BAŞ PROKURORLUĞUN TƏDRİS MƏRKƏZİNDƏ SEMİNAR KEÇİRİLMİŞDİR
Seminarı baş prokurorun birinci müavini Rüstəm Usubov açaraq qeyd etmişdir ki, Ermənistanın Azərbaycana hərbi təcavüzü nəticəsində işğal olunmuş doğma torpaqlarımızın azad edilməsi, Dağlıq Qarabağ probleminin sülh yolu ilə həlli məsələləri xalqımızın ümummilli lideri Heydər Əliyevin dövlətçilik siyasətinin əsas xəttini təşkil etmiş, onun rəhbərliyi altında həyata keçirilən məhkəmə-hüquq islahatlarının nəticəsi olaraq, 1999-cu il 30 dekabr tarixli Qanunla təsdiq edilmiş Azərbaycan Respublikası Cinayət Məcəlləsinə “Sülh və insanlıq əleyhinə cinayətlər” adlı xüsusi fəsil daxil edilmişdir.
Dağlıq Qarabağın Ermənistana birləşdirilməsi məqsədi daşıyan və doğma torpaqlarımızın 20 faizinin zəbt edilməsi ilə nəticələnən işğalçılıq siyasətinə və erməni təcavüzkarlarının cinayətkar əməllərinə ədalətli və obyektiv hüquqi qiymət verilməsinin təmin edilməsi məqsədilə Azərbaycan Respublikasının Cinayət Məcəlləsinə “Soyqırımı”, “Təcavüzkar müharibəni planlaşdırma, hazırlama, başlama və aparma”, “Əhalini deportasiya etmə və ya məcburi köçürmə” və bu kimi insanlıq əleyhinə yönəlmiş cinayətlərə görə məsuliyyət nəzərdə tutan müvafiq normalar daxil edilmişdir.
Baş prokurorun birinci müavini demişdir ki, Azərbaycan Respublikası Milli Məclisinin qəbul etdiyi və Prezident İlham Əliyevin 2006-cı il mayın 12-də imzaladığı “Beynəlxalq Cinayətlərə görə məsuliyyət nəzərdə tutan qanunun qüvvəsinin geriyə şamil olunması haqqında” Azərbaycan Respublikasının Konstitusiya Qanunu Azərbaycan Respublikasında sülh və insanlıq əlehyinə cinayətlərə, soyqırımı və müharibə cinayətlərinə görə məsuliyyət nəzərdə tutan mövcud cinayət qanunvericiliyi normalarının tətbiqini “İnsan hüquqlarının və əsas azadlıqlarının müdafiəsi haqqında Konvensiya”nın və “Mülki və siyasi hüquqlar haqqında Beynəlxalq Pakt”ın müvafiq müddəalarına uyğunlaşdırmaq məqsədi daşıyır.
Seminarın gündəliyində duran məsələlər üzrə çıxış edən natiqlər Ermənistanın Azərbaycan Respublikasına qarşı əsassız ərazi iddiaları irəli sürərək, azərbaycanlıların əsrlər boyu yaşadıqları torpaqlardan məcburi deportasiya edilməsi və kütləvi qırğının törədilməsi siyasətinin keçən əsrin 80-ci illərinin ikinci yarsından başlamasına baxmayaraq, ölkəmizdə beynəlxalq cinayətlərə görə məsuliyyətin ilk dəfə 1999-cu ildə qəbul edilmiş Cinayət Məcəlləsində müəyyən olunduğunu və həmin məcəllənin 10-cu maddəsinə əsasən cinayət hüququ normalarının geriyə qüvvəsinin tətbiqinin qadağan edildiyini bildirərək, qəbul edilmiş Konstitusiya Qanununun bu hüquqi problemin həllində mühüm rol oynadığını və Cinayət Məcəlləsinin normalarına retroaktiv qüvvə verməklə, sosial ədalətin bərpasına xidmət edəcəyini göstərmiş, erməni təcavüzkarlarının cəzalandırılmasına nail olmaq üçün siyasi səviyyədə həyata keçirilən səylərin hüquqi müstəvidə aparılan səylərlə tamamlanmasının zəruriliyini vurğulamışlar.
Çıxış edənlər, həmçinin Ermənistanın Azərbaycan Respublikasına qarşı apardığı elan olunmamış müharibədə erməni silahlı qüvvələri tərəfindən törədilmiş cinayət hadisələrinin istintaqı ilə əlaqədar Baş Prokurorluq, Daxili İşlər və Milli Təhlükəsizlik nazirliklərinin əməkdaşlarından ibarət yaradılmış istintaq-əməliyyat qrupu tərəfindən görülən işlər barədə ətraflı məlumat vermişlər. Natiqlər, erməni təcavüzkarlarının Azərbaycanın ayrılmaz tərkib hissəsi olan Dağlıq Qarabağın Xocalı şəhərində, Qaradağlı və Meşəli kəndlərində törətdikləri qırğınlar üzrə başlanılmış cinayət işlərinin Beynəlxalq Konvensiyalara əsaslanaraq, Azərbaycan Respublikası Cinayət Məcəlləsinin soyqırımına görə məsuliyyət nəzərdə tutan 103-cü maddəsinə tövsif edildiyini, cinayət törətmiş şəxslərin Beynəlxalq Polis Təşkilatı - İnterpol vasitəsilə axtarışının təmin edildiyini nəzərə çatdırmışlar.
İştirakçılar seminarın işini yüksək qiymətləndirmiş, tədbirin beynəlxalq cinayətlərə qarşı mübarizənin düzgün təşkili sahəsində nəzəri və təcrübi əhəmiyyətə malik olduğunu qeyd etmişlər.
Bölmənin digər xəbərləri
