Baş məşqçi: Uşaq futbolunun inkişafı istiqamətində ölkəmizdə mühüm addımlar atılır
Bakı, 28 sentyabr, AZƏRTAC
Oktyabrda start götürəcək 10 yaşadək futbolçular arasında Azərbaycan çempionatında “Talant” futbol klubu da mübarizə aparacaq. Klubun baş məşqçisi, fuztal üzrə Azərbaycan milli komandasının üzvü Oktay Rüstəmli ölkəmizdə uşaq futbolunun inkişafı, rəhbərlik etdiyi komandanın çempionata hazırlığı və uşaqlar ilə işləməyin maraqlı tərəfləri barədə AZƏRTAC-ın suallarını cavablandırıb. Həmin müsahibəni təqdim edirik:
-Yaxın günlərdə futbol üzrə U-10 Azərbaycan çempionatı start götürəcək. Komandanızın şanslarını necə qiymətləndirirsiniz?
-Çempionat AFFA-nın bayrağı altında təşkil olunacaq. Dairəvi sistem üzrə keçiriləcək yarış üç dövrədən ibarət olacaq və 12 komandanın iştirakı nəzərdə tutulub. Komandamız yeni yaradılıb. Öncədən proqnoz vermək düz deyil, bu idmandır. Şansımızı 50-nin 50-yə qiymətləndirirəm. Yetirmələrim üzərində daha çox işləməlidirlər. Məqsədimiz hər oyuna böyük qələbə əzmi ilə çıxmaq və 3 xalı qazanmaqdır. Komandamızda bu potensialı görürəm və inanıram ki, uşaqlar özlərini yaxşı tərəfdən göstərib, qələbələri ilə bizi və yaxınlarını sevindirəcəklər.
-Uşaqlar komandaya hansı meyarlar əsasında cəlb olunub?
- Hər bir uşağın öz oyun üslubu və tərzi var. Bəziləri texnikasına, bəziləri isə mübarizliyinə və çevikliyinə görə seçilib. Bu meyarlar əsasında uşaqları bir araya toplamışıq. Məşqlərimiz davam edir. Əsas işimiz uşaqların komanda şəklində oynamasıdır. Hazırda hazırlıq prosesimiz bu istiqamətdə davam edir. Əminəm ki, uşaqların hazırlığı çempionat oyununda özünü yaxşı tərəfdən göstərəcək.
-Peşəkar futbolçu yetişdirmək üçün hansı məqamlar əsas götürülməlidir?
- Fikrimcə, peşəkar futbolçu yetişdirmək üçün ilk öncə həmin şəxsdə xarakter olmalıdır. Nizam-intizam, davamiyyət və məşqdən əlavə öz üzərində işləmək bacarığı olmalıdır. Gündə 1-2 saat məşqlə kifayətlənməməlidir. Əgər bir uşaq diqqətini futbola cəmləsə, meydanda xarakter nümayiş etdirsə və komanda yoldaşlarına ruh yüksəkliyi versə peşəkarlığa ilk addımını atmış olacaq. Digər əsas məqam isə öz üzərində çalışmaq, sevərək seçdiyi idman növünə ciddi yanaşmaqdır. Bunlar mənim şəxsi fikirlərimdir.
-Uşaqlarla işləməyin maraqlı və çətin tərəfləri hansılardır?
-Uşaqlarla işləmək əslində çətin deyil, maraqlıdır. Uşaqlarla ilk öncə dil tapmaq lazımdır. Çünki onların hər biri fərqli xarakterə malikdir və fərqli ailələrdən gəlirlər. Hazırlıq prosesində bu məqamlara diqqət yetirmək lazımdır. Balacalarla dil tapıb, onlarla anlayışlı şəkildə davranıb, futbolun sirlərini onların qavrayacağı şəkildə təqdim etmək ən əsas məqamdır. Məşq zamanı hər uşağa fərdi yanaşmaq mənim prinsipimdir. Belə olan halda, uşağın şəxsi keyfiyyətləri də yüksəlir.
- "Talant" klubunun qarşısına ölkə çempionatında hansı hədəflər qoyulub?
- Əvvəlcə “Talant” klubunun rəhbəri Elşad Məmmədova təşəkkürümü bildirirəm ki, uşaqların ölkə çempionatında iştirakı üçün hər cür şərait yaradıb. Qarşımıza çempionluq kimi hədəf qoyulmasa da, məqsədimiz uşaqların düzgün futbol oynaması və yetişməsidir. Ən əsası isə Azərbaycan milli komandaları üçün futbolçu hazırlamaqdır. Əlimizdən gələni edəcəyik ki, komandamız baxımlı futbol nümayiş etdirsin. Kollektivdə yüksək potensiala malik uşaqlar var. İnanıram ki, onlar gələcəkdə yaşıl meydanlarda gözəl oyunları ilə azarkeşləri sevindirəcəklər. “Talan” klubu uşaqların karyeralarında uğurlu başlanğıc olacaq.
- Ölkəmizdə uşaq futbolunun inkişafını necə dəyərləndirirsiniz?
- Uşaq futbolunun inkişafı istiqamətində ölkəmizdə mühüm addımlar atılır. AFFA-nın təşkilatçılığı ilə müxtəlif yaş qrupları üzrə liqalar təşkil olunur, milli komandalarımız yerli təlim-məşq toplanışları ilə yanaşı, xaricdə də hazırlıq proseslərinə qatılırlar. Təkcə Bakıda deyil, regionlarda da idmanın futbol növünün kütləviləşməsi istiqamətində təqdirəlayiq işlər görülür. Ən əsası ölkəmizdəki idman infrastrukturu beynəlxalq standartlara tam cavab verir, bu da Azərbaycanda idmanın bütün növlərinin inkişafına təkan yaradır.
Sevindirici haldır ki, ölkəmizdə oğlanlarla yanaşı, qızlar da futbolla məşğul olurlar. Etiraf etməliyəm ki, məşqlərimə bir neçə qız da qatılır. Onların çevikliyi, əzmi və futbola olan sevgisi heç də oğlanlardan geri qalmır. Təbii ki, onlar üçün məşq planımız fərqlidir. Ancaq yekun olaraq, əsas məqsədimiz Azərbaycan futboluna xidmət edib, ölkə idmanı üçün yeni futbolçular hazırlamaqdır.
Bölmənin digər xəbərləri
