REGİONLAR
BƏRDƏ XƏBƏRLƏRİ
Respublikamızın ən böyük taxılçılıq rayonlarından olan Bərdədə məhsul yığımına başlanmışdır. Hava şəraitinin qeyri-sabit keçməsinə baxmayaraq, zəmilərdə bol məhsul yetişdirilmişdir.
Bu il rayonda 27 min hektar sahənin məhsulu toplanacaqdır. İndi zəmilərdə 130-dan çox kombayn işləyir. Məhsulun daşınması üçün kifayət qədər yük avtomobili və traktor qoşqusu ayrılmışdır. Bərdəlilər bu il 90 min ton məhsul götürmək niyyətindədirlər. Biçilmiş zəmilərin küləşi toplanır, sahələr təkrar əkinə hazırlanır.
X X X
Bərdə rayonunun Gərənə kəndində 128 nömrəlik elektron tipli avtomat telefon stansiyası istifadəyə verilmişdir. Bu, son bir ildə rayonun kəndlərində quraşdırılmış yeddinci belə ATS-dir.
Yeni ATS-in xidmətindən kənddə müvəqqəti məskunlaşmış qaçqın və məcburi köçkünlər də istifadə edəcəklər.
X X X
ABŞ-ın beynəlxalq CHF humanitar təşkilatının maliyyə dəstəyi ilə Bərdənin Hacılar kəndində 17.589 dollar dəyərində olan sosial obyekt inşa edilib istifadəyə verilmişdir. O, obyekt xeyir-şər işləri üçün nəzərdə tutulmuşdur.
“Uşaqları qoruyun!” beynəlxalq humanitar təşkilatı isə kənddə subartezian quyusunun qazılmasına kömək etmişdir. Bu, kənd sakinlərinin içməli suya olan tələbatını ödəməyə imkan yaratmışdır.