Bayden: Yəhya Sinvar Yaxın Şərqdə sülhün əldə olunması yolunda aşılmaz maneə idi
Vaşinqton, 18 oktyabr, AZƏRTAC
ABŞ kəşfiyyatı HƏMAS lideri Yəhya Sinvarın izlənilməsində və yerinin müəyyənləşdirilməsində İsrailə kömək edib.
AZƏRTAC-ın məlumatına görə, bu barədə ABŞ Prezidenti Cozef Baydenin Ağ evin saytında yayılan bəyanatında deyilir. Onun sözlərinə görə, HƏMAS-ın 7 oktyabr 2023-cü ildə İsrailə gerçəkləşdirdiyi hücumdan sonra o, xüsusi təyinatlılara və kəşfiyyat üzrə mütəxəssislərə Y.Sinvar və digər HƏMAS liderlərini tapmaq və izləmək üçün israilli həmkarları ilə birlikdə işləmək tapşırığını verib.
Baydenin sözlərinə görə, ABŞ HƏMAS liderinin fəaliyyətini Yaxın Şərqdə sülhün əldə olunması yolunda aşılmaz maneə kimi görürdü.
“Bu maneə artıq yoxdur. Lakin qarşıda görülməli hələ çox işlər var. DNT testi göstərir ki, Sinvar ölüb. Bu, İsrail, ABŞ və bütün dünya üçün yaxşı gündür”,- deyə Prezident əlavə edib.
ABŞ lideri Y.Sinvarın ölümünü 2011-ci ildə Usama ben Ladenin ölümü ilə müqayisə edib.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
