Belçikadakı Azərbaycan və türk diaspor təşkilatlarının birgə fəaliyyət istiqamətləri müzakirə edilmişdir
Bakı, 3 iyun (AZƏRTAC). Brüsseldə səfərdə olan Diasporla İş üzrə Dövlət Komitəsinin nümayəndə heyəti Belçikada fəaliyyət göstərən Azərbaycan diaspor təşkilatlarının rəhbərləri və türk icmasının fəal üzləri ilə görüşmüşlər. Bu barədə AZƏRTAC-a Diasporla İş üzrə Dövlət Komitəsindən məlumat verilmişdir.
Görüşdə Diasporla İş üzrə Dövlət Komitəsinin Aparat rəhbəri Nəriman Qurbanov Türkdilli Ölkələrin Əməkdaşlıq Şurası üzvlərinin diaspor təşkilatlarının birgə fəaliyyət strategiyasının həyata keçirilməsi istiqamətində qarşıda duran vəzifələrdən danışmışdır. O, Benilüks ölkələrində fəaliyyət göstərən Azərbaycan diaspor təşkilatlarının türk icmaları ilə əlaqələrinin möhkəmləndirilməsinin vacibliyini qeyd etmişdir. N.Qurbanov demişdir ki, Azərbaycan həqiqətlərinin dünyaya çatdırılmasında, qondarma erməni soyqırımı iddialarına qarşı səmərəli mübarizədə, həmçinin digər ortaq maraq kəsb edən məsələlərdə yalnız türk xalqları diasporunun birgə fəaliyyəti ilə uğurlu nəticələr əldə etmək mümkündür.
Azərbaycanın problemlərini hər zaman özlərininki kimi qəbul etdiyini deyən Avropalı Türk Demokratlar Birliyinin təmsilçisi Ethem Kışlalı Belçikada dövlət qurumları ilə sıx əlaqəsi olan türk diasporunun Azərbaycan diasporuna dəstək verməyə hazır olduğunu demişdir. E.Kışlalı bildirmişdir ki, Belçikanın bəzi bölgələrində ciddi seçici elektoratına çevrilən türklər bu imkanlarından istifadə edərək yerli Senatda öz sözünü deyə bilərlər. O, Azərbaycan həqiqətlərinin - ərazilərinin işğal olunması, Xocalı soyqırımı, qaçqın və məcburi köçkünlərlə bağlı məsələlərin Belçika Senatının gündəliyinə salınması istiqamətində fəaliyyət göstərilməsini təklif etmişdir.
“Belkad” Qarabağ Mədəniyyət və Həmrəylik Dərnəyinin rəhbəri Abbas Uçar bildirmişdir ki, hazırda Belçikanın Fransa ilə sərhədində yerləşən Hensies şəhərində Xocalı soyqırımı abidəsinin ucaldılmasına dair yerli bələdiyyə ilə danışıqlar aparılır. A.Uçar rəhbərlik etdiyi təşkilatın sırf siyasi istiqamətdə fəaliyyət göstərdiyini və digər türk təşkilatları, həmçinin diaspor fəalları ilə sıx əməkdaşlıq etdiyini vurğulamışdır.
Azərbaycan-Belçika Dostluq Cəmiyyətinin sədri Ayhan Dəmirçi digər türk xalqlarının - xüsusilə uyğur, kərkük, Kipr türklərinin diaspor təşkilatları ilə əməkdaşlıq çərçivəsində həyata keçirilmiş layihələrdən danışmışdır. Son zamanlar qırğız, özbək təşkilatları ilə də əlaqələrin yarandığını bildirən A.Dəmirçi demişdir ki, cəmiyyətin əsas məqsədi Azərbaycanın və bütün türk dünyasının təbliğində Belçikadakı türkdilli xalqların diaspor qurumlarının mümkün qədər birliyinə nail olmaqdır.
Görüşün yekununda Dövlət Komitəsinin Aparat rəhbəri N.Qurbanov bildirmişdir ki, Azərbaycan həqiqətlərinin dünyaya çatdırılması, ermənilərin qondarma soyqırımı təbliğatına qarşı mübarizə və gələn il Bakıda keçiriləcək I Avropa Oyunları zamanı ölkəmizin beynəlxalq aləmdə təbliğ olunması istiqamətində Azərbaycan və türk təşkilatlarının birgə fəaliyyətinə dair bütün təkliflər təhlil olunaraq dəyərləndiriləcəkdir.
Bölmənin digər xəbərləri
