Bakı, 16 sentyabr, AZƏRTAC

Azərbaycan dövlət müstəqilliyini bərpa etdikdən sonra onun beynəlxalq aləmə inteqrasiyasını təmin etmək üçün beynəlxalq münasibətlər və beynəlxalq hüquq sahəsində mütəxəssislərə böyük ehtiyac yarandı. Bu məqsədlə 1991-1992-ci tədris ilindən Bakı Dövlət Universitetində Beynəlxalq münasibətlər və beynəlxalq hüquq fakültəsi yaradıldı. Sonrakı illərdə Bolonya təhsil sisteminə keçidlə əlaqədar fakültədə bir sıra struktur dəyişiklikləri aparılıb. 2011-ci ildə Beynəlxalq münasibətlər və beynəlxalq hüquq fakültəsinin adı dəyişdirilərək Beynəlxalq münasibətlər və iqtisadiyyat fakültəsi adlandırılıb. Buna müvafiq olaraq fakültədə beynəlxalq münasibətlər, iqtisadiyyat, dünya iqtisadiyyatı və politologiya ixtisasları tədris edilib.

BDU-dan AZƏRTAC-a bildirilib ki, hazırda fakültədə beynəlxalq münasibətlər, iqtisadiyyat, beynəlxalq ticarət və logistika, dövlət və ictimai münasibətlər, maliyyə, menecment, biznesin idarə edilməsi, politologiya və statistika ixtisasları üzrə kadrlar hazırlanır.

Fakültədə akademik heyətin potensialının artırılması, həmçinin yeni nəslin tədris və təlim proseslərinə cəlb olunması məqsədilə bir sıra addımlar atılıb. Tələbə və professor-müəllim heyətləri arasında müvafiq sorğular keçirilib və onların nəticələri təhlil edilib. Dünya standartlarına cavab verən və müasir əmək bazarının tələblərini ödəyən yeni ixtisaslar (ixtisaslaşmalar) formalaşdırılıb və mövcud ixtisaslar dövrün tələbləri çərçivəsində təkmilləşdirilib. Otuz il ərzində fakültə müəllimlərinin ayrı-ayrı fənlər üzrə sanballı dərslikləri işıq üzü görüb, kafedralarda bakalavriat və magistratura səviyyələrində nəzərdə tutulan fənlərin proqramları hazırlanıb və nəşr olunub.

Beynəlxalq münasibətlər və iqtisadiyyat fakültəsinin əldə etdiyi uğurlar onun yüksək elmi potensialından qaynaqlanır. Fakültənin kafedralarında elmi fəaliyyət illər ərzində formalaşmış elmi məktəblər çərçivəsində həyata keçirilir.

“TACIS-TEMPUS” proqramı çərçivəsində “Avropa və Xəzər dənizi” layihəsi üzrə Fransanın Nits Universiteti, Qrenobl Universiteti və İtaliyanın Genuya Universiteti ilə əməkdaşlığı vurğulamaq lazımdır. Bu layihənin fakültədə tədrisin Avropa standartlarına inteqrasiyasında müstəsna əhəmiyyəti var.

Fakültənin tələbələri 2005-ci ildə ABŞ-ın Azərbaycandakı səfirliyinin və Amerika Təhsil Şurasının təşkil etdiyi “Nazirliklərdə praktika” müsabiqəsinin qalibi olublar. Həmçinin “3-cü Moskva Beynəlxalq Forumu” çərçivəsində “2006-cı ilin Avropa İttifaqı Modeli” mövzusunda tədbirdə, Brüsseldə NATO-nun Baş Qərargahında Azərbaycan Respublikası Xarici İşlər Nazirliyinin NATO-nun İctimai Diplomatiya İdarəsinin təşkil etdiyi seminarda universiteti layiqincə təmsil ediblər.

“Azərbaycan Respublikasında təhsilin inkişafı üzrə Dövlət Strategiyası”na uyğun olaraq beynəlxalq təcrübədən, qabaqcıl elmi nailiyyətlərdən, innovativ təlim-tədris texnologiyalarından faydalanaraq ölkəmizdə yeni nəsil yüksəkixtisaslı mütəxəssislərin hazırlanması qarşıda duran başlıca məqsədlərdən biridir. Bu baxımdan BDU-da tədrisin məzmun və keyfiyyət göstəricilərinin beynəlxalq standartlara uyğunlaşdırılması və universitetin beynəlxalq rəqabətliliyinin artırılması məsələsinə xüsusi diqqət yetirilir və dünyanın bir sıra qabaqcıl universitetləri ilə beynəlxalq ikili diplom proqramlarının həyata keçirilməsi istiqamətində davamlı işlər görülür.

