiniz altında uğurla davam etdirilir. Müstəqilliyimizin əbədi olduğuna inanan Azərbaycan xalqı ötən illərdə bərqərar edilmiş ictimai-siyasi sabitlik və əmin-amanlıq şəraitində yeni iqtisadi yüksəliş dövrünə qədəm qoymuşdur. Ölkəmizin sosial-siyasi siması ilbəil dəyişir, yeniləşir. Azərbaycan regionun lider dövlətinə çevrilir. Bir sıra nüfuzlu beynəlxalq təşkilatların üzvü olan Azərbaycan dünya dövlətləri arasında öz layiqli yerini daha da möhkəmləndirir.
İqtisadiyyatın tarazlı inkişafına yönəldilmiş tədbirlər baxımından Sizin 2004-cü il 11 fevral tarixli Fərmanınızla təsdiq olunmuş “Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)” xüsusi əhəmiyyət daşıyır. Dövlət Proqramının icrası, həyata keçirilən tədbirlər, görülən təxirəsalınmaz işlər öz bəhrəsini verməkdədir.
Cənab Prezident!
Bu ilin aprel ayında rayonumuzda olarkən ictimaiyyətlə görüşünüz zamanı söylədiyiniz proqram xarakterli nitqinizdən irəli gələn vəzifələrin yerinə yetirilməsi üçün rayon icra hakimiyyəti tərəfindən xüsusi tədbirlər planı hazırlanmış və icrasına başlanılmışdır. Rayonun inkişafı üçün müvafiq infrastrukturun yaradılması diqqət mərkəzindədir. “Azərbaycan Respublikasının Şəki şəhərinin, Balakən, Qax və Zaqatala rayonlarının sosial-iqtisadi inkişafının sürətləndirilməsinə dair əlavə tədbirlər haqqında” 2006-cı il 1 iyun tarixli Sərəncamınız rayonumuzda böyük razılıq hissi ilə qarşılanmış, əhalidə ruh yüksəkliyi yaratmışdır. Bu Sərəncam ictimaiyyət tərəfindən Sizin bu bölgənin iqtisadi inkişafına, xalqın maddi rifahının yaxşılaşdırılmasına göstərdiyiniz böyük qayğının bariz nümunəsi kimi qiymətləndirilir.
Möhtərəm Prezident!
Balakən ictimaiyyəti Sizi əmin edir ki, fərman və sərəncamlarınızın, rayonumuzda olarkən verdiyiniz tapşırıq və tövsiyələrin layiqincə yerinə yetirilməsi, rayonun sosial-iqtisadi inkişafı üçün bütün qüvvələr səfərbər olunacaq və mövcud imkanlardan səmərəli istifadə ediləcəkdir. Sizin söylədiyiniz kimi, Balakən və balakənlilər Azərbaycanın dövlət müstəqilliyinin möhkəmləndirilməsində həmişə olduğu kimi, yenə də fəal rol oynayacaqlar”.
Bölmənin digər xəbərləri
