BALAKƏNLİ FERMERLƏR TEZLİKLƏ YARDIM ALACAQLAR
Balakən Rayon İcra Hakimiyyətindən AZƏRTAC-a bildirmişlər ki, Azərbaycan Prezidentinin “Kənd təsərrüfatı məhsulları istehsalçılarına dövlət dəstəyi haqqında” 2007-ci il 23 yanvar tarixli Sərəncamı və bu sənədin icrası ilə əlaqədar Nazirlər Kabinetinin müvafiq qərarına uyğun olaraq, 2007-ci ildə Balakən rayonu üzrə 4.520 nəfər torpaq mülkiyyətçisinə əkin sahəsinin becərilməsində istifadə etdiyi yanacaq və mühərrik yağlarına görə dövlət büdcəsindən 262 min 396 manat məbləğində yardım verilməsi qərara alınmışdır.
Yardımın verilməsi üzrə yaradılmış rayon komissiyasına ötən müddətdə 5 min nəfərə yaxın torpaq mülkiyyətçisi ərizə ilə müraciət etmişdir. Rayon komissiyası həmin müraciətlər əsasında kənd ərazi komissiyaları vasitəsilə yerlərdə araşdırmalar aparmış və Balakən rayonu üzrə 6 min 559,9 hektar əkin sahəsinin becərilməsi üçün yardım verilməsini məqbul hesab etmişdir.
Toplanmış sənədlər baxılmaq üçün Respublika Komissiyasına təqdim edilmişdir. Komissiya Balakən rayonu üzrə 4.520 torpaq mülkiyyətçisinə yardım verilməsi ilə bağlı qərar qəbul etmişdir. Hazırda “Kapital Bank” ASC-nin rayon filialında torpaq mülkiyyətçilərinə yardımın verilməsi ilə bağlı hazırlıq işləri başa çatmaq üzrədir.
Bölmənin digər xəbərləri
