İyunun 25-də “Grescent Beash” mehmanxanasında Beynəlxalq Humanitar Yardım üzrə Respublika Komissiyası ABŞ-ın “Mersi Korps” Beynəlxalq Humanitar Təşkilatının ölkəmizdəki nümayəndəliyi ilə birgə “Azərbaycanda beynəlxalq humanitar təşkilatların sərbəst fəaliyyəti üçün şərait yaradılması sahəsində görülmüş işlər və mövcud problemlər” mövzusunda seminar-müşavirə keçirmişdir. 

Seminar-müşavirədə Nazirlər Kabinetinin, əlaqədar nazirlik, komitə və konsernlərin, maliyyə qurumlarının, ölkəmizdə fəaliyyət göstərən bütün beynəlxalq humanitar təşkilatların nümayəndələri, xarici ölkələrin Azərbaycandakı səfirləri iştirak edirdilər.

Tədbiri baş nazirin müavini, Dövlətqaçqınkomun sədri, Beynəlxalq Humanitar Yardım üzrə Respublika Komissiyasının sədri Əli Həsənov açaraq dedi ki, bu tədbiri keçirməkdən məqsəd ölkəmizdə fəaliyyət göstərən beynəlxalq humanitar təşkilatların gördüyü işləri, onların üzləşdiyi bəzi problemləri müzakirə etməkdir.

Ə.Həsənov həmçinin bildirdi ki, müxalifət mətbuatında ölkəmizdəki qaçqın və məcburi köçkünlərin sayı barədə bəzən təhrif olunmuş, yanlış məlumat verilir və erməni tərəfi beynəlxalq tədbirlərdə bundan məharətlə istifadə edir.

Baş nazirin müavini 1992-ci ildən bəri beynəlxalq humanitar təşkilatların ölkəmizə 530 milyon dollar həcmində yardım göstərdiyini, ötən il bu yardımın 42 milyon dollar həcmində olduğunu vurğuladı. Bu təşkilatların fəaliyyətini əlaqələndirmək və tənzimləmək məqsədi ilə hələ 1995-ci ildə Azərbaycan Prezidentinin Sərəncamı ilə Beynəlxalq Humanitar Yardım üzrə Respublika Komissiyası yaradılmışdır. Nazirlər Kabineti həmin təşkilatların fəaliyyətini tənzimləyən Qaydaları təsdiq etmişdir. Bu təşkilatların sərbəst fəaliyyət göstərməsi üçün respublikamızda kifayət qədər hüquqi baza yaradılmış, müvafiq qanunlar qəbul olunmuşdur. Onlar ölkəmizdə heç bir problemlə üzləşməməlidir və respublikamızın dövlət, hökumət qurumları bunun üçün maksimum səy göstərirlər.

Seminar-müşavirədə Amerika Birləşmiş Ştatlarının “Beynəlxalq İnkişaf Agentliyi” humanitar təşkilatının Azərbaycandakı nümayəndəliyinin rəhbəri Uilyam Makkini çıxış etdi, ABŞ-ın “Mersi Corps” beynəlxalq humanitar təşkilatının Bakı nümayəndəliyinin rəhbəri Uilyam Holbrukun “Azərbaycanda fəaliyyət göstərən beynəxalq humanitar təşkilatlar üçün beynəlxalq normalara uyğun tam hüquqi bazanın yaradılması haqqında” məruzəsi dinlənildi.

Sonra ABŞ-ın “Finka”, İngiltərənin “Oksfam” və Norveçin humanitar təşkilatlarının nümayəndələrinin məlumatları dinlənildi.

Seminar-müşavirədə respublikamızda fəaliyyət göstərən beynəlxalq və yerli təşkilatların normal fəaliyyətinin əlaqələndirilməsi və tənzimlənməsində Beynəlxalq Humanitar Yardım üzrə Respublika Komissiyasının rolundan, Azərbaycan hökuməti ilə beynəlxalq humanitar təşkilatlar arasında əməkdaşlığın daha da inkişaf etdirilməsindən, dövlət strukturları ilə humanitar təşkilatların qarşılıqlı məlumat mübadiləsinin təkmilləşdirilməsindən ətraflı bəhs olundu.

Vergilər naziri Fazil Məmmədov, ədliyyə nazirliyinin, Milli Bankın məsul işçiləri seminar-müşavirədə çıxış edərək, beynəlxalq humanitar təşkilatların fəaliyyətinə kömək məqsədi ilə görülən tədbirlərdən danışdılar.

Baş nazirin müavini Əli Həsənov seminar-müşavirəyə yekun vurdu.