DÜNYA
Baş nazir: Moldovanı çox çətin qış gözləyir
Kişineu, 28 noyabr, AZƏRTAC
Moldovanı çox çətin qış gözləyir. Qaz böhranının baş verməsinin iki səbəbi var.
AZƏRTAC yerli “Newsmarker” nəşrinə istinadla xəbər verir ki, bu barədə Moldovanın Baş naziri Dorin Reçan bildirib.
“Mən sizinlə dürüst olmalıyam. Bizi çox çətin qış gözləyir və buna hazır olmalıyıq”, - deyə hökumət başçısı vurğulayıb.
Onun sözlərinə görə, böhran iki səbəbdən yarana bilər. Birincisi, təxminən 300 min insanın yaşadığı Dnestr çayının sol sahilinə qaz nəqlinin mümkün dayandırılmasıdır. “Onların əksəriyyəti istilik və elektrik enerjisiz qala biləcək vətəndaşlarımızdır. Bu, humanitar fəlakətə çevrilə bilər. Bunlar bizim vətəndaşlarımız olduğu üçün biz həll yolu tapmağa borcluyuq”, - deyə Recan qeyd edib.
Baş nazir böhranın ikinci səbəbini qaz tariflərinin ehtimal olunan artımı ilə əlaqələndirib. Hökumət başçısı əlavə edib ki, Milli Enerji Tənzimləmə Agentliyi “Moldovaqaz”ın qaz tariflərinin artırılması ilə bağlı müraciətinə diqqətlə və şəffaf şəkildə baxmalıdır.
“Yay və payız aylarında qazın necə alınması ilə bağlı çoxlu suallar var. Vətəndaşlara aydınlıq gətirilməlidir. Onlar parlament dinləmələrində cavab alacaqlar”, - deyə o bildirib.
AZƏRTAC-ın xüsusi müxbiri
Kişineu
Bölmənin digər xəbərləri
