BDU-105: Azərbaycanın sosial inkişafı üçün kadrlar hazırlayan Sosial elmlər və psixologiya fakültəsi
Bakı, 20 sentyabr, AZƏRTAC
Bakı Dövlət Universiteti (BDU) yarandığı gündən ölkəmizi yüksəkixtisaslı mütəxəssislərlə təmin etmək üçün daim yeni ixtisasların açılmasına üstünlük verib. 1990-cı ildə BDU-nun Tarix fakültəsinin tərkibində tarix-sosiologiya, tarix-psixologiya, tarix-sosial psixologiya və tarix-etnopsixologiya ixtisaslarına tələbə qəbulu keçirilib. Bir il sonra həmin ixtisasların bazasında, habelə fəlsəfə və iqtisadi nəzəriyyə ixtisaslarından ibarət yeni fakültə – Sosial elmlər və psixologiya fakültəsi yaradılıb. Fəaliyyətinin ilk günlərindən bu fakültədə dörd ixtisas – psixologiya, sosiologiya, fəlsəfə və iqtisadi nəzəriyyə üzrə kadr hazırlığına başlanılıb.
Bu barədə AZƏRTAC-a Bakı Dövlət Universitetindən məlumat verilib. Bildirilib ki, ötən əsrin 80-ci illərinin axırı - 90-cı illərinin əvvəllərində ölkəmizdə baş verən sosial-siyasi hadisələr sosial-siyasi münasibətlər nəzəriyyəsi ixtisası üzrə kadr hazırlığına ehtiyac yaradırdı. Həmin tələbatı ödəmək məqsədilə Sosial elmlər və psixologiya fakültəsində 1992-ci ildə sosial-siyasi münasibətlər nəzəriyyəsi ixtisası (sonralar bu ixtisas politologiya adlandırılıb) üzrə tələbə qəbulu keçirilib. Beləliklə, fakültədə beş ixtisas (psixologiya, sosiologiya, fəlsəfə, politologiya, iqtisadi nəzəriyyə) üzrə sistemli kadr hazırlığına başlanılıb. Sonradan politologiya və iqtisadi nəzəriyyə ixtisasları yeni yaradılmış Beynəlxalq münasibətlər və iqtisadiyyat fakültəsinə verilib. Sosial elmlər və psixologiya fakültəsində isə sosial iş, təhsildə sosial-psixoloji xidmət və korreksiyaedici təlim ixtisasları açılıb.
Fakültə yaradılarkən onun tabeliyində yalnız Fəlsəfə və sosiologiya kafedrası olub. Sonrakı illərdə fakültə hazırladığı ixtisaslara uyğun olaraq fəaliyyətini genişləndirib.
Hazırda Sosial elmlər və psixologiya fakültəsində 8 kafedra fəaliyyət göstərir. Bunlar Fəlsəfə, Fəlsəfə tarixi və mədəniyyətşünaslıq, Pedaqogika, Psixologiya, Gender və tətbiqi psixologiya, Sosiologiya, Sosial və pedaqoji psixologiya, Sosial iş kafedralarıdır.
Psixologiya elmləri doktoru, Əməkdar elm xadimi, professor Əkbər Bayramov fakültənin ilk dekanı olub. 1992-ci ilin noyabrından 2006-cı ilin dekabrına qədər isə fakültəyə fəlsəfə elmləri namizədi, dosent Fazil Vahidov rəhbərlik edib. Daha sonra pedaqoji elmlər doktoru, professor Hikmət Əlizadə fakültə dekanı seçilib. 2022-ci ildən fakültəyə dosent Rövşən Cavadov rəhbərlik edir.
Ümumiyyətlə, fakültənin inkişafında bir çox görkəmli alimlər – Əkbər Bayramov, Cəmil Əhmədli, Fuad Qasımzadə, Həsən Şirəliyev, Həmid İmanov, Fazil Vahidov, İzzət Rüstəmov, Rəbiyyət Aslanova və başqalarının əvəzsiz xidmətləri olub.
Hazırda Sosial elmlər və psixologiya fakültəsində 2081 nəfər (bakalavr pilləsində - 1792, magistr pilləsində - 185, fəlsəfə doktoru proqramı üzrə - 94, elmlər doktoru proqramı üzrə - 10 nəfər) təhsil alır.
Fəaliyyət göstərdiyi 33 il ərzində fakültə bir çox xarici ali məktəblərlə, beynəlxalq təşkilatlarla əlaqələr yaradıb, sosial və humanitar sahələr üzrə təhsilin metodoloji və nəzəri əsaslarını formalaşdırıb. Fakültənin kollektivi elmi tədqiqatları ilə cəmiyyətin təfəkkür mədəniyyətini formalaşdırmağa çalışıb. Bütün bu işlərin nəticəsində sosiologiya, fəlsəfə, korreksion pedaqogika, psixologiya, sosial iş sahələri dövrün tələblərinə uyğun inkişafa nail olub. Hazırda fakültə sosiologiya, fəlsəfə, psixologiya, pedaqogika sahələri üzrə cəmiyyətimizin mənəvi-mədəni və bütövlükdə sosial inkişafının ayrılmaz tərkib hissəsinə çevrilib. Fakültə tədris prosesinin təkmilləşdirilməsini, tələbələrin müstəqil işlə məşğul olmasını, mütəxəssis kadrların hazırlanmasında keyfiyyət göstəricilərinin yaxşılaşdırılmasını, tədris planlarında ixtisaslar üzrə elmin müasir sahələrinin və problemlərinin öz əksini tapmasını daim diqqət mərkəzində saxlayır.
Bakı Dövlət Universiteti Əmək və Əhalinin Sosial Müdafiəsi Nazirliyi və ona tabe qurumlarla sıx əməkdaşlıq edir. Bu əməkdaşlıq çərçivəsində Sosial elmlər və psixologiya fakültəsinin bakalavriat və magistratura səviyyələrində təhsil alan tələbələri üçün istehsalat və elmi-tədqiqat təcrübə proqramları təşkil olunur. Eləcə də birgə sosial layihələr hazırlanır və həyata keçirilir.
Fakültə öz geniş profilinə uyğun olaraq bir çox dövlət və ictimai təşkilatlarla da əməkdaşlıq edir. Milli Məclisin komissiyaları, bir sıra qeyri-hökumət təşkilatları, BDU-nun psixoloji yardım sektoru, AMEA-nın Fəlsəfə və Sosiologiya İnstitutu, Təhsil Problemləri İnstitutu, ölkədə fəaliyyət göstərən ali məktəblər fakültənin sıx əməkdaşlıq etdiyi qurumlardandır.
Bölmənin digər xəbərləri
