BƏRDƏDƏ 90 MİN TONDAN ÇOX TAXIL İSTEHSAL EDİLƏCƏYİ GÖZLƏNİLİR
Bərdə, 27 iyun (AZƏRTAC). Rayonun zəmilərində taxıl biçini davam edir.
Aqrotexniki tədbirləri vaxtında və keyfiyyətlə həyata keçirən taxılçılar cari ildə 27 min 196 hektarda bol məhsul yetişdirmişlər. Bunun 25 min 527 hektarı buğda, 1.669 hektarı arpadır. Əkin sahələri ötən illə müqayisədə 5 min 565 hektar çoxdur.
Mühüm kampaniyaya mütəşəkkil hazırlıq sayəsində qısa müddətdə 7 min hektardan çox zəmi biçilmişdir. Hər hektardan məhsuldarlıq 30-32 sentner təşkil edir. Mütəxəssislər bu il zəmilərdən 90 min tondan çox taxıl istehsal ediləcəyini proqnozlaşdırırlar.
Xatırladaq ki, ötən il torpaq sahibləri rayon ərazisində 21 min 631 hektar sahədə taxıl əkmiş, 70 min 312 ton məhsul götürmüşlər.
Bölmənin digər xəbərləri
