Bayram günlərində metropoliten ehtiyat qatarlardan istifadə edəcək
Bakı, 19 aprel, AZƏRTAC
Ramazan bayramı ilə əlaqədar “Bakı Metropoliteni”nin iş rejiminə dəyişiklik ediləcək. “Bakı Metropoliteni” QSC-nin tədbirlər planına əsasən, əlavə işçi qüvvəsi cəlb edilməklə növbətçilik cədvəli tərtib olunacaq.
“Bakı Metropolitenin”dən AZƏRTAC-a bildirilib ki, qatarların hərəkəti “Həzi Aslanov-28 May” sahəsində aprelin 21-də 2,5 dəqiqə, ayın 22-dən 24-dək 3 dəqiqə intervalla tənzimlənəcək. “28 May” stansiyasında Qırmızı və Yaşıl xətlər birləşdiyindən “İçərişəhər” və “Dərnəgül” stansiyaları istiqamətində qatarların hərəkət intervalı iki dəfə çox olacaq.
Sərnişin axınının tənzimlənməsi məqsədilə zərurət yaranacağı təqdirdə, ehtiyat qatarlar xəttə buraxılacaq. “Bakmil” istiqamətinə və əks istiqamətdə qatarların hərəkət cədvəli aprelin 21-də şənbə günü qrafikinə, ayın 22-24-də isə bazar günü qrafikinə uyğun olacaq.
Bölmənin digər xəbərləri