Hazırda fakültə ABŞ, Kanada, İsveçrə, Rusiya, Almaniya, İtaliya, Polşa, Fransa, Türkiyə, Qazaxıstan və Qırğızıstanın bir sıra qabaqcıl elm və təhsil müəssisələri ilə sıx əməkdaşlıq edir. Fakültədə mütəmadi olaraq tələbə, magistrant, doktorant və professor-müəllim heyəti üçün təsir əmsallı jurnallarda məqalələrin çap edilməsinə dair təlimlər keçirilir. Son illərdə Türkiyənin nüfuzlu universitetlərindən olan nümayəndə heyətləri ilə görüşlər təşkil olunub və birgə tədqiqat işləri, ikili diplom proqramı və bu kimi məsələlər üzrə danışıqlar aparılıb.

BDU-nun Beynəlxalq münasibətlər və iqtisadiyyat fakültəsi və ABŞ-ın Linkoln Universitetinin Biznes inzibatçılığı üzrə magistratura (MBA) proqramı bazasında “Biznesin təşkili və idarə edilməsi (maliyyə üzrə)” ixtisaslaşmasında ikili diplom proqramı hazırlanıb. Bununla yanaşı, BDU və İsveçrənin Biznes və Beynəlxalq Tədqiqatlar Universiteti (UBIS) arasında beynəlxalq münasibətlər ixtisası üzrə magistratura səviyyəsində ikili diplom proqramına başlanılıb. 2022-ci ildən etibarən bakalavriat səviyyəsi üzrə beynəlxalq münasibətlər ixtisası üzrə BDU və Qazaxıstanın Ş.Yesenov adına Xəzər Dövlət Texnologiyalar və Mühəndislik Universiteti arasında ikili diplom proqramı imzalanıb.

Fakültə tələbələrinin uğurları daha sevindiricidir. Onlar BDU-nun daxili və beynəlxalq səviyyəli tədbirlərinin ən fəal iştirakçılarıdır. Universitetlərarası beynəlxalq humanitar yarışmasında fakültə komandası ardıcıl qalib olub və Beynəlxalq Qırmızı Xaç Komitəsinin diplomlarına layiq görülüb. Tələbələr müxtəlif illərdə beynəlxalq hüquqa dair ABŞ-da, Rusiyada və digər ölkələrdə keçirilən beynəlxalq müsabiqələrin qalibi, Moskvada keçirilən “Nə? Harada? Nə zaman?” intellektual oyunlarının ən güclü iştirakçısı olublar.

Fakültənin tələbələrinin asudə vaxtlarının səmərəli təşkili üçün müxtəlif tədbirlər keçirilir. Bu məqsədlə mütəmadi olaraq BDU-nun Quba Tədris-təcrübə və istirahət mərkəzinə, paytaxt və regionlarda yerləşən muzeylərə, tarixi abidələrə ekskursiyalar təşkil edilir. BDU-da fəaliyyət göstərən İdman-Sağlamlıq Mərkəzi, Mədəniyyət-Yaradıcılıq Mərkəzi, Psixoloji yardım sektoru kimi təsisatlar tələbələrin inkişafı ilə yanaşı, onların istirahətinin də təmin edilməsinə hesablanıb. Beynəlxalq münasibətlər və iqtisadiyyat fakültəsinin tələbələri yaradılan şəraitdən bəhrələnərək, universitetin mədəni, ictimai, sosial həyatında fəal iştirak edirlər. Fakültədə mütəmadi olaraq intellektual oyunlar və müxtəlif elmi-sosial müsabiqələr təşkil olunur. Eyni zamanda, ölkədə fəaliyyət göstərən beynəlxalq münasibətlər və iqtisadiyyat profilli elmi-tədqiqat müəssisələri və institutları ilə əməkdaşlıq həyata keçirilir.